કોવિડ 19 / દિલ્હીમાં કોરોનાનું 'તાંડવ', દર કલાકે મળ્યા એક હજારથી પણ વધુ કેસ  

• રાજધાનીમાં કોરોનાના કેસો વધી રહ્યા છે 
• ઓક્સિજન, આઇસીયુ બેડની અછત વર્તાઇ રહી છે 
• કેન્દ્ર સરકાર પાસે કેજરીવાલ સરકારે માંગી મદદ

દિલ્હીમાં આજે પણ રેકોર્ડબ્રેક કેસ નોંધાતા આપ સરકારનું વહીવટી તંત્ર સફાળું હરકતમાં આવી ગયું છે, આજે એકીસાથે ઘણા નિર્ણયો લેવાયા હતા અને કાર્યવાહી પણ કરવામાં આવી હતી. મહત્વનું છે કે આજે દિલ્હીમાં અત્યાર સુધીના સૌથી વધુ 25462 નવા કેસ નોંધાયા છે, જે અત્યાર સુધીના સૌથી વધુ છે, અને આજે 161 લોકોએ કોરોનાની સામે પોતાના જીવ ગુમાવ્યા હતા. 

રાજધાનીના માથે કોરોના સંકટ 

છેલ્લા અમુક દિવસોથી કોરોનાની નવી લહેરનું સંકટ રાષ્ટ્રીય રાજધાની દિલ્હીને ઘેરી વળ્યું છે, અને પરિસ્થિતિ ગંભીર બની રહી છે, રોજ રેકોર્ડબ્રેક કેસ આવી રહ્યા છે, અમુક દિવસોથી કેસ 20 હજાર કરતાં વધુ જ આવી રહ્યા છે અને આજે 25462 નવા કેસ મતલબ કે દર કલાકે રાજધાનીમાંથી 1 હજારથી પણ વધુ કોરોના સંક્રમિતો મળી આવ્યા છે. મહત્વનું છે કે આ સ્થિતિને લઈને દિલ્હી સરકાર દ્વારા અમુક આદેશો પણ જાહેર કરવામાં આવ્યા છે. 

શું છે દિલ્હી સરકારના આદેશ ?

સૌથી પહેલા ઇંડિગો, વિસ્તારા, સ્પાઇસ જેટ અને એર એશિયા એરલાઇન્સની સામે ફરિયાદ નોંધવાનો આદેશ અપાયો હતો, મહારાષ્ટ્રથી આવનારા લોકોના RT-PCR રિપોર્ટ ચેક ન કરવાના મામલે આ એક્શન લેવાનો સરકારે નિર્ણય લીધો છે, DDMA એક્ટ હેઠળ આ કાર્યવાહી કરાશે. 

આ સિવાય સરકારે આદેશ કર્યો છે કે કોરોનાની સારવાર કરી રહેલા બધાજ નર્સિંગ હોમ/ પ્રાઇવેટ દવાખાનાઓએ પોતાના 80 ટકા આઇસીયુ બેડ કોરોના પેશન્ટ માટે રિઝર્વ કરે. 

આ બધાની સાથે જ આજે દિલ્હી સીએમ અરવિંદ કેજરીવાલે ટ્વિટર પર જાણકારી આપતા કહ્યું હતું કે આજે કોમનવેલ્થ ગેમ્સ વિલેજ, યમુના ખેલ પરિસર અને સરકાર સ્કૂલની મુલાકાત લીધી હતી અને આ ત્રણ જગ્યાઓ પર જલ્દીથી જ 1500 ઓક્સિજન બેડ એક્ટિવ કરી દેવામાં આવશે. 

કેજરીવાલે પ્રેસ કોન્ફરન્સ કરી હતી 

કોરોનાથી બગડતી પરિસ્થિતિ પર રવિવારે મુખ્યમંત્રી અરવિંદ કેજરીવાલે પ્રેસ કોન્ફરન્સ કરી. તેમણે જણાવ્યું કે, છેલ્લા 24 કલાકમાં 24 હજાર કેસ આવ્યા હતા અને તેનાથી છેલ્લા 24 કલાકમાં સાડા 19 હજાર કેસ આવ્યા હતા. આનાથી ખબર પડી રહી છે કે કોરોના ઝડપથી વધી રહ્યો છે. તેનાથી પણ વધુ ચિંતાની વાત એ છે કે દિલ્હીમાં પૉઝિટિવિટી રેટ વધીને 30 ટકા થઇ ગયો. જ્યારે આનાથી 24 કલાક પહેલા સુધી આ 24 ટકા હતો. દિલ્હીમાં કોરોનાના દર્દીઓ માટે જે બેડ રિઝર્વ છે, તે ઘણા ઝડપથી પૂર્ણ થઇ રહ્યા છે. આઈસીયૂ બેડ્સની ઘણી અછત છે. સમગ્ર દિલ્હીમાં મળીને 100થી ઓછા આઈસીયૂ બેડ્સ વધ્યા છે.

તેમણે કહ્યું કે, ઑક્સીજનની પણ ઘણી અછત છે. અમે સતત કેન્દ્ર સરકારના સંપર્કમાં છીએ અને તેમની પાસેથી મદદ પણ મળી રહી છે જે મદદમાટે તેમનો આભાર વ્યક્ત કરી રહ્યા છીએ. ડૉ. હર્ષવર્ધન સાથે કાલે સાંજે વાત થઇ હતી તેમને પણ અમે જણાવ્યું કે બેડની જરૂરિયાત છે, અમિત શાહજી સાથે પણ વાત થઇ હતી તો તેમને પણ જણાવ્યું કે બેડની જરૂરિયાત છે.

7000 બેડ્સ કેન્દ્ર સરકારે રિઝર્વ કરેઃ કેજરીવાલ

સીએમ કેજરીવાલે કહ્યું કે, દિલ્હીમાં કેન્દ્ર સરકારના કુલ મળીને 10000 બેડ છે જેમાંથી હજુ અંદાજિત 1800 બેડ જ કોરોના માટે રિઝર્વ થયા છે, અમારુ નિવેદન છે કે ઓછામાં ઓછા 7000 બેડ્સ કોરોના માટે રિઝર્વ કરે. આગામી 2-3 દિવસમાં 6000 ઓક્સીજન બેડ અમે તૈયાર કરી લઇશું. અનેક હોસ્પિટલોમાં હાઈ ફ્લો ઑક્સીજનની વ્યવસ્થા કરી રહ્યા છીએ. યમુના સ્પોર્ટ્સ કોમ્પ્લેક્ષ, કૉમન વેલ્થ ગેમ, રાધા સ્વામી સત્સંગ, શાળાઓમાં પણ વ્યવસ્થા કરી રહ્યા છે.