ઍલર્ટ / ના હોય! કોરોનાની રેડ ઝોનમાં એન્ટ્રી? હવે ગમે તે ઘડીએ જાહેર થઇ શકે છે નવી ગાઇડલાઇન

• કોરોનાની નવી કડક ગાઈડલાઈન જાહેર થઈ શકે છે
• દેશમાં છેલ્લા ૨૪ કલાકમાં કોરોનાના ૬૯૯ નવા કેસ નોંધાયા 
• અભિનેત્રી-રાજકારણી કિરણ ખેર કોવિડ પોઝિટિવ

દેશમાં કોરોના સંક્રમણ હવે રેડ ઝોનમાં પ્રવેશી ચૂક્યું છે અને કોરોનાએ કેન્દ્ર સરકાર માટે ભયની ઘંટડી વગાડી દીધી છે. અહેવાલો અનુસાર કોરોનાના સંક્રમણને રોકવા કેન્દ્રીય આરોગ્ય મંત્રાલય હવે ગમે તે ઘડીએ નવા પ્રોટોકોલ સાથે નવાં નિયંત્રણો જાહેર કરી શકે છે. કોરોના વાઈરસનું સંક્રમણ જોતાં સરકાર હવે લોકો માટે ભીડભાડવાળી જગ્યાઓએ માસ્ક પહેરવાનું ફરજિયાત કરે તો પણ નવાઈ નહીં. કોરોના મુદ્દે આજકાલમાં જ મહત્ત્વની બેઠક યોજાવાની છે અને તેમાં નવી કડક ગાઈડલાઈન જાહેર થઈ શકે છે.

દરમિયાન દેશમાં છેલ્લા ૨૪ કલાકમાં કોરોનાના ૬૯૯ નવા કેસ નોંધાતાં એક્ટિવ કેસની સંખ્યા વધીને ૬,૫૫૯ થઈ છે. છેલ્લા ૨૪ કલાકમાં ૪૩૫ સંક્રમિતોએ કોરોનાને માત આપતાં અત્યાર સુધીમાં કુલ ૪,૪૧,૫૯,૬૧૭ દર્દીઓ કોરોનામુક્ત થયા છે. 

છેલ્લા ૨૪ કલાકમાં કોરોના વેક્સિનના ૭,૪૬૩ ડોઝ આપવામાં આવ્યા હતા અને આ સાથે અત્યાર સુધીમાં કુલ ૨૨૦.૬૫ કરોડ વેક્સિનના ડોઝ આપવામાં આવ્યા છે. એક્ટિવ કેસની ટકાવારી હાલ ૦.૦૧ ટકા છે અને હાલ રિકવરી રેટ ૯૮.૭૯ ટકા છે, જ્યારે ડેઈલી પોઝિટિવિટી રેટ ૦.૭૧ ટકા અને વીકલી પોઝિટિવિટી રેટ ૦.૯૧ ટકા છે. 
કેન્દ્રીય આરોગ્ય મંત્રાલયના સત્તાવાર આંકડા અનુસાર છેલ્લા ૨૪ કલાકમાં કોરોના માટે ૯૭,૮૬૬ સેમ્પલનું ટેસ્ટિંગ કરવામાં આવ્યું હતું અને આ સાથે અત્યાર સુધીમાં કુલ ૯૨.૦૪ કરોડ સેમ્પલનું ટેસ્ટિંગ થઈ ચૂક્યું છે.

વૈશ્વિક સ્તરે જોઈએ તો દુનિયાભરમાં પણ કોરોના સંક્રમણ વધી રહ્યું છે. છેલ્લા ૨૪ કલાકમાં વિશ્વમાં કોરોનાના કુલ ૬૬ હજાર નવા કેસ નોંધાયા છે.
દેશમાં કોરોનાના પોઝિટિવિટી રેટમાં પણ વધારો થઈ રહ્યો છે. દેશમાં ૧૪ જિલ્લા એવા છે, જ્યાં પોઝિટિવિટી રેટ ૧૦ ટકાથી વધુ છે. ૧૨થી ૧૮ માર્ચના ડેટાના વિશ્લેષણ પરથી જાણવા મળ્યું છે કે દેશના ૩૪ જિલ્લામાં કોરોના પોઝિટિવિટી રેટ પાંચથી ૧૦ ટકાની વચ્ચે છે. સૌથી ચિંતાજનક વાત એ છે કે ૧૪ માર્ચ સુધીમાં આવા જિલ્લાની સંખ્યા માત્ર ૧૫ હતી, જે વધીને હાલ ૩૪ થઈ ગઈ છે એટલે કે કોરોના હવે સ્પીડ પકડી રહ્યો છે. ઉત્તરપ્રદેશમાં પ્રથમ વાર એક્ટિવ કેસની સંખ્યા ૧૦૦ને વટાવી ગઈ છે.

અભિનેત્રી-રાજકારણી કિરણ ખેર કોવિડ પોઝિટિવ
પીઢ અભિનેત્રી અને રાજકારણી કિરણ ખેર કોરોનાનો શિકાર થયાં છે. બોલિવૂડના દિગ્ગજ એક્ટર અનુપમ ખેરનાં પત્ની અને અભિનેતા સિકંદર ખેરનાં માતા કિરણ ખેરે પોતાના સત્તાવાર ટ્વિટર હેન્ડલ પરથી કોરોનાને લઈને ટ્વીટ કરતાં જણાવ્યું છે કે હું કોવિડ પોઝિટિવ આવી છું, એટલા માટે જે કોઈ મારા સંપર્કમાં આવ્યાં હોય તેઓ પ્લીઝ પોતાનો ટેસ્ટ કરાવી લે. આ પોસ્ટ બાદ ફિલ્મ ઉદ્યોગના લોકો, તેમના ચાહકો અને ફોલોઅર્સે તેઓ જલદી સ્વસ્થ થાય તેવી શુભકામનાઓ વ્યક્ત કરી છે.