મહામારી / કોરોનાની બેકાબૂ રફ્તાર : 5 મહિના બાદ ફરી એક દિવસમાં 50 હજારથી વધારે કેસ, એક્ટિવ કેસનો આંક ચિંતાજનક

• ભારતમાં કોરોનાનો વધતો કહેર 
• ફરી 50 હજારથી વધારે કેસ 
• સૌથી વધારે ચિંતા મહારાષ્ટ્રમાં વધી 

ભારતમાં કોરોના વાયરસના કેસની રફતાર હવે બેકાબૂ થઈ ગઈ છે. માર્ચ મહિનાની શરૂઆતથી જ કેસ વધવાની શરૂઆત થઈ ગઈ હતી અને આ વધારો હવે રોકવાનું નામ નથી લઈ રહ્યો. ભારતમાં કોરોના વાયરસના વધતાં કેસ દરરોજ રેકોર્ડ તોડી રહ્યા છે ત્યારે આજે જે આંકડાઓ સામે આવ્યા છે તે બિહામણાં છે. 

કોરોના વાયરસ કેસ અપડેટ : 

ભારતમાં છેલ્લા 24 કલાકમાં 50 હજારથી વધારે કેસ સામે આવ્યા છે. પાંચ મહિના બાદ દેશમાં એક સાથે આટલા બધા કેસ સામે આવ્યા છે. ગુરુવારે જાહેર કરવામાં આવેલા આંકડા અનુસાર ભારતમાં કે દિવસમાં 53,364 નવા કોરોના વાયરસના કેસ સામે આવ્યા છે જ્યારે 250 દર્દીઓના મોત થઈ ગયા છે. આ પહેલા ઓકટોબર મહિનામાં આવા આંકડા સામે આવ્યા હતા. 

એક્ટિવ કેસ વધ્યા 

કોરોના વાયરસના કેસમાં જે સ્પીડે વધારો આવ્યો છે સામે તેટલા દર્દીઑ સાજા નથી થઈ રહ્યા. પરિણામે એક્ટિવ કેસની સંખ્યા પણ વધી રહી છે. ભારતમાં કોરોના વાયરસના એક્ટિવ કેસની સંખ્યા વધીને ચાર લાખને પાર થઈ ગઈ છે. 

મહારાષ્ટ્રમાં મહામારી વીફરી 

દેશમાં સૌથી વધારે કોરોના વાયરસના કેસ મહારાષ્ટ્રમાંથી સામે આવી રહ્યા છે જ્યાં એક દિવસમાં 31 હજાર કોરોના વાયરસના કેસ નોંધાયા છે. મહારાષ્ટ્રના કેટલાય જિલ્લાઓમાં લોકડાઉન કરી દેવામાં આવ્યું છે. ઘણા બધા શહેરોમાં વીકેન્ડ લોકડાઉન અને કેટલાય શહેરોમાં નાઈટ કર્ફ્યૂ કરી દેવામાં આવ્યું છે ત્યારે મહારાષ્ટ્રમાં કોરોના વાયરસના કેસની સંખ્યા એક્ટિવ કેસ વધીને અઢી લાખને પાર થઈ ગઈ છે. 

અન્ય રાજ્યોમાં પણ વધી ચિંતા 

મહારાષ્ટ્રની સાથે સાથે કર્ણાટક, આંધ્રપ્રદેશ, તમિલનાડુ, પશ્ચિમ બંગાળમાં પણ કોરોના વાયરસના કારણે ટેન્શન વધી રહ્યું છે. યુપીમાં પણ જાન્યુઆરી બાદ પહેલીવાર 700થી વધારે કેસ સામે આવ્યા છે.