કોરોના વેક્સિનના મામલે ભારતથી ક્યાંય પાછળ રહી ગયેલા ચીને હવે ધૂંધવાઈને ભારતીયોને પરેશાન કરવા માટે નવો પેંતરો ચાલુ કર્યો છે.
ચીનની કોરોના વેક્સિન પર કોઈને પણ નથી ભરોસો
ભારતીયોને પરેશાન કરવા માટે ચીને રચ્યો પેંતરો
ભારત સહિત 20 દેશમાંથી આવતા લોકો માટે ફરજીયાત બનાવી વેક્સિન
ચીને વિદેશી નાગરિકોને વિઝા જારી કરવાનું શરૂ કરી દીધું છે, પરંતુ તેણે ભારત અને અન્ય ૧૯ દેશોથી આવનારા લોકો માટે કોરોના વાઈરસની ચીન નિર્મિત વેક્સિન મુકાવવી ફરજિયાત કરી દીધી છે. ચીનના આ કુટિલ દાવની અસર હજારો ભારતીય વિદ્યાર્થીઓ ઉપરાંત ચીનમાં કામ કરતા નોકરિયાતો અને તેમના પરિવારના સભ્યો પર પડવાની પણ આશંકા છે, જેઓ ચીન પરત ફરવા માટે બીજિંગથી મંજૂરી મળવાની રાહ જોઈને બેઠા છે.
ચીનમાં ભારતીય વિદ્યાર્થીઓની સંખ્યા ૨૩ હજારથી વધુ
સૂત્રોના જણાવ્યા અનુસાર ચીનમાં ભારતીય વિદ્યાર્થીઓની સંખ્યા ૨૩ હજારથી પણ વધારે છે, જેમાંથી મોટા ભાગના મેડિકલ સ્ટુડન્ટ્સ છે. આ ઉપરાંત ચીનમાં કામ કરતા એવા સેંકડો નોકરિયાતો પણ છે, જેઓ કોરોના મહામારીના કારણે લાગુ કરવામાં આવેલા યાત્રા પ્રતિબંધોના કારણે ભારતમાં જ રોકાયેલા છે. જે ૨૦ દેશો પર ચીન નિર્મિત કોરોના વેક્સિન લગાવવાની શરત મૂકવામાં આવી છે તેમાં ભારત ઉપરાંત પાકિસ્તાન, ઓસ્ટ્રેલિયા, દક્ષિણ કોરિયા, નાઈજિરિયા, ગ્રીસ, ઈટાલી, ઈઝરાયલ, નોર્વે અને ઈન્ડોનેશિયા પણ સામેલ છે.
ભારત તથા ચીન વચ્ચે કોઈ સીધી ફ્લાઈટ નથી
સૌથી મોટી સમસ્યા એ છે કે ભારતમાં કોવિડ-૧૯ની કોઈ પણ ચાઈનીઝ વેક્સિન ઉપલબ્ધ નથી અને ભારત તથા ચીન વચ્ચે કોઈ સીધી ફ્લાઈટ પણ નથી. આવા સંજોગોમાં ભારતીયોને ચીનના વિઝા લેવામાં અનેક મુશ્કેલીઓનો સામનો કરવો પડશે. ભારત સરકારે ચીન નિર્મિત વેક્સિનના ઉપયોગને મંજૂરી આપી નથી અને ભારતીયોને ચીનની કોરોના વેક્સિન પર ભરોસો પણ નથી.
બેકફૂટ પર ધકેલાયુ ચીન
ચીનની વેક્સિનને લઈ આ નવો નિયમ એવા સમયે સામે આવ્યો છે, જ્યારે ચીન દુનિયાભરમાં પોતાની વેક્સિનને વેચવા મથી રહ્યું છે. ચીને તેના ૬.૫ કરોડ નાગરિકોને આ વેક્સિનનો ડોઝ આપ્યો છે. સૌથી ચોંકાવનારી વાત એ છે કે ચીને અન્ય કોઈ દેશમાં બનેલી વેક્સિનનો ઉપયોગ કરવાની મંજૂરી આપી નથી.હકીકત એ પણ છે કે ભારતની વેક્સિન ડિપ્લોમસી ચીન સહન કરી શકતું નથી. ભારતના ‘વેક્સિન ફ્રેન્ડિશપ’ના અભિયાને ચીનને દક્ષિણ એશિયામાં બેકફૂટ પર ધકેલીને સાવ એકલું પાડી દીધું છે. ભારતે પહેલાંથી જ શ્રીલંકા-પાકિસ્તાનને બાદ કરતાં તમામ સાર્ક દેશોને સીરમ ઈન્સ્ટિટ્યૂટની કોવિશીલ્ડ વેક્સિન ભેટમાં આપી છે. ભારતે બાંગ્લાદેશ, અફઘાનિસ્તાન, મ્યાનમાર, મોરેશિયસ, માલદીવ્સ અને બ્રાઝિલને પણ વેક્સિન આપી છે. ભારતે ૭.૭ લાખની વસ્તી ધરાવતા ભુતાનને તો કોરોનાની વેક્સિન સાવ મફતમાં આપવાનો વાયદો કર્યો છે. ચીન સાથે લદ્દાખમાં તણાવ વચ્ચે પાડોશી દેશોને કોરોનાની વેક્સિન આપીને ભારત ચીનનું કદ સતત નાનું કરી રહ્યું છે.
ચીન છેલ્લા ઘણા સમયથી ભારતના પાડોશી દેશો સાથે સારા સંબંધ સ્થાપીને ભારતને એકલું પાડવાની નિષ્ફળ કોશિશ કરતું આવ્યું છે. બીજી તરફ ભારતમાં નિર્મિત કોરોનાની વેક્સિન પર દુનિયાભરના દેશો ભરોસો કરી રહ્યા છે અને તેઓ ચીનની વેક્સિનથી દૂર ભાગી રહ્યા છે.
ચીન પોતાની કોરોના વેક્સિનના પ્રચાર માટે જ નવા કડક નિયમો લાવ્યું છે એ વાત તો હવે જગજાહેર છે. વર્લ્ડ હેલ્થ ઓર્ગેનાઈઝેશન (ડબ્લ્યુએચઓ)એ ફાઈઝર, મોડર્ના અને એસ્ટ્રાજેનેકા વેક્સિનને જ મંજૂરી આપી છે. ચીન ડબ્લ્યુએચઓ દ્વારા મંજૂર કરવામાં આવેલી વેક્સિનના બદલે પોતાની વેક્સિન લગાવવાનો દુરાગ્રહ કરી રહ્યું છે. ચીનની આ અડિયલ નીતિથી તેને લાંબા ગાળે મોટું નુકસાન જ થવાનું છે. ચીનની વેક્સિન કેટલી અસરકારક છે તેના કોઈ રિપોર્ટ પણ ઉપલબ્ધ નથી.
ચીનની દાદાગીરી અને આક્રમકતા હવે સમગ્ર વિશ્વ સામે ખુલ્લી પડી ગઈ છે ત્યારે ભારતીયોને કારણ વગર પરેશાન કરવાની તેની આ કુટિલ ચાલનો જવાબ પણ આવનારા દિવસોમાં મળશે એ નક્કી છે. ઘાતક કોરોના વાઈરસ દુનિયાભરમાં ફેલાવવાનું પાપ પણ ચીનના શિરે જ છે અને અમેરિકા સહિતના અનેક દેશો વારંવાર આ વાત કહી ચૂક્યા છે. ચીન તેના આ નવા ફરમાનથી ફરી એક વખત દુનિયાના દેશોની નજરમાંથી નીચે પટકાયું છે અને ભારતને નીચું દેખાડવાની કોશિશમાં ચીને ખુદની છાપ જ બગાડી છે.•