ઉદ્યોગને ફટકો / કોરોના વાયરસને કારણે સુરતનો આ ચમકતો ઉદ્યોગ ઝાંખો પડ્યો, નુકસાનનો આંકડો ચોંકાવનારો

• ખેડૂતો સસ્તા ભાવે કપાસ વેચવા મજબુર
• કોરોનાની અસર ડાયમંડ ઉદ્યોગ પર
• ચીન સાથે એક્સપોર્ટ ઠપ્પ

ચીનના કોરોના વાયરસની સુરતના ડાયમંડ ઉદ્યોગ પર માઠી અસર પડી છે. મહત્વનું છે કે, સુરતના ડાયમંડ ચીનમાં એક્સપોર્ટ થાય છે. સુરતનો એક્સપોર્ટનો 37% વ્યાપાર હોગકોંગ અને ચીન સાથે છે. જો કે હાલ કોરોના વાયરસના કારણે બંને એક્સપોર્ટ ઠપ્પ થઇ જતાં હાલ ડાયમંડ ઉદ્યોગમાં ચિંતાનું મોજું ફરી વળ્યું છે. આ સ્થિતિ માર્ચ માસ સુધી રહે તેવી શક્યતા જોવાઇ રહી છે. 3 માસમાં અંદાજીત 2 હજાર કરોડોનો ફટકો પડે તેવી શક્યતા જોવાઇ રહી છે. મંદીની સાથે કોરોના વાયરસથી ડાયમંડ ઉદ્યોગને ડબલ ફટકો પડ્યો છે.

કોટનમાં 150થી 200 રૂપિયા જેટલો ઘટાડો 

બીજી તરફ કોટન માર્કેટમાં હાલ મંદીનો માહોલ હોવા ઉપરાંત કોરોના વાયરસને લઇ હાલ કોટનની ઘાસડીઓની નિકાસ થઇ શક્તિ નથી, જેના કારણે કોટન ખરીદતા વેપારીઓનાં ગોડાઉનમાં કોટનના ઢગલા થઇ ગયા છે છેલ્લા અઠવાડિયામાં કોટનમાં 150થી 200 રૂપિયા જેટલો ઘટાડો થઇ ગયો છે. જેના કારણે હાલ કોટનનાં ભાવ ઓછા પડી રહ્યા છે.

ખેડૂતોને પ્રતિ 20 કિલોએ 120થી 200 રૂપિયા નુકશાન

અરવલ્લી જીલ્લામાં ગત ખરીફ સીઝન દરમિયાન જીલ્લાની 33 હજાર હેક્ટર જમીનમાં ખેડૂતોએ કપાસનું વાવેતર કર્યું હતું. વાવેતર બાદ સતત વરસેલા વરસાદ અને કમોસમી વરસાદથી કપાસના પાકને નુકસાન થયું હતું. તેમ છતાં બાકી બચેલો પાક તૈયાર થઇ જતા હાલ ખેડૂતો માર્કેટમાં વેચવા માટે આવી રહ્યા છે. મોડાસા માર્કેટ યાર્ડ ખાતે હાલ રોજની ૧૦૦ ક્વિન્ટલ કપાસની આવક ચાલુ થઇ છે. બીજી તરફ કપાસ માટે સરકારે એમએસપી ( સામાન્ય વેચાણ ભાવ ) ભાવ 1100 બાંધ્યો છે પણ ટેકાના ભાવે ખરીદવામાં આવતો નથી. જેના કારણે હાલ ખેડૂતો પોતાનો મહામુલો કપાસનો પાક માર્કેટમાં 900થી 980નાં સસ્તા ભાવે વેચી રહ્યા છે. ખેડૂતોને હાલ માર્કેટમાં સરકારે નક્કી કરેલો 1100નો ભાવ મળતો નથી જેથી ખેડૂતને હાલ પ્રતિ 20 કિલો પાછળ 120થી 200 રૂપિયા ઓછા મળી રહ્યા છે. જેથી ખેડૂત પરેશાન છે અને સરકાર દ્વારા અન્ય પાકોની જેમ કપાસની પણ ટેકાના ભાવે ખરીદી કરી પોષણક્ષમ ભાવ ચૂકવાય તેવી માંગ ખેડૂતો કરી રહ્યા છે.