દર્દીઓને મળી રાહતઃ બીજી તરફ કોરોનાના ભયથી લોકો પીડા સહન કરીને પણ સર્જરી ટાળી રહ્યા હતા ખાનગી સિહત તમામ સરકારી હોસ્પિટલોમાં અન્ય સર્જરી શરૂ
રાજ્યમાં કોરોના કહેરે હાહાકાર મચાવ્યા બાદ હવે કોરોના આંકડાઓ સતત ઘટી રહ્યા છે કોરોના સંક્રમણમાં ઘટાડો નોંધાતા હવે રાજ્યમાં ખાનગી અને સરકારી હોસ્પિટલોએ બંધ પડેલી સર્જરી ફરી શરૂ કરી છે.
એપ્રિલ અને મે મહિનામાં કોરોનાના કેસમાં ઉછાળો
કોરોનાની બીજી લહેરમાં મોટા પ્રમાણમાં કેસોનો વધારો થતાં અમદાવાદ સહિત રાજ્યભરની મોટા ભાગની સરકારી હોસ્પિટલોની સાથે ખાનગી હોસ્પિટલોને પણ કોવિડ કેર હોસ્પિટલમાં ફેરવી દેવાઇ હતી. એપ્રિલ અને મે મહિનામાં કોરોનાના કેસમાં ઉછાળો આવતાં બહુ ઓછી હોસ્પિટલોમાં નોન કોવિડ સર્જરી કે સારવાર ઉપલબ્ધ હતી તેમાંય મોટા ભાગે ઇમર્જન્સી કેસોને હાથ ઉપર લેવામાં આવતા હતા, જેના કારણે છેલ્લા ત્રણ મહિના દરમિયાન સિવિલ સહિતની મોટા ભાગની હોસ્પિટલમાં નક્કી થયેલી હોવા છતાં દર્દીઓની સર્જરી પેન્ડિંગ હતી.
રાજ્યમાં કોરોના કેસમાં સતત ઘટાડો નોંધાયો
હવે કોરોના કેસ ઓછા થઇ રહ્યા છે. કોરોનામાં રિઝર્વ રાખેલા બેડ સહિત અન્ય બેડ ખાલી પડી રહ્યા છે ત્યારે અનેક લોકોની સર્જરી પેન્ડિંગ હતી તે હવે ધીમે ધીમે હાથ ઉપર લેવામાં આવી રહી છે. બીજી તરફ કોરોનાના ભયથી લોકો પીડા સહન કરીને પણ સર્જરી ટાળી રહ્યા હતા અને અન્ય બીમારીની સારવાર માટે હોસ્પિટલમાં જવાનું ટાળી રહ્યા હતા.
ખાનગી સિહત તમામ સરકારી હોસ્પિટલોમાં અન્ય સર્જરી શરૂ
અમદાવાદમાં હાર્ટ ટ્રાન્સપ્લાન્ટ, ઘૂંટણ તથા લિવરની સર્જરીમાં કોરોનાના લીધે 60 થી 70 ટકાનો ઘટાડો થયો હતો. શહેરની સરકારી અને ખાનગી હોસ્પિટલોમાં કિડની,લિવર, હૃદય અને ઘૂંટણની સર્જરીમાં 20 થી 90 ટકાનો ઘટાડો નોંધાયો છે, જેથી જે લોકોને ઇમર્જન્સી કે અસહ્ય દુખાવો ન હોય તેવા લોકોએ સર્જરી કે સારવાર કરાવવાના બદલે ઘરમાં રહેવાનું પસંદ કર્યું હતું, જેથી એપ્રિલ અને મે મહિના દરમિયાન શહેરની મોટા ભાગની હોસ્પિટલોમાં વિવિધ પ્રકારની સર્જરીની સંખ્યા ઘટી હતી. હવે હોસ્પિટલોના ઓપીડીમાં દર્દીઓ દેખાઈ રહ્યા છે. કોરોનાનો ડર ઓછો થતાં લોકો દ્વારા તેમની અટકી ગયેલી સર્જરી હવે ફરી શરૂ થઇ છે.