આપણે આપણી સુવિધા માટે ભલે કેલેન્ડર બનાવી લીધું હોય અને સમયને વર્ષ, મહિના, દિવસ, કલાક, મિનિટ અને સેકન્ડમાં વહેંચી દીધો હોય, પરંતુ હકીકતમાં તો સમયના ફક્ત ત્રણ તબક્કા જ હોય છે. ભૂતકાળ એટલે કે જે વીતી ગયો છે એ સમય, વર્તમાન અર્થાત્ એ ક્ષણ, જેમાં આપણે હાલ જીવી રહ્યાં છીએ અને ત્રીજો ભવિષ્ય-આવનારો સમય, જેના વિશે કોઈ નથી જાણતું.
૨૦૨૦નું વર્ષ અનેક પાઠ ભણાવી ગયું
અમેરિકા પણ કોરોના મહામારી સામે ઘૂંટિણયે પડ્યું
કોરોના વોરિયર્સે નિષ્ઠાભેર ફરજ બજાવી
મોટા ભાગના લોકો વર્તમાનમાં રહી વીતેલા સમયને જ યાદ કરતા હોય છે. આપણે પણ વીતી ગયેલા વર્ષ પર એક નજર કરીએ તો ૨૦૨૦નું વર્ષ સમગ્ર માનવજાત માટે સબક શિખવાડનારું સાબિત થયું છે.સમય કેટલો શક્તિશાળી છે તેનો અનુભવ આ વર્ષે કરાવી દીધો.
અમેરિકા પણ કોરોના મહામારી સામે ઘૂંટિણયે પડ્યું
દર નવા વર્ષની જેમ આપણે બધાંએ પણ વર્ષ ૨૦૨૦ના સ્વાગતમાં જોરદાર જશ્ન મનાવ્યો હતો. આશાઓની નવી કૂંપળો ફૂટી હતી, જોકે એ વખતે કોઈને સ્વપ્ને પણ ખ્યાલ નહોતો કે એક અજ્ઞાત વાઈરસ ચીનમાં ફેલાઈ ચૂક્યો છે અને તેના કારણે આખી દુનિયા માટે આ વર્ષ ભયંકર સાબિત થવાનું છે. લાખો લોકો મોતના ખપ્પરમાં હોમાઈ ગયા અને ‘જગત જમાદાર’ ગણાતું અમેરિકા પણ કોરોના મહામારી સામે ઘૂંટિણયે પડી ગયું.
સમય એટલો કપરો આવ્યો કે ઘરમાં બેસી રહેવા સિવાય કોઈ ઉપાય જ ના બચ્યો. જોતજોતામાં દુનિયાભરના દેશોમાં હોસ્પિટલો ઊભરાવા લાગી અને બેડ ઓછા પડવા લાગ્યા. સ્મશાન અને કબ્રસ્તાનમાં પણ જગ્યા ઓછી પડવા લાગી.
કોરોના વોરિયર્સે નિષ્ઠાભેર ફરજ બજાવી
કોરોનાના આ કપરાકાળમાં પણ કેટલાક લોકોના જુસ્સાએ, નિષ્ઠાએ માનવજાતને બચાવવાનું ઉમદા કાર્ય કર્યું. કોરોના વોરિયર્સની ટીમ મેદાને પડી અને તેમણે દિવસ-રાત જોયા વગર દર્દીઓના જીવ બચાવ્યા. આ સમયગાળામાં પણ લોકોએ એકબીજાને જે પ્રકારે સંભાળ્યા, સાથ આપ્યો એ પણ માનવતાનું અનોખું ઉદાહરણ છે. સંઘર્ષના આ સમયમાં પણ ઘણા લોકોએ ખુદની પરવા કર્યા વગર અન્યની મદદ માટે પોતાના જીવની આહુિત આપી દીધી. હોસ્પિટલમાં રાઉન્ડ ધ ક્લોક ફરજ બજાવતા ડોક્ટરો, પેરામેડિકલ સ્ટાફ અને અન્ય કર્મચારીઓ, પોલીસ કર્મચારીઓ, મીડિયા કર્મચારીઓએ પણ પોતાની જાતની પરવા કર્યા વગર જવાબદારી નિભાવી.
૨૦૨૦ના વર્ષે આપણને ઘણા પાઠ પણ શીખવ્યા
સરકારી અધિકારીઓએ પણ જે સમર્પણભાવથી કામ કર્યું છે તે ખૂબ પ્રશંસનીય છે. લોકડાઉનમાં પોતાના વતન જવા માટે ઝૂરતા મજૂરોને તેમની મંજિલ સુધી પહોંચાડવા માટે પણ અનેક નાયક મેદાને પડ્યા અને તેમણે બનતી મદદ કરી. સેવાભાવી સંસ્થાઓએ પણ ખડેપગે રહી કોરોનાગ્રસ્ત દર્દીઓના પરિવારને ભોજન સહિતની સામગ્રીઓ પહોંચાડી. દુનિયાભરના વૈજ્ઞાનિકોએ પણ કોરોનાની વેક્સિન શોધવા માટે પોતાની જાત ઘસી નાખી. ફરી એક વખત સાબિત થઈ ગયું કે જ્યારે મુસીબત આવે છે ત્યારે સમગ્ર માનવજાત એક બનીને તેનો મુકાબલો કરે છે.પડકારભર્યા ૨૦૨૦ના વર્ષે આપણને ઘણા પાઠ પણ શીખવ્યા. આપણને સ્વચ્છતાનું આટલું મહત્ત્વ પહેલાં ક્યારેય સમજાયું નહોતું. કોરોનાએ પરિસ્થિતિ જ બદલી નાખી. આરોગ્યથી મોટું કોઈ ધન નથી એ વાત પણ આપણે સૌ સારી રીતે સમજી ગયાં. લોકો આરોગ્ય પ્રત્યે વધુ ને વધુ જાગ્રત બન્યા.
૨૦૨૧નું વર્ષ આપણા જીવનમાં અનેક નવી આશાઓ લઈ આવ્યું
લોકડાઉનના થોડા મહિનાઓ આપણને પ્રકૃતિની સાવ નજીક લઈ ગયા અને કુદરતનું એ અનોખું સ્વરૂપ આપણે પહેલી વખત નિહાળ્યું. પ્રદૂષણ વગરની આ દુનિયા કેટલી સુંદર છે તેનો અહેસાસ આપણને થયો. કોરોનાકાળમાં આપણી પ્રાચીન હાથ જોડીને નમસ્કાર કરવાની પદ્ધતિ સોશિયલ ડિસ્ટન્સિંગ જાળવી રાખવામાં સૌથી વધુ કારગત સાબિત થઈ.
સ્વસ્થ રહેવા જેવી સંપત્તિ અન્ય કોઈ નથી, માટે હંમેશાં હેલ્થની પૂરી કાળજી રાખજો. આ નવું ૨૦૨૧નું વર્ષ આપણા જીવનમાં અનેક નવી આશાઓ લઈ આવ્યું છે. કોરોના હજુ આપણી વચ્ચે જ છે અને કદાચ આ લડાઈ હજુ ઘણી લાંબી ચાલશે. વેક્સિન આવી ગયા બાદ પણ આપણને બેદરકારી દાખવવી મોંઘી પડી શકે છે. ઈતિહાસમાં ક્યારેય ન ભુલાય તેવી લડાઈ જીતવાની દિશામાં આપણે સતત આગળ વધી રહ્યાં છીએ. નાત-જાત, ધર્મના વાડા તોડીને હંમેશાં આમ જ માનવતાવાદી બનીએ તો કોઈ મહામારી આપણને ક્યારેય હરાવી નહીં શકે. •