રસીકરણ / અમદાવાદીઓ કેમ રસીકરણ મામલે દાખવી રહ્યા છે આળસ, 50 ટકા ટાર્ગેટ પણ પૂરો નથી થયો

• ૨૩૭ સેન્ટર હોવા છતાં ટાર્ગેટ અધુરો
• દરરોજ ૩૦ હજાર સિનિયર સિટીઝનને વેક્સિન આપવાનો ટાર્ગેટ
• સિટીઝનના વેક્સિનેશનનો 50 ટકા ટાર્ગેટ પણ પૂરો થતો નથી

મ્યુનિ. કોર્પોરેશનના સત્તાવાળાઓ દ્વારા ગત તા. ૧ માર્ચથી સિનિયર સિટીઝન અને કોમોર્બિડ કન્ડિશન ધરાવતા નાગરિકોને કોરોનાની વેક્સિન આપવાનો પ્રારંભ કરાયો હતો. તે વખતે ૭૪ અર્બન હેલ્થ સેન્ટર અને આઠ કોમ્યુનિટી હેલ્થ સેન્ટરમાં તંત્ર દ્વારા ફ્રી વેક્સિન અપાઈ રહી હતી. વેક્સિનેશન પહેલાં સિનિયર સિટીઝનની વ્યાખ્યામાં ૫૦ વર્ષ અને તેની ઉપરના નાગરિકોનો સમાવેશ કરાયો હતો.

કેન્દ્રની નવી ગાઇડલાઇનથી ૬૦ વર્ષ કે તેથી ઉપરના નાગરિકોનો સિનિયર સિટીઝનમાં સમાવેશ કરાયો છે એટલે ૫૦થી ૬૦ વર્ષની વચ્ચેના નાગરિકોના નામનો સિનિયર સિટીઝનની યાદીમાંથી છેદ ઊડી ગયો છે, જોકે સિનિયર સિટીઝનના વેક્સિનેશનનો ૫૦ ટકા ટાર્ગેટ પણ પૂરો થતો ન હોઈ આ બાબતે નવો વિવાદ ઊભો કર્યો છે.

સિનિયર સિટીઝનને વેક્સિન આપવા પર ભાર મૂક્યો

આમ તો ૪૫થી ૫૯ વર્ષના કોમોર્બિડ સ્થિતિ ધરાવતા દર્દીઓને ફ્રીમાં વેક્સિન આપવાના જૂના માપદંડમાં કોઈ ફેરફાર કરાયો નથી, પરંતુ સાત લાખથી વધુ સિનિયર સિટીઝનને વેક્સિન આપવાના મામલે વિવાદ ઊભો થયો છે. વડાપ્રધાન નરેન્દ્ર મોદીના આદેશથી ગત તા. ૧૭ માર્ચથી મ્યુનિ. સત્તાધીશોએ વધુ ને વધુ સિનિયર સિટીઝનને વેક્સિન આપવા પર ભાર મૂક્યો હતો.

૨૨૬ વેક્સિનેશન સેન્ટર ઊભાં કરાયાં હતાં

જેના કારણે ટાગોર હોલ, સાયન્સ સિટીનું વિજ્ઞાન ભવન, દીનદયાલ ઉપાધ્યાય હોલ, મંગળ પાંડે હોલ સહિતના સાત કોમ્યુનિટી હોલ, ૬૧ મ્યુનિ. શાળા, ૭૫ અર્બન હેલ્થ સેન્ટર, ૬૧ મ્યુનિ. શાળા, સાત કોમ્યુનિટી હેલ્થ સેન્ટર, ૧૩ સરકારી હોસ્પિટલ અને ૬૪ ખાનગી હોસ્પિટલ મળીને સિનિયર સિટીઝનને વેક્સિન આપવા માટે ૨૨૬ વેક્સિનેશન સેન્ટર ઊભાં કરાયાં હતાં. 
 
કોમોર્બિડ સ્થિતિ ધરાવતા ૧૮૨૫ દર્દીને જ વેક્સિનેશનનો લાભ મળ્યો

મ્યુનિ. સત્તાધીશોએ દરરોજ ૩૦ હજાર સિનિયર સિટીઝનને વેક્સિન આપવાનો ટાર્ગેટ નક્કી કર્યો હતો. તેમ છતાં ૫૭૨૮ પુરુષ અને ૫૨૦૭ સ્ત્રી સિનિયર સિટીઝન મળીને તે દિવસે માત્ર ૧૦,૯૩૫ સિનિયર સિટીઝનને વેક્સિન આપી શકાઈ હતી. કોમોર્બિડ સ્થિતિ ધરાવતા ૧૮૨૫ દર્દીને જ વેક્સિનેશનનો લાભ મળ્યો હતો.

ગત તા. ૧૮ માર્ચે ૪૯૪૮ પુરુષ અને ૪૫૪૯ સ્ત્રી મળીને કુલ ૯૪૯૭ સિનિયર સિટીઝન અને ૧૮૪૩ કોમોર્બિડ સ્થિતિ ધરાવતા દર્દી મળીને કુલ ૧૫,૪૬૪નું વેક્સિનેશન કરાયું હતું. જ્યારે ગત તા. ૧૯ માર્ચ પણ માત્ર ૧૫,૧૩૬ લોકોને વેક્સિનેશન કરાયું હતું,  જેમાં ફક્ત ૯૧૨૧ સિનિયર સિટીઝન હતા.

સત્તાધીશોએ દૈનિક ૩૦ હજાર વેક્સિનેશનનો ટાર્ગેટ નક્કી કર્યો

ગઈ કાલ તા. ૨૨ માર્ચે તો વેક્સિનેશનની સંખ્યા ઘટીને ૧૨,૨૬૩ થઈ હતી, જેમાં ૪૧૦૧ પુરુષ અને ૩૭૫૫ સ્ત્રી મળીને કુલ ૭૮૫૬ સિનિયર  સિટીઝન હતા એટલે કે સત્તાધીશોએ દૈનિક ૩૦ હજાર વેક્સિનેશનનો ટાર્ગેટ નક્કી કર્યો હોવા છતાં તે ટાર્ગેટ હજુ સુધી પૂરો થયો નથી તેમ ખુદ તંત્રના સત્તાવાર આંકડાથી પુરવાર થઈ રહ્યું છે.

વગદાર લોકોની ઓળખાણ-પિછાણ ધરાવતાને વેક્સિન અપાઈ

વેક્સિનેશનનો ટાર્ગેટ અધૂરો રહેવા પાછળ તંત્ર પાસે પૂરતી સંખ્યામાં વેક્સિન ન હોવાનું પણ ચર્ચાઈ રહ્યું છે. મ્યુનિ. કોર્પોરેશન હવે વેક્સિનની ડિમાન્ડ મુજબ તેના ઓછા સપ્લાયથી પરેશાન છે, જેના કારણે પશ્ચિમ અમદાવાદનાં અમુક સેન્ટરમાં તો ૫૦થી વધારે સિનિયર સિટીઝનનું વેક્સિનેશન થતું નથી. સવારના પાંચ વાગ્યાથી સિનિયર સિટીઝનને વેક્સિનનું ટોકન આપીને બેસાડી રખાય છે, પરંતુ તેમનો વારો આવે તે પહેલાં વગદાર લોકોની ઓળખાણ-પિછાણ ધરાવતાને વેક્સિન અપાઈ જાય છે. વેક્સિન લેવા આવનારા અનેક સિનિયર સિટીઝનને ગરમી શરૂ થતાં પીવાના પાણીની જરૂર પડે છે, જોકે તેની વ્યવસ્થા પણ રખાઈ નથી.

૩૧ માર્ચથી સિનિયર સિટીઝનને વેક્સિનનો બીજો ડોઝ અપાશે

હવે આગામી તા. ૩૧ માર્ચથી સિનિયર સિટીઝનને વેક્સિનનો બીજો ડોઝ અપાશે. અત્યાર સુધીમાં ૧.૫૦ લાખથી વધુ સિનિયર સિટીઝનને વેક્સિન અપાઈ હોવાનો તત્રનો દાવો છે, જોકે તેમાં હજુ વધુ ગતિ લાવવી પડશે તેમાં કોઈ વાદ-વિવાદને અવકાશ નથી.