અસર / સુપ્રીમ કોર્ટના આદેશ બાદ દોડતા થયાં ગુજરાતના મંત્રીઓ, તાબડતોડ પહોંચશે અહીં

• સુપ્રીમ કોર્ટે ગુજરાત સરકારને લગાવી ફટકાર
• કોરોનામાં બેદરકારી મુદ્દે લગાવી ફટકાર
• રાજ્ય સરકાર થઈ દોડતી

ઉલ્લેખનીય છે કે, સુપ્રીમ કોર્ટની ઝાટકણી બાદ ગુજરાત સરકાર દોડતી થઇ છે અને વડી અદાલતના આદેશને ગંભીરતાથી લઇને રાજ્યના મુખ્યમંત્રી વિજય રૂપાણીના નિવાસ સ્થાને તાત્કાલિક અસરથી આજે સાંજે કોર કમિટીની એક બેઠક બોલાવવામાં આવી છે. 

મુખ્યમંત્રીના નિવાસ સ્થાને યોજાશે બેઠક 

ગાંધીનગર ખાતે યોજાનારી આ બેઠકમાં ગુજરાતમાં કોરોના વાયરસની સ્થિતિ અને તેની સામે લેવામાં આવી રહેલા પગલા મુદ્દેની સમીક્ષા હાથ ધરવામાં આવશે. નોઁધનીય છે કે, સુપ્રીમ કોર્ટના આદેશ પ્રમાણે શુક્રવાર સુધીમાં રાજ્યમાં કોરોનાની સ્થિતિ અંગેનો એક રિપોર્ટ રજૂ કરવાનો છે.  

સુપ્રીમ કોર્ટે માગ્યો જવાબ 

સોમવારે સુપ્રીમ કોર્ટે ગુજરાત સહિત મહારાષ્ટ્ર, દિલ્હી અને આસામ એમ ચાર રાજ્યો પાસેથી કોરોનાની કામગીરી અંગે રિપોર્ટ માંગ્યો છે. જસ્ટિસ અશોક ભૂષણના વડપણ હેઠળની બેન્ચે કહ્યું હતું કે આ રાજ્યોમાં સંક્રમણની સ્થિતિ બેકાબૂ બની રહી છે ત્યારે આ રાજ્યો 2 દિવસમાં રિપોર્ટ સબમીટ કરે. બેન્ચે એમ પણ કહ્યું હતું કે દિલ્હી અને મહારાષ્ટ્ર બાદ ગુજરાતમાં સ્થિતિ ખરાબ થઈ રહી છે.

છેલ્લાં 5 દિવસમાં ગુજરાતમાં રોજના 1400થી વધુ કેસ

મહત્વનું છે કે ગુજરાતમાં કોરોનાની વણસી રહેલી પરિસ્થિતિને પગલે રાજ્ય સરકારે અમદાવાદમાં 2 દિવસનું કર્ફ્યુ લગાવ્યા બાદ ચાર મહાનગરોમાં અચોક્કસ મુદ્દતનો રાત્રિ કર્ફ્યૂ  પણ લાગુ કરી દીધો છે. રાજ્યમાં કોરોનાના આંકડાની વાત કરીએ તો છેલ્લાં 5 દિવસમાં 1400થી વધુ રોજના કેસ આવી રહ્યાં છે. 

અમદાવાદમાં પરિસ્થિત વધારે ખરાબ

જ્યારે અમદાવાદ જિલ્લાની વાત કરીએ તો અહીં રોજના 300થી વધુ કેસ થઈ ગયા છે. છેલ્લાં 5 દિવસમાં 1507 કેસ નોંધાયા છે, જ્યારે 24ના મોત થયા છે. અમદાવાદમાં કુલ મૃતાંક 1969 પર પહોંચ્યો છે ત્યારે તંત્રએ અહીં આકરા પગલા લેવાની ફરજ પડી છે. 

દિવાળીના તહેવારો બાદ ગુજરાતમાં કોરોનાના કેસમાં તોતિંગ ઉછાળો જોવા મળી રહ્યો છે. અમદાવાદમાં સ્થિતિ ફરી ભયજનક બનતા મનપા દ્વારા 2 દિવસનો કર્ફયુ લાદવામાં આવ્યો છે જેનો 2  દિવસ સુધી કડક રીતે અમલ કરવામાં આવ્યો હતો. જો કે, રાજ્યના મુખ્યમંત્રી વિજય રૂપાણીએ ગઇકાલે પ્રજાજોગ સંબોધનમાં જણાવ્યું હતું કે, અમદાવાદમાં આવતીકાલથી કર્ફ્યુ પુરો થશે અને જનજીવન રાબેતા મુજબ થશે તેવી જાહેરાત કરી હતી. સાથે યુવાનોને પણ બિન જરૂરી ઘરની બહાર ન નીકળવા માટે અપીલ કરી હતી.  દિવાળીના તહેવારો બાદ ગુજરાતમાં સ્થિતિ વણસી 

24 કલાક દરમિયાન 13 દર્દીઓના થયાં મોત 

રાજ્ય સરકારના આરોગ્ય વિભાગ દ્વારા જાહેર કરવામાં આવેલ કોરોનાના આંકડા પ્રમાણે રવિવારે રાજ્યમાં 1495 કેસ નોંધાયા છે.નોંધનીય છે કે, કોરોના વાયરસના નવા કેસની સામે આજે 1167 દર્દીઓ સાજા થતા કુલ સાજા થયેલા દર્દીઓનો આંકડો 1,79,953 પર પહોંચ્યો છે. 24 કલાક દરમિયાન 13 દર્દીઓના કોરોનાને કારણે મોત થતા કુલ મૃત્યુઆંક 3859 પર પહોંચ્યો છે. 

4 રાજ્યોમાં કોરોનાની સ્થિતિ બગડી 

ઉલ્લેખનીય છે કે, ભારતમાં કોરોના વાયરસથી સંક્રમિત લોકોની સંખ્યા 91 લાખને પાર પહોંચી છે. આ દરમિયાન, દિલ્હી, મહારાષ્ટ્ર અને ગુજરાત અને આસામમાં દરરોજ નોંધાતા કોરોના કેસમાં મટો ઉછોળો જોવા મળી રહ્યો છે. આ સાથે જ મોતનો આંક પણ વધ્યો છે.