આક્ષેપ  / કોંગ્રેસનો ગંભીર આક્ષેપ : કહ્યું 'નમસ્તે ટ્રમ્પ'થી ફેલાયો કોરોના, WHOની ગાઈડલાઈન હતી છતાં કાર્યક્રમ યોજાયો

• કોંગ્રેસ પ્રદેશ અધ્યક્ષ અમિત ચાવડાના ગંભીર આક્ષેપ 
• `નમસ્તે ટ્રમ્પ' કાર્યક્રમથી કોરોના ફેલાવવાની શરૂઆત થઈ હોવાના આક્ષેપ
• કોંગ્રેસ પ્રદેશ અધ્યક્ષ અમિત ચાવડાના સરકાર પર ગંભીર આક્ષેપો 

ગુજરાતમાં કોરોનાથી વણસી રહેલી પરિસ્થિતિને લઇને કોંગ્રેસ પ્રદેશ અધ્યક્ષે રાજ્ય સરકાર પર નિશાન તાકતા ગંભીર આક્ષેપ લગાવ્યાં છે. જેમાં અમિત ચાવડાએ અમદાવાદમાં યોજાયેલા 'નમસ્તે ટ્રમ્પ' કાર્યક્રમથી કોરોના ફેલવાની શરૂઆત થઇ હોવાના આક્ષેપ લગાવ્યાં છે. 

કોંગ્રેસ પ્રદેશ અધ્યક્ષ અમિત ચાવડાએ રાજ્ય સરકાર પર ગંભીર આક્ષેપો લગાવ્યાં છે. અમિત ચાવડાએ કહ્યું કે 'નમસ્તે ટ્રમ્પ' ના કાર્યક્રમને લઇને હાઇકોર્ટમાં અરજી દાખલ કરવામાં આવશે. આ કાર્યક્રમને લઇને ન્યાયિક તપાસની માગ કરવામાં આવશે. 

ડોનાલ્ડ ટ્રમ્પ અભિવાદન સમિતિ, ગુજરાત ક્રિકેટ એસોસિયેશન સામે તપાસ થાય તેવી માંગણી કરવામાં આવશે. જાન્યુઆરીના પ્રથમ સપ્તાહથી જ ભારત સરકારને જાણ હતી કે રોગ કેટલો ગંભીર છે તેમ છતાં કેમ સાવચેતીના પગલા લેવામાં આવ્યાં નહીં. 

;

અમિત ચાવડાએ જણાવ્યું કે WHO એ પહેલાથી જ કહ્યું હતું કે માનવથી માનવ રોગ ફેલાઇ રહ્યો છે. તેમ છતાં સરકારે ગંભીરતાને અવગણીને રાજકીય લાભને વશ થઇ 'નમસ્તે ટ્રમ્પ' કાર્યક્રમ યોજ્યો. 'નમસ્તે ટ્રમ્પ' કાર્યક્રમથી WHO ની ગાઇડલાઇનનું ઉલ્લંઘન કરાયું. આ અજાણતા થયેલી ભૂલ નથી, ગુનાહિત બેદરકારી છે. 

પરેશ ધાનાણીએ સરકાર પર આકરા પ્રહાર કર્યાં

ઉલ્લેખનીય છે કે આ અગાઉ કોંગ્રેસના દિગ્ગજ નેતા પરેશ ધાનાણીએ રાજ્ય સરકારને કોરોનાને લઇને આડેહાથ લીધી હતી. જેમાં પરેશ ધાનાણીએ જણાવ્યું હતું કે જો સરકારે યોગ્ય સમયે એરપોર્ટ બંધ કર્યા હોત તો રાજ્યમાં કોરોનાનિ સ્થિતિ પર કાબૂ મેળવી શકાયો હતો. હાલ કોરોનાની સ્થિતિ સરકારના નિયંત્રણની બહાર છે. ગુજરાત સરકાર કોરોના સામે લડવામાં નિષ્ફળ રહી છે. આ સાથે બિન ગુજરાતીઓની સ્થિતિ ગુજરાતમાં દયનીય બની છે. શ્રમિકો 100 કિમી પગપાળા જઇ રહ્યાં છે, વૈશ્વિક મહામારી વચ્ચે શ્રમિકો નિરાધાર બન્યાં છે. સરકાર કોરોનાને લઇને પોતાની નિષ્ફળતા છુપાવી રહી છે, ભારત ભગવાનના ભરોસે છે. રાજ્યના મુખ્યમંત્રી કોરોના સાથે જીવવાની સલાહ આપે છે, સરકાર સાચી વાતોને છુપાવી રહી છે.