લૉકડાઉન / ભૂખ આગળ મજબૂર શ્રમિકો, રેલવે સ્ટેશન પર લૂંટી લીધુ વેન્ડિંગ મશીન

જબલપુર રેલવે સ્ટેશન પર ભૂખમરાને કારણે બેહાલ લોકો એક ફૂડ વેન્ડિંગ મશીન પર તુટી પડ્યા અને ખાવા-પીવાની વસ્તુઓ લૂટવા લાગ્યા. આ ઘટનાનો એક વીડિયો સોશિયલ મીડિયા પર વાયરલ થઇ રહ્યો છે. 

ખરેખર તો શ્રમિકોને લઇને બેંગલુરુથી હાજીપુર જનારી સ્પેશિયલ ટ્રેનને થોડીવાર માટે જબલપુર રેલવે સ્ટેશન પર રોકવામાં આવી હતી. ટ્રેનમાં હાજર સેંકડો મજૂરો રેલવે તરફથી મળતા ભોજનની રાહ જોઇ રહ્યા હતા. જ્યારે તેમને લાંબો સમય વિત્યા બાદ પણ ભોજન ન મળ્યું તો તેમની સહનશક્તિ ખુટી પડી હતી. પ્રવાસી મજૂરો સ્ટેશન પર લાગેલા ફૂડ વેન્ડિંગ મશીનને તોડીને ખાવા-પીવાની વસ્તુઓ લૂટવા લાગ્યા હતા. જેને જે હાથમાં લાગ્યું તે લઇને ટ્રેનમાં સવાર થઇ ગયા. 

આ દરમિયાન સ્ટેશન પર અફરા-તફરી મચી ગઇ અને ખાવાની વસ્તુઓની લૂટમાં સોશિયલ ડિસ્ટેન્સિંગના લીરે લીરા ઉડ્યા. આટલુ જ નહીં લોકો એકબીજાના સામાન માટે મારામારી કરતા નજરે પડ્યા. 

આ હંગામાનો એક વીડિયો વાયરલ થયા બાદ રેલ તંત્રમાં હડકંપ મચી ગયો. પોલીસને લઇને આરપીએફના જવાન ઘટના સ્થળે પહોંચી ગયા હતા, જોકે ત્યાં સુધીમાં ટ્રેન આગળ વધી ચૂકી હતી. 

જ્યારે વેન્ડિંગ મશીનના કર્મચારીએ જીઆરપી સ્ટેશનમાં ફરિયાદ કરી નુકશાનની ભરપાઇ કરવા માંગ કરી છે. જીઆરપીએ કર્મચારીની ફરિયાદ પર અજ્ઞાત લોકો વિરુદ્ધ કેસ નોંધ્યો છે. કંઇક આવો જ મામલો થોડા દિવસ પહેલા કટિહાર રેલવે સ્ટેશન પર જોવા મળ્યો હતો. જ્યાં ખાવાના પેકેટ માટે મજૂરો વચ્ચે લૂટફાટ જોવા મળી હતી.