માનવતાને નેવે મુકીને મહામારીમાં ઉઘાડી લૂંટ ચલાવતી અમદાવાદની ખાનગી હોસ્પિટલનો પર્દાફાશ થયો છે. જ્યારથી કોરોના આવ્યો છે અને પ્રાઈવેટ હોસ્પિટલોને કોરોનાની સારવાર માટે છૂટ મળી છે ત્યારથી હોસ્પિટલોએ સારવારના નામે લૂંટવાના ધંધા શરૂ કરી દીધી છે. આવો જ એક કિસ્સો અમદાવાદમાં સામે આવ્યો છે. જ્યાં એક ખાનગી હોસ્પિટલે તો દર્દીની સારવારનું લાખો રૂપિયા બિલ તો લીધું જ પરંતુ તેની સાથે-સાથે 4 દિવસનું વધારે બિલ પણ લીધું. ત્યારે જુઓ કઈ છે આ લૂંટ ચલાવતી હોસ્પિટલ...
કોરોનાની સારવારના નામે લૂંટનો ધંધો
ખાનગી હોસ્પિટલોએ શરૂ કર્યું લોકોને લૂંટવાનું
અમદાવાદની તપન હોસ્પિટલે ચલાવી ઉઘાડી લૂંટ
કોરોના જાણે લૂંટનું સાધન બની ગયો છે. કારણ કે, એક તરફ લોકો મહામારીથી બચવા માટે હોસ્પિટલોમાં દાખલ થઈ રહ્યા છે. તો બીજી તરફ હોસ્પિટલો ઉઘાડી લૂંટ ચલાવી રહી છે. આવી જ લૂંટ અમદાવાદની જાણિતી તપન હોસ્પિટલ કરી રહી છે. કારણ કે, હોસ્પિટલે એક દર્દીના મૃત્યુ બાદ તેના પરિવાર પાસેથી 4 દિવસના વધુ પૈસા વસુલ્યા છે. તે પણ અમદાવાદ મ્યુનિસિપલ કોર્પોરેશનના તમામ નિયમો નેવે મુકી સરકારની ગાઈડ લાઈનોનું ઉલ્લંઘન કરી રહી છે.
દર્દીના મૃત્યુ બાદ 4 દિવસના વધુ વસુલ્યા પૈસા
ગોતાના 67 વર્ષિય પ્રહલાદભાઈ પટેલ કોરોના પોઝિટિવ આવતા તેમને 14 નવેમ્બરે તપન હોસ્પિટલમાં દાખલ કરવામાં આવ્યા હતા. સારવાર દરમિયાન પ્રહલાદભાઈનું 25 નવેમ્બરે મૃત્યુ થયું હતું. પરંતુ હોસ્પિટલે તમામ નિયમો નેવે મુકીને તેમના પરિવારને 11 દિવસનું 4.10 લાખ રૂપિયા બિલ પકડાવી દીધું. એટલું જ નહીં જે સમયે દર્દી ઘરે હતા તે 4થી 9 નવેમ્બરનું પણ 44 હજાર મેડિસિન બિલ પકડાવી દીધું. એટલે કે, AMCના તમામ નિયમો નેવે મુકીને અહીં તપન હોસ્પિટલે ઉઘાડી લૂંટ મચાવી છે.
કોઈપણ ખાનગી હોસ્પિટલ એક દિવસના 18 હજાર રૂપિયાથી વધુ પૈસા ન લઈ શકે
મહત્વનું છે કે, AMCના નિયમ પ્રમાણે, કોઈપણ ખાનગી હોસ્પિટલ એક દિવસના 18 હજાર રૂપિયાથી વધુ પૈસા ન લઈ શકે. આ પ્રમાણે, જોઈએ તો 11 દિવસના 1 લાખ 98 હજાર થાય છે. પરંતુ તપન હોસ્પિટલે દર્દીના પરિવાર પાસેથી 4.10 લાખ રૂપિયા લીધા છે. એટલે કે, 1 દિવસના 37 હજારથી રૂપિયા વધુનો ચાર્જ વસુલવામાં આવ્યો છે.
શું માનવતા ભૂલી ગઈ છે આ હોસ્પિટલો?
ત્યારે સવાલ એ થાય છે કે, શું માનવતા ભૂલી ગઈ છે આ હોસ્પિટલો? કયા નિયમોને આધારે હોસ્પિટલે ચલાવી લૂંટ? કેવી રીતે આ હોસ્પિટલ ખોટું બિલ આપી શકે? સરકાર ડેજીગ્નેટેડ તપન હોસ્પિટલ સામે કરશે કાર્યવાહી? શું તમે તપન હોસ્પિટલ માત્ર કમાવવા માટે જ ખોલી છે? હોસ્પિટલમાં દાખલ થયા વગર દર્દીનું બિલ કેવી રીતે બનાવી શકો? એક વાત તો સ્પષ્ટ છે કે, આપણું આરોગ્ય વિભાગ અને આરોગ્ય સેવાઓ ખાડે છે. ત્યારે જ તો આવી હોસ્પિટલો લૂંટ ચલાવી રહી છે. જોકે આ ઘટના બાદ વીટીવી સાથે વાત કરતા નાયબ મુખ્યમંત્રીએ તપાસના આદેશ આપ્યા છે. પરંતુ જોવાનું એ રહેશે કે, આ લૂંટ ચલાવતી હોસ્પિટલ સામે પગલા શું ભરવામાં આવે છે.