કોરોના વાયરસ ઇફેક્ટ / ચીનથી આવતી વસ્તુઓ બંધ થતાં, ધમધમતો આ ઉદ્યોગ મુશ્કેલીમાં મુકાયો

• ડિઝાઈનર વેર સહિત વર્કવાળાં કાપડ મોંઘાં થયાં
• કાપડ માર્કેટમાં સ્ટોનવાળાં કપડાંની વધુ ડિમાન્ડ હોય છે
• વેપારીઓની હાલત વધુ ખરાબ થવાની શક્યતા છે

ચીનથી આવતા સામાન પર બ્રેક લાગતાં કાપડના વેપારીઓ મુશ્કેલીમાં મુકાયા છે

ચીનમાં  હાહાકાર મચાવી રહેલા  કોરાના વાઈરસની અસર હવે અમદાવાદ સહિત રાજ્યભરના ટેક્સટાઈલ ઉદ્યોગ પર પણ પડી છે. ચીનથી આવતા સામાન પર બ્રેક લાગતાં કાપડના વેપારીઓ મુશ્કેલીમાં મુકાયા છે. સાડી, વેડિંગ ડ્રેસ બ્રાઈડ-ગ્રૂમ અને ડિઝાઈનર કપડાંમાં લગાવવામાં આવતા સ્ટોનની આયાત બંધ થતાં સ્ટોનના ભાવમાં રાતોરાત દોઢ ગણો વધારો થતાં હવે ઝરી અને વર્કવાળાં આઉટફિટના ભાવમાં પણ વધારો થયો છે. 

૯૯ ટકા  સ્ટોનનો ઉપયોગ ચીનથી આવતા સ્ટોનનો થાય

૯૯ ટકા  સ્ટોનનો ઉપયોગ ચીનથી આવતા સ્ટોનનો થાય છે. ડિઝાઈનર વેરમાં  ૧ એમએમથી લઈને ૧૦ એમએમ સુધીના સ્ટોનનો ઉપયોગ કરવામાં આવે છે, જેની આયાત અટકી  છે. છેલ્લા એક અઠવાડિયાથી સ્ટોન ન આવવાના કારણે સ્ટોનના ભાવમાં દોઢ ગણો વધારો થઈ ગયો છે. શહેરના કાપડ માર્કેટમાં સ્ટોનવાળી સાડી, ચોલીઓ મોંઘા ભાવે વેચાય છે. વેપારીઓને સ્ટોન મળી રહ્યા નથી. ચીનથી ઝડપથી સ્ટોન ન આવે તો વેપારીઓની હાલત વધુ ખરાબ થવાની શક્યતા છે, જેથી વર્ક કરેલાં કપડાંની કિંમત આગામી સમયમાં વધી જશે.

શેરવાની અને ડ્રેસમાં ૮૦ ટકા સ્ટોન લગાવાય છે

કાપડના વેપારીએ જણાવ્યું હતું કે અમદાવાદમાં બનતી મોંઘી સાડી, લહેંગા ચોલી, બ્લાઉઝ, શેરવાની અને ડ્રેસમાં ૮૦ ટકા સ્ટોન લગાવાય છે. સ્ટોન લગાવ્યા વિના કપડાંનો લૂક સારો ન થતાં વેચાણ પણ ઓછું થાય છે. કાપડ માર્કેટમાં સ્ટોનવાળાં કપડાંની વધુ ડિમાન્ડ હોય છે. ચીનના સ્ટોનની સરખામણીએ ભારતમાં બનતા સ્ટોન બે ગણા મોંઘા છે. ૧ થી ૧૦ એમએમના ચીનના સ્ટોનની કિંમત સાડા ત્રણથી ૧૦ રૂપિયા સુધી છે, જ્યારે તેમની તુલનાએ ભારતના સ્ટોન ૭ રૂપિયાથી લઈ ર૦ રૂપિયા સુધીના છે, જેથી વેપારીઓ ચીનના સ્ટોનનો જ ઉપયોગ કરે છે. કાપડ માર્કેટમાં માત્ર ૧ ટકા જ ભારતમાં બનતા સ્ટોનનો ઉપયોગ કરવામાં આવે છે.