હેલ્થ વિભાગ તેના સત્તાવાર કેસના આંકડા અને મૃત્યુની વિગતને ઇરાદાપૂર્વક છુપાવી રહ્યો હોવાના અવારનવાર ગંભીર આક્ષેપ ઊઠ્યા હતા.
તંત્ર સામે ઢાંકપિછોડો કરવાના આક્ષેપ
વેક્સિનની આડઅસર થવાની દહેશતથી અનેક હેલ્થ વર્કર્સ વેક્સિનેશનથી અળગા
વાસ્તવિક ચિત્ર રજૂ કરાતું નથી તે પણ ખરેખર શરમજનક બાબત
કોરોના મહામારીને લઈ પ્રારંભથી શહેરીજનોમાં ભારે દહેશત ફેલાઈ હતી. મે-જૂનની કોરોનાની ફર્સ્ટ વેવનો હાહાકાર કહો કે દિવાળી બાદના દિવસોમાં ફેલાયેલી કોરોનાની સેકન્ડ વેવનો આતંક ગણો, પરંતુ મ્યુનિ. હેલ્થ વિભાગ તેના સત્તાવાર કેસના આંકડા અને મૃત્યુની વિગતને ઇરાદાપૂર્વક છુપાવી રહ્યો હોવાના અવારનવાર ગંભીર આક્ષેપ ઊઠ્યા હતા.
વેક્સિનની આડઅસર થવાની દહેશતથી અનેક હેલ્થ વર્કર્સ વેક્સિનેશનથી અળગા
અમદાવાદીઓ સમક્ષ એક રીતે કોરોનાના વાસ્તવિક ચિત્રને હેલ્થ વિભાગે ભાગ્યે જ રજૂ કર્યું છે તેવી બૂમો તો શાસક ભાજપમાં તત્કાલીન ચૂંટાયેલી પાંખે પણ પાડી છે. હવે જ્યારે કોરોનાની વેક્સિન અપાવવાનું અભિયાન હાથ ધરાયું છે. આ અભિયાન લોકોના અણમોલ જીવનને બચાવી લેવા માટે પ્રશંસનીય છે. તેમ છતાં ફર્સ્ટ ફેઝમાં વેક્સિનની આડઅસર થવાની દહેશતથી અનેક હેલ્થ વર્કર્સ વેક્સિનેશનથી અળગા રહ્યા હતા.
તંત્ર સામે ઢાંકપિછોડો કરવાના આક્ષેપ
હવે જ્યારે સેકન્ડ ફેઝમાં ફ્રન્ટલાઇન વોરિયર્સને વેક્સિનેશન શરૂ કરાયું છે તો તેમાં સત્તાધીશો પરાણે વેક્સિન મુકાવવા એક અથવા બીજા પ્રકારની પ્રેશર ટેકનિક અજમાવી રહ્યા હોવાનું મ્યુનિ. વર્તુળોમાં ચર્ચાઈ રહ્યું છે, જોકે છેલ્લા કેટલાક દિવસથી વેક્સિનેશનને લઈ હેલ્થ વિભાગ આંકડાકીય માહિતી આપી રહ્યો ન હોઈ તેમાં પણ તંત્ર સામે ઢાંકપિછોડો કરવાના આક્ષેપ ઊઠ્યા છે.
વાસ્તવિક ચિત્ર રજૂ કરાતું નથી તે પણ ખરેખર શરમજનક બાબત
એક અંદાજ પ્રમાણે શહેરમાં આજની સ્થિતિએ કુલ ૫૮ હજાર હેલ્થ વર્કર્સ અને ફ્રન્ટલાઇન વર્કર્સ વેક્સિન મુકાવી ચૂક્યા છે, જોકે હેલ્થ વિભાગ દ્વારા વેક્સિનેશન જેવા ઉમદા અભિયાનમાં પણ નાગરિકોને વિશ્વાસમાં લઈ વાસ્તવિક ચિત્ર રજૂ કરાતું નથી તે પણ ખરેખર શરમજનક બાબત છે.
સીધું કે આડકતરું દબાણ ઊભું કરી રહ્યા હોવાનું ચર્ચાઈ
હવે જ્યારે મ્યુનિ. તંત્રના કુલ ૨૯,૯૪૫ કર્મચારીનું વેક્સિનેશન શરૂ કરાયું છે તો તેમાં અનેક આક્ષેપ ઊઠી રહ્યા છે. મ્યુનિ. તંત્રના કમિશનર, ડેપ્યુટી કમિશનર, જે તે વિભાગના વડા સહિતના વર્ગ-૧ અને વર્ગ-૨ના કર્મચારીનું વેક્સિનેશન સરળતાથી થયું છે, પરંતુ વર્ગ-૩ના ક્લેરિકલ સ્ટાફ અને વર્ગ-૪ના પટાવાળા, વોચમેન, ડ્રાઇવર, સફાઈ કર્મચારીઓના વેક્સિનેશનમાં સત્તાવાળાઓ સીધું કે આડકતરું દબાણ ઊભું કરી રહ્યા હોવાનું ચર્ચાઈ રહ્યું છે.
ઉચ્ચ અધિકારીઓ વેક્સિન લો, નહીંતર અન્યત્ર બદલી માટે તૈયાર રહો તેવી ચીમકી
ખમાસા-દાણાપીઠ ખાતેના મ્યુનિ. મુખ્યાલયમાં વોચમેન કેબિન પાસે કે શિવ મંદિરના પ્રાંગણમાં કર્મચારીઓ ટોળે વળીને તેમના વિભાગના વડા વેક્સિનને ફરજિયાત લેવા પ્રેશર ટેકનિક અજમાવતા હોવાનું ખુલ્લેઆમ કહી રહ્યા છે. ઉચ્ચ અધિકારીઓ વેક્સિન લો, નહીંતર અન્યત્ર બદલી માટે તૈયાર રહો તેવી ચીમકી આપી રહ્યા છે. કેટલાક તો નોકરીમાંથી બરખાસ્ત કરવાનો દમ પણ મારતા હોઈ અનેક કર્મચારીઓમાં રોષ ફેલાયો છે. સફાઈ કર્મચારીઓનો મોટો વર્ગ તો વડોદરામાં વેક્સિન લીધા બાદ એક કર્મચારીનું મોત થવાથી અનેક દબાણ વચ્ચે વેક્સિન લેવા તૈયાર થતો નથી.
વર્ગ-૩ અને ચારના અનેક કર્મચારીઓમાં તંત્રની પ્રેશર ટેકનિક સામે છૂપો રોષ ભભૂકી રહ્યો
સોલિડ વેસ્ટ મેનેજમેન્ટના સૌથી વધુ ૧૩,૯૮૦ કર્મચારી છે, ત્યાર બાદ સ્કૂલબોર્ડના ૪૮૧૬, બીઆરટીએસના ૨૧૪૭, ઈજનેરના ૧૮૦૨, એએમટીએસના ૧૫૫૯, સીએનસીડીના ૨૫૨, ઈ-ગવર્નન્સના ૪૩૨, એસ્ટેટ-ટીડીઓના ૫૨૯, ફાયર બ્રિગેડના ૫૦૪, બગીચા વિભાગના ૨૮૯, યુસીડીના ૨૩૭, ટેક્સ વિભાગના ૪૭૩, સિક્યોરિટી વિભાગના ૭૫૯, ચૂ્ંટણી શાખાના ૬૫, નાણાં વિભાગના ૮૪, સાબરમતી રિવરફ્રન્ટના ૫૮, વિજિલન્સના ૩૩, લાઇટ વિભાગના ૮૬, કમિશનર અને સેન્ટ્રલ ઓફિસના ૧૯૫, કાંકરિયા લેકફ્રન્ટના ૧૨૦, સેક્રેટરી ઓફિસના ૬૬, પબ્લિસિટીના ૧૯ અને પ્લાનિંગના ૨૯ એમ કુલ ૪૫ વિભાગના ૨૯,૯૪૫ કર્મચારી પૈકી વર્ગ-૩ અને ચારના અનેક કર્મચારીઓમાં તંત્રની પ્રેશર ટેકનિક સામે છૂપો રોષ ભભૂકી રહ્યો છે.
મ્યુનિ. તંત્રમાં કોન્ટ્રાક્ટર રાજ હોઈ સિવિક સેન્ટર જેવા અન્ય વિભાગમાં કોન્ટ્રાક્ટ પરના કર્મચારીઓ પર વેક્સિન લેવા માટે સીધું કે આડકતરું દબાણ થઈ રહ્યું છે. હેલ્થ વિભાગની દબાણનીતિ સામે રોડ ખાતાના અમુક ઈજનેર પણ અકળાઈ ઊઠ્યા છે.
૧ માર્ચની પહેલાં સિનિયર સિટીઝનનો થર્ડ ફેઝ ચાલુ થઈ જાય તેવી પણ શક્યતા
બીજી તરફ તંત્રનો એવો દાવો છે કે એક પણ વિભાગ દ્વારા તેમના કર્મચારી ઉપર વેક્સિન ફરજિયાત લેવાનો પરિપત્ર કરાયો નથી. આમાં તો નૈતિકતાના ધોરણથી વેક્સિન લેવાની છે. હવે તો સફાઈ કર્મચારીઓ પણ ડર છોડીને ધીમે ધીમે વેક્સિન માટે આગળ આવી રહ્યા છે, જે પ્રકારે વેક્સિનેશનની કામગીરી ચાલી રહી છે તેને જોતાં તા. ૧ માર્ચની પહેલાં સિનિયર સિટીઝનનો થર્ડ ફેઝ ચાલુ થઈ જાય તેવી પણ શક્યતા છે.