કોરોના વાયરસે આખી દુનિયાને પોતાના સકંજામાં લીધી છે. આ મહામારીના કારણે હાલમાં જ એક કોરોના પેશન્ટે આત્મહત્યા કરી લીધી છે.
કોરોના પેશન્ટે કરી લીધી આત્મહત્યા
રિકવરી થઇ રહી હોવા છતાં કરી આત્મહત્યા
આખી રાત બૂમો પાડતો રહ્યો પેશન્ટ
મહામારીએ લોકોના હ્રદય અને મગજ પર ખુબ ખરાબ અસર કરી છે. ઝારખંડના ગઢવાથી એક દુઃખદ કેસ સામે આવ્યો છે. જ્યાં કોરોનાથી સંક્રમિત શખ્સે હોસ્પિટલમાં જ ફાંસી લગાવીને આત્મહત્યા કરી લીધી છે. આ ઘટનાથી હોસ્પિટલ પ્રશાસનમાં ખળભળાટ મચી ગયો છે. પોલીસે લાશને કબ્જે કરીને પોસ્ટમોર્ટમ માટે મોકલી આપી છે અને આગળની તપાસ શરૂ કરી દીધી છે.
કોવિડ સંક્રમિત શખ્સે કરી આત્મહત્યા
હોસ્પિટલમાં અન્ય કોરોના પેશન્ટનું કહેવુ છે કે જ્યારથી આ વ્યક્તિ હોસ્પિટલમાં દાખલ થયો ત્યારથી બૂમાબૂમ કરતો હતો. રાત્રે પણ બીજા પેશન્ટને ઉંઘવા નહોતો દેતો. જણાવવામાં આવી રહ્યું છે કે આ શખ્સની રિકવરી પણ સારી હતી તેમ છતાં તેણે આત્મહત્યા કરી દીધી હતી. પોલીસ કેસની તપાસ કરી રહી છે. મૃતકે કેમ સુસાઇડ કર્યુ તેનો ખુલાસો હજુ સુધી થઇ શક્યો નથી.
હોસ્પિટલમાં ખળભળાટ
આ ઘટના બાદ હોસ્પિટલમાં ખળભળાટ મચી ગયો છે. સોમવારે સવારે સફાઇ કર્મી વોર્ડમાં ગયો તો જોયુ કે એક દર્દી ફાંસીએ લટકી ગયો છે. બાદમાં આ વાતની સૂચના હોસ્પિટલ પ્રશાસનને આપવામાં આવી હતી. પોલીસ ઘટનાસ્થળે પહોંચી અને લાશને નીચે ઉતારી પોસ્ટમોર્ટમ માટે મોકલી દેવામાં આવી હતી.
પોલીસ તપાસ કરી રહી છે
આ મામલે પોલીસ પદાધિકારીએ જણાવ્યું કે કોરોના સંક્રમિત વ્યક્તિએ ફાંસી લગાવીને આત્મહત્યા કરી લીધી છે. મૃતકના પરિવારના લોકો તેમજ વોર્ડમાં અન્ય લોકો સાથે પણ પૂછપરછ ચાલી રહી છે. ડૉક્ટર્સે કહ્યું કે તે સાજો થઇ રહ્યો હતો પરંતુ વોર્ડમાં રાડો પાડતો હતો તેને સમજાવ્યુ હતુ કે તે સાજો થઇ જશે પરંતુ તેણે આત્મહત્યા કરી લીધી હતી.