જીવલેણ કોરોના વાયરસ દુનિયાના ૧૯૨ દેશોમાં હાહાકાર મચાવી રહ્યો છે. આ મહામારીના કારણે અત્યાર સુધીમાં ૧૪,૦૦૦થી વધુ લોકોનાં મોત થઈ ચૂક્યાં છે. ચીન પછી યુરોપિયન દેશ ઈટાલી સૌથી વધુ અસરગ્રસ્ત છે. અમેરિકામાં પણ હવે કોરોના વધુ ઘાતક બનતો જાય છે. ગઈ કાલે રવિવારે, છેલ્લા ૨૪ કલાકમાં જ ૧૪,૦૦૦ નવા કેસ સામે આવતાં ખળભળાટ મચી ગયો હતો. અમેરિકામાં એક જ દિવસમાં ૧૦૦થી વધુ લોકોએ જીવ ગુમાવ્યો છે. અમેરિકામાં અત્યાર સુધીમાં કુલ ૩૩,૦૦૦થી વધુ લોકોને ઘાતક કોરોનાનો ચેપ લાગ્યો છે, જ્યારે ૪૦૦થી વધુ દર્દીઓ મૃત્યુ પામ્યા છે.
અમેરિકામાં ૨૪ કલાકમાં ૧૦૦થી વધુનાં મોતઃ ૧૪,૫૫૦ નવા કેસ સામે આવ્યા
ચીને કોરોના વાયરસ અંગે અમને સમયસર સાવધાન ન કર્યાઃ ટ્રમ્પ
દુનિયાના ૧૯૨ દેશમાં કોરોનાનો કેર જારી: ૧૪,૦૦૦થી વધુ લોકોનાં મોત
અમેરિકન પ્રમુખ ડોનાલ્ડ ટ્રમ્પે કહ્યું છે કે, તેઓ ચીનના રાષ્ટ્રપતિ શી જિનપિંગના કારણે વધુ ચિંતિત છે, કેમ કે ચીને સમયસર અમેરિકાને ખતરનાક કોરોના વાયરસ અંગે ચેતવણી આપી સાવધાન કર્યા નથી.
ટ્રમ્પે કહ્યું કે, હું ચીનથી થોડો નારાજ પણ છું. હું તેની સાથે પ્રામાણિક છું. હું રાષ્ટ્રપતિ જિનપિંગ અને તેમના દેશનો પૂરો આદર કરું છું. તેમણે અમને કોરોના વિશે સમયસર જણાવવું જોઈતું હતું. અમેરિકાએ વિશેષજ્ઞોને ચીન મોકલવાની રજૂઆત કરી હતી, પરંતુ ચીન તરફથી કોઈ પ્રતિક્રિયા મળી જ નહોતી.
અમેરિકામાં એક જ દિવસમાં ૧૪,૫૫૦ નવા દર્દીઓ મળ્યા છે. તેમાંથી ત્રીજા ભાગના ફક્ત ન્યૂયોર્ક શહેરના જ છે. અહીં છેલ્લા ૨૪ કલાકમાં ૧૨,૩૪૫ કેસ સામે આવ્યા છે. અમેરિકામાં સરેરાશ ૧,૮૦૦ લોકો દીઠ પાંચ ડોકટર ઉપલબ્ધ છે, જ્યારે ભારતમાં આટલા લોકો દીઠ માત્ર એક જ ડોક્ટર છે.
ઈટાલીના સિવિલ પ્રોટેક્શન ડિપાર્ટેમેન્ટના જણાવ્યા અનુસાર, અહીં ગઈ કાલે રવિવાર સુધીમાં કોરોનાગ્રસ્ત દર્દીઓની સંખ્યા વધીને ૫૯૦૦૦થી વધુ થઇ ગઈ છે, જ્યારે ૫,૪૦૦થી વધુ લોકોએ પોતાનો જીવ ગુમાવ્યો છે. અત્યાર સુધીમાં સારવાર લીધા બાદ ૭૦૦૦થી વધુ લોકો સાજા થયા છે. ગત ૨૧ ફેબ્રુઆરીએ ઈટાલીમાં કોરોનાનો પહેલો કેસ સામે આવ્યો હતો. ત્યારબાદ એક મહિના પછી મહામારીને રોકવા માટે દેશની અંદર તમામ યાત્રાઓ પર પ્રતિબંધ લાદવામાં આવ્યો છે. ઈટાલીમાં ચીન કરતાં પણ વધુ લોકોનાં મોત થયાં છે. એવું માનવામાં આવે છે કે, જીવલેણ કોરોના વાયરસ ચીનના હુબેઈ પ્રાંતની રાજધાની વુહાન શહેરથી ફેલાયો છે. ઈટાલીમાં ગઈ કાલે ૬૫૧ લોકોનાં મોત થયાં છે.
ઈટાલી બાદ યુરોપમાં સ્પેન બીજો સૌથી વધુ અસરગ્રસ્ત દેશ છે. ગઈ કાલ સુધીમાં અહીં ૧,૭૦૦થી વધુ લોકોએ કોરોનાના કારણે જીવ ગુમાવ્યો છે. ત્યાર બાદ સરકારે ૧૧ એપ્રિલ સુધી ઈમર્જન્સી (કટોકટી) લાદવાનો આકરો નિર્ણય લીધો છે. સ્પેનમાં અત્યાર સુધીમાં કુલ ૨૮,૦૦૦થી વધુ લોકોને આ વાયરસનો ચેપ લાગ્યો છે.
દરમિયાન, રશિયામાં એક મહિલા ડોક્ટરને વિદેશ યાત્રાએ જવાની હકીકત છુપાવવા બદલ જેલમાં મોકલી દેવામાં આવ્યા છે. તે રજાઓ માણીને સ્પેનથી પરત આવી હતી. તેના પર ૧,૨૦૦ લોકોના જીવ જોખમમાં મૂકવાનો ગંભીર આરોપ છે. વિદેશથી પરત ફર્યા બાદ આ મહિલા ડોક્ટરએ આઈસોલેશનમાં રહેવાનો પ્રોટોકોલ પણ પૂર્ણ કર્યો ન હતો.
છેલ્લા ૨૪ કલાકમાં જ રશિયાના છ અલગ અલગ વિસ્તારોમાં ૬૧ નવા કેસ સામે આવ્યા છે. રશિયામાં કોરોનાના કેસની કુલ સંખ્યા વધીને ૩૬૦થી વધુ થઈ ગઈ છે. રશિયાના રાષ્ટ્રપતિ વ્લાદિમીર પુતિને કહ્યું હતું કે, સમયસર ભરવામાં આવેલાં પગલાંને કારણે હવે સ્થિતિ નિયંત્રણમાં છે.
જર્મનીએ કોરોના વાઈરસના ફેલાવાને રોકવા માટે પ્રતિબંધો વધુ કડક કર્યા છે. અહીં હવે બેથી વધુ વ્યક્તિઓના સાથે બેસવા પર પણ પ્રતિબંધ છે. જર્મન ચાન્સેલર એન્જેલા મર્કેલે જણાવ્યું છે કે, કોરોનાના ચેપના ફેલાવાને રોકવા અને તેની ગતિ ધીમી પાડવા માટે આપણો વ્યવહાર જ સૌથી અસરકારક રીત છે. બીજી તરફ નવા પ્રતિબંધોમાં તમામ બ્યુટી પાર્લર, મસાજ પાર્લર પણ બંધ કરવાનો સમાવેશ થાય છે, જ્યારે અન્ય બિન-જરૂરી દુકાનો પહેલેથી જ બંધ હતી. ચાન્સેલર મર્કેલના સંબોધન બાજ તુરંત જ તેમના કાર્યાલયે જણાવ્યું કે, તેઓ ખુદ આઈસોલેશનમાં જઈ રહ્યાં છે. આ સમય દરમિયાન તેઓ પોતાના ઘરેથી બધું કામ કરશે. જર્મનીમાં અત્યાર સુધીમાં ૧૮૦૦૦ ચેપના કેસ નોંધાયા છે. તેમાંથી ૫૦થી વધુ લોકોનાં મોત નીપજ્યાં છે.
વર્લ્ડ હેલ્થ ઓર્ગેનાઇઝેશન (WHO)એ ચોંકાવનારો રિપોર્ટ જારી કરતાં જણાવ્યું છે કે, આફ્રિકાના ચાર દેશોમાં કોરોના વાયરસ ના કેસ સામે આવ્યા છે. રિપોર્ટ અનુસાર, દુનિયાભરમાં છેલ્લા ૨૪ કલાકમાં ચેપના ૨૬,૦૬૯ નવા કેસો સામે આવ્યા છે અને ૧,૬૦૦ લોકોનાં મોત નીપજ્યાં છે.