Coronavirus / ચીનમાં કોરોનાએ ફરી માથું ઊંચક્યું, વુહાન બાદ આ શહેરને લીધું બાનમાં

• ચીનનું ઉત્તર પૂર્વી હાર્બિન શહેર કોરોના વાયરસનું નવુ કેન્દ્ર બનતું નજરે પડી રહ્યું છે
• ચીનના વુહાન શહેરને 'કોરોના વાયરસનું જન્મસ્થાન' માનવામાં આવે છે

આ જીવલેણ મહામારીએ ચીન જ નહીં આખી દુનિયામાં કોહરામ મચાવી દીધો છે અને પોણા બે લાખથી વધારે લોકો અત્યાર સુધીમાં મોતને ભેટ્યા છે. વુહાન બાદ હવે હાર્બિન શહેરમાં કોરોના વાયરસનું નવું ક્લસ્ટર બની ગયું છે, જે બાદ ચીની સરકારે આખા શહેરને સીલ કરી દીધું છે. 

ચીનનું હાર્બિન શહેર રશિયાની બોર્ડર પાસે આવેલું છે. આ કારણે અધિકારીઓએ સાવચેતીના ભાગ રૂપે આખા ક્ષેત્રમાં કોઇપણ પ્રકારની ગતિવિધિઓ પર પૂર્ણ રીતે પ્રતિબંધ મુકી દીધો છે. 

કોરોના વાયરસની શરૂઆત ચીનના વુહાન શહેરથી થઇ હતી. મહીનાઓના લૉકડાઉન બાદ વુહાનને સંક્રમણ મુક્ત બતાવીને ચીને અહીં જનજીવન સામાન્ય બનાવી દીધું હતું. ત્યારબાદ ચીને દાવો કર્યો હતો કે તેણે કોરોના વાયરસ પર નિયંત્રણ કરી લીધું છે અને બીજા દેશોની તુલનામાં ત્યાં મોતનો આંકડો ઘણો ઓછો છે. 

ચીનના હીલૉન્ગજિયાંગ પ્રાન્તમાં કોરોના વાયરસના ફરીથી ઝડપથી ફેલાવાને કારણે ચીની સરકારે કડક પગલા ઉઠાવતા ઘણા અધિકારીઓને દંડ કર્યો હતો. તેઓને નોકરીથી હટાવી દીધા હતા. આ પ્રાન્તમાં મોટાભાગના સંક્રમણના કેસ વિદેશી લોકોમાં જોવા મળ્યા હતા. 

હાર્બિનમાં કોરોના વાયરસના નવા કેસ સામે આવ્યા બાદ શહેરમાં બહારથી આવનારા લોકો અને વાહનો પર પ્રવેશ પર રોક લગાવી દેવાઇ હતી. ચીનમાં હૉટસ્પોટ ક્ષેત્રમાં રહેતા લોકોને ફરીથી ક્વૉરન્ટાઇનમાં રાખવાનો નિર્ણય લેવાયો છે. 

રિપોર્ટ મુજબ ગત સપ્તાહે હોસ્પિટલ પહોંચેલા 35 લોકો એક 87 વર્ષના દર્દીથી હોસ્પિટલમાં સંક્રમિત જોવા મળ્યા હતા. જે બાદ હાર્બિન શહેરને નવું કોરોના ક્લસ્ટર માનવામાં આવી રહ્યું છે. આ શહેરની વસ્તી એક કરોડથી વધારે છે. હાર્બિનની તમામ સ્કૂલો અને કોલેજોને હાલ બંધ કરી દેવાઇ છે. 

ચીનના નેશનલ હેલ્થ કમિશન મુજબ બુધવારે હીલૉન્ગજિયાંગ પ્રાન્તમાં 537 સંક્રમિત મામલાઓની પુષ્ટી થઇ ચૂકી છે. તેમાંથી 384 લોકો બહારથી આવ્યા હતા.