ભાવનગરના શિક્ષકે કોરોના કાળનો ખુબ સફળ રીતે ફાયદો ઉઠાવ્યો, ઘરે રહીને પોતાના જૂના બાઈકને ઈ-બાઈક બનાવી નાખ્યું, પેટ્રોલ-ડીઝલની મોંઘવારી સામે તેમણે સસ્તી સવારીનું કર્યું સર્જન
શિક્ષકની અનોખી સિદ્ધિ
કોરોનામાં ઈ-બાઈકનો આવિષ્કાર
પિતાના જુના બાઈને આવ્યું નવું સ્વરૂપ
આપણે ત્યાં એવું કહેવાય છે કે, શિક્ષક કયારેય સામાન્ય નથી હોતો.. તે ધારે તો કાંઈપણ કરી શકે.. બાળકનું ભવિષ્ય ઉજ્વળ પણ બનાવી શકે છે. અને એક નવી સિદ્ધિ પણ મેળવી શકે છે. આજે આવા જ એક ભાવનગરના શિક્ષકની વાત કરવી છે જેણે કોરોના કાળનો ખુબ સફળ રીતે ફાયદો ઉઠાવ્યો. તેમણે કોરોના કાળમાં ઘરે રહીને પોતાના જૂના બાઈકને ઈ બાઈક બનાવી નાખ્યું છે.. પેટ્રોલ-ડીઝલની મોંઘવારી સામે તેમણે સસ્તી સવારીનું સર્જન કર્યું છે. ત્યારો કોણ છે આ શિક્ષક અને કેવું છે તેમનું ઈ-બાઈક આવો જોઈએ.
કોરોના કાળમાં કરોડો લોકો ઘરે બેઠા હતા. અને લાખો લોકોએ આ મહામારીના કાળને પોતાની સિદ્ધિનો કાળ પણ બનાવી લીધો. જ્યારે લોકો ઘરે બેસી પરિવાર સાથે ટાઈમ પસાર કરવામાં વ્યસ્ત હતા. ત્યારે કાંઈક કરવાની ચાહના ધરાવતા લોકોએ અલગ જ સિદ્ધિ મેળવી. જેમાંના એક છે ભાવનગરના હિમાંશુ વ્યાસ. જેઓ વ્યવસાયે તો શિક્ષક છે. પરંતુ કોરોના કાળ દરમિયાન તેમણે પોતાના પિતાની યાદ સમાન જૂની બાઈકને નવા રંગ આપી દીધા. આ નવા રંગ એટલે કે, ઈ-બાઈક... પેટ્રોલથી ચાલતા બાઈકને તેમણે બેટરીથી ચાલતું બાઈક બનાવી દીધું. એટલું જ નહીં આ ઈ-બાઈકમાં તેમણે એવા સોફ્ટવેર લગાવ્યા.. જે તેને લાખો રૂપિયાની કારની જેમ સુરક્ષા પુરી પાડે છે.
છેને ગજબની વાત... હાલના સમયમાં આપણે સૌકોઈ પેટ્રોલ-ડીઝલના વધતા ભાવથી પરેશાન છીએ. ખાસ ખાસ કરીને નોકરીયાત અને ધંધાદારી વર્ગ પર રોજ મોંઘવારીની અસર પડી રહી છે. તેવામાં હિમાંશુભાઈએ પોતાના મિત્રની મદદથી માત્ર 30 હજાર રૂપિયાના નજીવા ખર્ચે તૈયાર કરેલ આ બાઈક જાણે એક નવી સિદ્ધિ બની ગયું છે. આ બાઈકના ત્રણ ફાયદા છે. એક તો પેટ્રોલ માટે રૂપિયા નહીં આપવા પડે. બીજું એ કે, ઘરે જ ચાર્જ થઈ શકે છે. અને ત્રીજું એ કે, 100 કિલોમીટર સુધી ક્યાંક રોકોવાના ચાન્સ જ નથી.