Coronavirus / વિશ્વના આ શહેરમાં સૌથી વધુ કોરોના વાયરસના કેસથી થયા મોત, ના વુહાન નથી

• કોરોના વાઈરસે ચીન બાદ ઈટાલીમાં સૌથી વધુ હાહાકાર મચાવ્યો છે
• કોરોના વાઈરસના કારણે ઈટાલીમાં છેલ્લા 24 કલાકમાં જ 368 લોકોનાં મોત નીપજ્યાં છે

ચીનના વુહાન શહેરથી ફેલાયેલા ઘાતક કોરોના વાઈરસે દુનિયાભરમાં કેર મચાવ્યો છે. એક સમયે વુહાનમાં સૌથી વધુ મોત થતાં હતાં. ત્યાં રોજ 150થી 200 લોકો મૃત્યુ પામતા હતા. એકલા વુહાનમાં જ અત્યાર સુધીમાં 2600થી વધુ ચેપગ્રસ્ત લોકોનાં મોત થયાં છે. હાલ વુહાનમાં તો સ્થિતિ કાબૂમાં છે, પરંતુ ઈટાલીના લોમ્બાર્ડી શહેરની હાલત બહુ ખરાબ છે. 

એકલા લોમ્બાર્ડીમાં જ અત્યાર સુધીમાં કુલ 1,218 લોકોનાં મોત થયાં છે. ઈટાલીમાં ગઈ કાલે રવિવારે રેકોર્ડ 368 લોકોનાં મોત થયાં છે, તેમાંથી 289 લોકો લોમ્બાર્ડીના હતા. હાલ કોરોનાગ્રસ્ત દર્દીઓને હોસ્પિટલ સુધી પહોંચાડવા માટે એમ્બ્યુલન્સ પણ ઓછી પડી રહી છે. આઈસીયુમાં પણ નવા દર્દીઓ માટે હાલ જગ્યા રહી નથી. સૌથી મોટી ચિંતાની વાત એ છે કે સારવાર કરનારા ડોક્ટર પોતે કોરોનાગ્રસ્ત થવા લાગ્યા છે. તેના કારણે હોસ્પિટલમાં ડોક્ટરની ભારે અછત પડી રહી છે.

લોમ્બાર્ડીના રિજનલ ગવર્નર અટિલિયો ફોંટાનાએ કહ્યું, ઈટાલીની આર્થિક રાજધાની ગણાતા લોમ્બાર્ડીની હાલત બહુ ખરાબ છે. હવે અમે લોકોને રેસ્ક્યૂ કરવામાં પણ સમર્થ નથી. અમારી પાસે પૂરતાં સંસાધન બચ્યાં નથી. એક કરોડની વસ્તીવાળા આ પ્રાંતમાં કોરોનાગ્રસ્ત લોકોની સંખ્યા 13,272 છે, જેમાંથી 767 દર્દીઓની હાલત અતિ ગંભીર છે.