રાજકોટમાં CMનું ઠેર ઠેર કરાયું ભવ્ય સ્વાગત, રોડ શો માં મોટી સંખ્યામાં લોકો પહોંચ્યા
રાજકોટમાં ભાજપનું શક્તિ પ્રદર્શન
મુખ્યમંત્રીએ યોજ્યો ભવ્ય રોડ શો
અઢી કિમી વિસ્તારમાં ફર્યો રોડ શો
રાજકોટમાં આજે મુખ્યમંત્રી દ્વારા એક ભવ્ય રોડ શોનું આયોજન કરવામાં આવ્યું હતું. જેમાં ભાજપે મોટેપાયે શક્તિ પ્રદર્શન કર્યું હતું. ભાજપના રોડ શોમાં મુખ્યમંત્રી ભૂપેન્દ્ર પટેલ, પ્રદેશ પ્રમુખ સી આર પાટીલ સાથે અરવિંદ રૈયાણી પ્રથમ વાહનમાં સવાર હતા. ત્યારે બીજા વાહનમાં પ્રભારી મંત્રી જીતુ વાઘાણી સાથે પૂર્વમંત્રી જયેશ રાદડિયા હતા. રોડ શો દરમિયાન કાર્યકરોનો મોટી સંખ્યામાં જમાવડો થતાં કોરોના નિયમો ભુલાઈ ગયા હતા.લોકો સોશિયલ મીડિયા થ્રુ અપીલ કરી રહ્યા છે કે આવા મોટા કાર્યક્રમો ન યોજવામાં આવે.
મોટી સંખ્યામાં ભાજપ કાર્યકરો ભેગા થયા
રોડ શોમાં મોટી સંખ્યામાં કાર્યકરો સાથે લોકો પણ ઉમટ્યા હતા. ભાજપના કાર્યકરો દ્વારા 80 જેટલી જગ્યાએ પુષ્પવર્ષાથી મુખ્યમંત્રીનું સ્વાગત કરવામાં આવ્યું હતું. અઢી કિલોમીટરના રૂટ પર આ રોડ શો ફર્યો હતો. આ રોડ શો સાથે કેટલાક આકર્ષણો પણ હતાં જેમાં મુખ્યત્વે વિન્ટેજ કાર, ઘોડેસવાર સાથે યુવા ભાજપના કાર્યકરોની બાઇક રેલી પણ હતી.
કોરોના કાળમાં વિકસતી ભીડ
રાજ્યમાં રોજબરોજ કોરોનાના કેસ ડબલ થઈ રહ્યા છે.તો બીજી બાજુ જનતા પણ કોરોનાના નિયમોને નેવે મુકી રહી છે.ક્યાંક સોશિયલ ડિસ્ટન્સનો અભાવ છે, તો ક્યાંક રેલી, મેડાવળા, પ્રસંગો અને ગરબાના આયોજનો પણ થઈ રહ્યા છે. આવું જ કઈક રાજકોટમાં ભાજપના યોજાયેલા રોડ શો માં બન્યું, મોટી સંખ્યામાં ભાજપના કાર્યકરો રોડ શોમાં ઉમેટી પડ્યા, ભીડના આવા દ્રશ્યો સરકારની તમામ ગાઈડલાઇનને ઘોળીને પી રહ્યા હતા. તંત્ર એક તરફ રાત્રી કર્ફ્યૂ અને નિયમોનું પાલન કરાવાતુ હોવાના દાવા કરી રહ્યુ છે. બીજી તરફ સરકારી આયોજન અને રાજકીય કાર્યક્રમો કરી એજ નિયમો નેવે મુકાઇ રહ્યા છે. ત્યારે હવે લોકોએ ખુદ સમજવાની જરૂર છે ભીડભાડ વળી જગ્યાએ હાલની સ્થિતિએ જવાનું ટાળવાની જરૂર છે.
કોણ કોણ રહ્યું હતું હાજર
રાજકોટ માં આજના આ રોડ શોમાં મુખ્યમંત્રી ભૂપેન્દ્ર પટેલ,પૂર્વ મુખ્યમંત્રી વિજય રૂપાણી,ગૃહ રાજ્યમંત્રી હર્ષ સંઘવી,શિક્ષણમંત્રી જીતુ વાઘાણી,ગ્રામ વિકાસ અને ગૃહ નિર્માણ મંત્રી અર્જુનસિંહ ચૌહાણ,શ્રમ અને રોજગાર મંત્રી બ્રિજેશ મેરઝા,વાહનવ્યવહાર મંત્રી અરવિંદ રૈયાણી ઉપસ્થિત રહ્યા હતા.
ભાજપ કાર્યકરો સાથે મેયર બંગલે બેઠક
રોડ શો બાદ ધર્મેન્દ્રસિંહ કોલેજ ખાતે સુશાશન સપ્તાહનો કાર્યકર્મ યોજવામાં આવ્યો હતો, જ્યાં પૂર્વ સીએમ રૂપાણી, શિક્ષણ મંત્રી જીતુ વાઘાણી તેમજ સીએમ ભૂપેન્દ્ર પટેલે સંબોધન કરી ગુજરાત સરકારની કામગીરીને લોકો સુધી પહોંચાડવા હાકલ કરી હતી.હવે સીએમ ભૂપેન્દ્ર પટેલ ચૌધરી હાઇસ્કૂલમાં મુવેબલ હોસ્પિટલનું લોકાર્પણ, રૈયાધાર લાઇટ હાઉસ પ્રોજેક્ટ નિરીક્ષણ, સર્કિટ હાઉસ ભોજન બાદ મેયર બંગલા ભાજપના કાર્યકર્તાઓ સાથે સીએમ ભૂપેન્દ્ર પટેલ બેઠક કરશે.