ચિંતા / અમદાવાદમાં અત્યાર સુધી 279 માઈક્રો કન્ટેનમેન્ટ ઝોન, આ વિસ્તારો બન્યા હોટસ્પોટ ઝોન

• અમદાવાદ શહેરમાં કોરોનાનું સંક્રમણ વધ્યું 
• વધુ 28 વિસ્તારો માઈક્રો કન્ટેનમેન્ટ ઝોનમાં મુકાયા 
• ગોતા,બોડકદેવ અને થલતેજ કોરોનાનું હોટ સ્પોટ 

ઉલ્લેખનીય છે કે, અમદાવાદના સૌથી પૉશ ગણાતા વિસ્તારમાં હવે સંક્રમણ વધતાં વધારે ચિંતા થઈ છે. દિવસને દિવસે માઈક્રો કન્ટેનમેન્ટ ઝોન શહેરમાં વધી રહ્યાં છે. અત્યાર સુધીમાં અમદાવાદમાં કુલ 279 વિસ્તાર માઈક્રો કન્ટેનમેન્ટ ઝોનમાં સમાવેશ કરવામાં આવ્યો છે. નવા ઉમેરાયેલા સાઉથ ઝોનના 2, નોર્થ ઝોનના 2, સાઉથ વેસ્ટ ઝોનના 1, ઇસ્ટ ઝોનના 9, વેસ્ટ ઝોનના 7, નોર્થ વેસ્ટ ઝોનના 7 વિસ્તારને માઇક્રો કન્ટેન્મેન્ટમાં મૂકવામાં આવ્યા છે.

ગોતા,બોડકદેવ અને થલતેજ કોરોનાનું હોટ સ્પોટ

આપને જણાવી દઇએ કે, ગોતા,બોડકદેવ અને થલતેજ કોરોનાનું હોટ સ્પોટ બન્યા છે અને મોટા ભાગની સોસાયટી સીલ કરવામાં આવી છે અને સ્થાનિકોમાં પણ સન્નાટાભર્યો માહોલ જોવા મળી રહ્યો છે. 

દિવાળી બાદ ગુજરાતમાં કોરોનાને લઇને સ્થિતિ બગડી 

દિવાળીના તહેવારો બાદ ગુજરાતમાં કોરોના ગાંડા થયેલા આખલાની જેમ તોફાને ચડ્યો છે. છેલ્લા કેટલાક દિવસોથી ચિંતાજનક કેસ નોંધાઇ રહ્યા છે તો ખાસ કરીને અમદાવાદના પશ્ચિમ વિસ્તારમાં કોરોનાને લઇને સ્થિતિ વધુ વણસી છે. ત્યારે આજરોજ રાજ્ય સરકારના આરોગ્ય વિભાગ દ્વારા જાહેર કરવામાં આવેલ કોરોનાના આંકડા પ્રમાણે છેલ્લા 24 કલાક દરમિયાન રાજ્યમાં 1607 કેસ નોંધાયા છે. 

છેલ્લા 24 કલાક દરમિયાન 16 દર્દીઓના થયાં મોત 

નોંધનીય છે કે, કોરોના વાયરસના નવા કેસની સામે આજે 1388 દર્દીઓ સાજા થતા કુલ સાજા થયેલા દર્દીઓનો આંકડો 1,86,446 પર પહોંચ્યો છે. આજે 16 દર્દીઓના કોરોનાને કારણે મોત થતાં કુલ મૃત્યુઆંક 3922 પર પહોંચ્યો છે. 

અમદાવાદ જિલ્લામાં 353 કેસ આવતા ચિંતા વધી 

આજે અમદાવાદ શહેરમાં 325, અમદાવાદ જિલ્લામાં 28, સુરત શહેરમાં 238, સુરત જિલ્લામાં 61, વડોદરા શહેરમાં 127, વડોદરા જિલ્લામાં 40 , રાજકોટ શહેરમાં 95, રાજકોટ જિલ્લામાં 44,ગાંધીનગર શહેરમાં 35, ગાંધીનગર જિલ્લામાં 31 તો ઉત્તર ગુજરાતના બનાસકાંઠામાં નવા 51 કોરોનાના કેસ નોંધાયા છે. નોંધનીય છે કે, અમદાવાદ બાદ સુરતમાં કોરોનાને લઇને સ્થિતિ વધુ વણસેલી છે. છેલ્લા 5 દિવસ દરમિયાન આ બંન્ને શહેરોમાં 1700થી વધુ કેસ નોંધાતા સ્થાનિક તંત્ર વધુ એલર્ટ થયું છે.