દેશમાં કોરોના વાયરસના કારણે તહેવારના રંગમાં ભંગ થયો છે.
દેશમાં સતત વધી રહ્યા છે કોરોના વાયરસના કેસ
મહારાષ્ટ્રમાં એક દિવસમાં 40 હજાર કેસ
દિલ્હીમાં પણ કોરોનાએ રેકોર્ડ તોડ્યો
હોળી પહેલા કોરોના વાયરસ મહામારીએ પોતાનો ભયાનક રંગ દેખાડ્યો છે. રાષ્ટ્રીય રાજધાની દિલ્હી અને આર્થિક રાજધાની મુંબઈના હાલ બેહાલ છે ત્યારે રવિવારે રેકોર્ડબ્રેક કેસ સામે આવ્યા છે.
મહારાષ્ટ્રના હાલ બેહાલ
મહારાષ્ટ્રમાં રવિવારે 40, 414 નવા કોરોના વાયરસના કેસ સામે આવ્યા છે ત્યારે કુલ સંક્રમિતોની સંખ્યા 27,13,875 થઈ ગઈ છે. રાજ્યમાં એક દિવસમાં 108 લોકોના મોત બાદ મોતનો કુલ આંક 54,181 પર પહોંચ્યો છે. મહારાષ્ટ્રના મુંબઈમાં એક દિવસમાં 6,933 કોરોના કેસ સામે આવ્યા છે અને આઠ દર્દીઓએ જીવ ગુમાવ્યા. જોકે મહારાષ્ટ્રમાં એક દિવસમાં 17,874 લોકો કોરોના વાયરસથી સાજા પણ થયા છે.
દિલ્હીમાં પણ કોરોના બેકાબૂ
દિલ્હીમાં પણ કોરોના વાયરસના કેસ દરરોજ રેકોર્ડ તોડી રહ્યા છે. રવિવારે દિલ્હીમાં 1800 કેસ સામે આવ્યા છે જે છેલ્લા સાડા ત્રણ મહિનાના સૌથી વધારે કેસ છે. આ સાથે જ એક દિવસમાં 9 દર્દીઓના મોત પણ થયા છે. આજે હોળી-ધૂળેટીના તહેવાર પર પણ દિલ્હી અને મહારાષ્ટ્ર બંને જગ્યાઑ પર પ્રતિબંધો લગાવી દેવામાં આવ્યા છે.
લોકડાઉનની તૈયારી કરવાના આદેશ
નોંધનીય છે કે કોરોના વાયરસ સંક્રમણને જોતાં મહારાષ્ટ્રના મુખ્યમંત્રી ઉદ્ધવ ઠાકરેએ રવિવારે મહત્વના આદેશ આપ્યા હતા. ઠાકરેએ અધિકારીઓને લોકડાઉન જેવા પ્રતિબંધોનો રોડ મેપ તૈયાર કરી દેવાના આદેશ આપ્યા છે. મુખ્યમંત્રીએ એવા લોકડાઉન કરવા કહ્યું છે કે જેનાથી અર્થતંત્ર ઓછું પ્રભાવિત થાય.