કોરોના વાયરસ / ચીનમાં ઘાતક કોરોના વાયરસનો કહેર વધ્યો: મૃતકોની સંખ્યા 170, સેના તહેનાત

અંદાજે છ હજાર લોકો આ ખતરનાક વાઈરસની ઝપેટમાં આવ્યા હોવાની સત્તાવાર રીતે પુષ્ટિ કરવામાં આવી છે. આરોગ્ય નિષ્ણાતોએ ચેતવણી આપી છે કે, કોરોના વાઈરસના વધતા ચેપના કારણે આગામી ૧૦ દિવસમાં સ્થિતિ બહુ કથળશે, જેના પરિણામે બહુ મોટી સંખ્યામાં લોકોનાં મોત થશે.

કોરોના વાઈરસ એ વાઈરસનો એક મોટો સમૂહ છે, પરંતુ તેમાંથી ફક્ત છ વાઈરસ જ લોકોને ચેપ લગાવે છે. તેની સામાન્ય અસરથી શરદી-ઉધરસ થઈ જાય છે, પરંતુ 'સિવિયર એક્યુટ રેસ્પિરેટરી સિન્ડ્રોમ' (સાર્સ) એવો કોરોના વાઈરસ છે, જેના પ્રકોપથી વર્ષ ૨૦૦૨-૦૩માં ચીન અને હોંગકોંગમાં લગભગ ૬૫૦ લોકો મૃત્યુ પામ્યા હતા.

ચીનના રાષ્ટ્રપતિ શી જિનપિંગે કોરોના વાઈરસના પ્રકોપને રોકવાની મુશ્કેલ જવાબદારી સેનાને સોંપવાનો આદેશ આપ્યો છે. આ વાઈરસ ૧૭ દેશમાં ફેલાઈ ગયો છે. દરમિયાન, અનેક વૈશ્વિક એરલાઈન્સે ચીનના વિવિધ શહેરોની તેમની ફ્લાઈટ્સ રદ્ કરી છે. ચીનમાં આ વાઈરસનો ચેપ છ વિદેશી લોકોને પણ લાગ્યો છે. જર્મનીમાં ચાર કેસની પુષ્ટિ થઈ છે. આ રીતે, તે કોરોનાથી પીડિત ફ્રાન્સ પછીનો બીજો યુરોપિયન દેશ બન્યો છે.

પીપલ્સ લિબરેશન આર્મી (પીએલએ)ના વડા રાષ્ટ્રપતિ શીએ સેનાને તેના ઉદ્દેશને દ્રઢતાથી મનમાં રાખવા અને કોરોના વાઈરસ સામેની આ જંગમાં યોગદાન આપવાની મુશ્કેલ જવાબદારી નિભાવવા જણાવ્યું છે. પીએલએએ હુબેઈ પ્રાંતની રાજધાની વુહાનમાં તેના હજારો તબીબી કર્મચારીઓને આ વાઈરસથી સંક્રમિત લોકોને બચાવવાના કામમાં લગાવ્યા છે, જેથી ડોકટરોની મદદ કરી શકાય. આ શહેર કોરોના વાઈરસથી સૌથી વધુ પ્રભાવિત થયું છે.ફ્રાન્સમાં કોરોના વાઈરસનો પાંચમો કેસ સામે આવ્યો છે.

આ ૮૦ વર્ષીય ચીની નાગરિકને મંગળવારે હોસ્પિટલમાં દાખલ કરવામાં આવ્યો હતો. હવે તેની પુત્રીને પણ આ વાઈરસનો ચેપ લાગ્યો છે. જાપાનના આરોગ્ય મંત્રાલયે જણાવ્યું કે, વુહાનથી પરત લાવવામાં આવેલા લોકોમાં સામેલ ત્રણ જાપાની નાગરિકોમાં પણ આ વાઈરસનો ચેપ જોવા મળ્યો છે.

આજે તિબેટમાં પણ કોરોના વાઈરસનો પ્રથમ કેસ નોંધાતાં તંત્રમાં ખળભળાટ મચી ગયો છે. આ ૩૪ વર્ષીય પીડિત વ્યક્તિ ચીનના હુબઈ પ્રાંતથી ૨૪ જાન્યુઆરીએ પરત ફરી હતી. ઓસ્ટ્રેલિયા, ફ્રાન્સ, અમેરિકા અને ચીન ઉપરાંત સાત એશિયાઈ દેશોમાં પણ કોરોના વાઈરસના કેસ સામે આવ્યા છે.

ટેક જાયન્ટ કંપની ગૂગલે કોરોના વાઈરસના ખતરાને કારણે ચીનમાં તેની તમામ ઓફિસો અસ્થાયી રૂપે બંધ કરવાનો નિર્ણય લીધો છે. તેમાં ચીન, હોંગકોંગ અને તાઈવાનની તમામ ઓફિસનો સમાવેશ થાય છે.વર્લ્ડ હેલ્થ ઓર્ગેનાઈઝેશન (ડબ્લ્યુએચઓ)એ તમામ સરકારોને કોરોના વાઈરસ સામે લડવા જરૂરી તમામ પગલાં ભરવા જણાવ્યું છે.

પરિસ્થિતિની ગંભીરતાને ધ્યાનમાં લઈને ડબ્લ્યુએચઓએ આજે એક ઈમર્જન્સી બેઠક બોલાવી છે, જેમાં એ નક્કી કરવામાં આવશે કે આ વાઈરલ બીમારીને ‘ગ્લોબલ હેલ્થ ઈમર્જન્સી’ એટલે કે વૈશ્વિક મહામારી જાહેર કરવી જોઈએ કે કેમ. જો આમ કરવામાં આવશે તો આંતરરાષ્ટ્રીય સ્તરે તેની સામે લડવા અનેક અસરકારક પગલાં લેવામાં આવશે.