વાયરસ / વિશ્વમાં ફરી વાર કોરોનાએ હાહાકાર મચાવ્યો, જર્મનીમાં નવા 2 લાખ કેસ તો ઇટલી-ફ્રાન્સમાં હાલત બેકાબુ

• વિશ્વમાં ફરી વાર કોરોનાએ કહેર વર્તાવ્યો
• જર્મનીમાં એક દિવસમાં 2 લાખ જેટલાં કેસ નોંધાયા
• ભારતમાં છેલ્લાં 24 કલાકમાં કોરોનાના કેસોમાં 66 ટકાનો વધારો

જર્મની, ફ્રાન્સ અને ઈટાલીમાં કોરોનાની સ્પીડ બેકાબૂ ગતિએ જઇ રહી છે. જર્મનીમાં એક દિવસમાં લગભગ 2 લાખ જેટલાં કેસ નોંધાયા છે. ચીનના નાણાકીય કેન્દ્ર શાંઘાઈમાં કોરોનાને લઈને શહેરમાં તણાવ ઓછો ન થતાં સરકારે લોકડાઉન લંબાવવાનો નિર્ણય લીધો છે. દરમિયાન, ભારતમાં છેલ્લાં 24 કલાકમાં કોરોનાના કેસોમાં 66 ટકાનો વધારો નોંધાયો છે. ખાસ કરીને રાજધાની દિલ્હીમાં કોરોનાના રેકોર્ડબ્રેક 1009 કેસ નોંધાયા છે.

કોરોનાના નવા સબ-વેરિઅન્ટ XE એ સમગ્ર દુનિયામાં ખળભળાટ મચાવ્યો છે. આ વેરિઅન્ટ ઓમિક્રોનનો સબ વેરિઅન્ટ છે. વર્લ્ડ હેલ્થ ઓર્ગેનાઈઝેશન અનુસાર, આ તમામ વેરિઅન્ટ અત્યાર સુધીના કોરોનાના તમામ વેરિઅન્ટ કરતા વધારે સંક્રમિત અને ખતરનાક છે. કોરોનાના નવા સબ-વેરિઅન્ટે ફરી એક વાર વિશ્વના શક્તિશાળી દેશોને હલબલાવી દીધા છે. પશ્ચિમી દેશોમાં કોરોનાની ગતિ બેકાબૂ થઇ ગઈ છે. જર્મની, ફ્રાન્સ અને ઇટાલીમાં કોરોનાના કેસ ડરાવનારા છે. જ્યારે દક્ષિણ એશિયાના દેશોમાં પણ કોરોનાના કેસ સતત વધી રહ્યાં છે. ચીન અને ભારતમાં પણ હવે કોરોનાના કેસ સતત વધી રહ્યાં છે.

અહીં કોરોનાની વૈશ્વિક અસર પર પણ એક નજર કરીશું...

જર્મનીમાં મંગળવારે કોરોનાના 1.98 લાખ નવા કેસ નોંધાયા છે. જ્યાર બાદ કોરોનાના કેસ વધીને 23,658,211 થઈ ગયા છે. રોબર્ટ કોચ ઇન્સ્ટિટ્યૂટના ડેટાનો હવાલો આપતા એક સમાચાર એજન્સીએ 348 નવા મોત થયાની જાણ કરી છે. આ સાથે જ ફ્રાંસમાં મંગળવારે કોરોનાથી નવા 181ના મોત પણ થયા છે. જ્યારે સંક્રમણના નવા 25,465 કેસ નોંધાયા છે. ફ્રાન્સ પણ હાલમાં ફરી એક વાર કોરોના મહામારીના વધતા પ્રકોપ સામે ઝઝૂમી રહ્યું છે.

બીજી તરફ, મંગળવારે ઇટાલીમાં 27,214 કેસ નોંધાયા હતા. ઇટાલીના આરોગ્ય મંત્રાલયે જણાવ્યું હતું કે, મૃત્યુઆંક છેલ્લાં દિવસે 79ના મુકાબલે વધીને 127 થઇ ગયો છે. આરોગ્ય મંત્રાલયે જણાવ્યું કે, અગાઉના 105,739 ની સરખામણીએ મંગળવારના રોજ 174,098 કોરોના ટેસ્ટિંગ કરવામાં આવ્યા હતાં.

શાંઘાઈમાં 95 ટકા કોરોના કેસોથી હડકંપ મચ્યો

બુધવારે ચીનમાં કોરોનાના નવા 19,927 કેસ સામે આવ્યા હતા. જ્યારે એકલા શાંઘાઈ શહેરમાં જ 95 ટકા કેસ સાથે 18902 કેસ નોંધાયા હતા. જ્યારે તેમાંથી માત્ર 2495 લોકોમાં જ કોરોનાના લક્ષણો હતા. શાંઘાઈમાં હાલમાં કોરોનાને લઈને કડક કર્ફ્યુ લાગુ છે. આ અઠવાડિયાની શરૂઆતમાં જ સરકારે લોકડાઉનને થોડું હળવું કરી 40 લાખ લોકોને ઘરની બહાર નીકળવાની મંજૂરી આપી હતી. આ પરવાનગી પણ માત્ર જરૂરી વસ્તુઓ ખરીદવા માટે હતી.

ભારતમાં કોરોનાના નવા 2000 કેસ, દિલ્હીમાં ડરામણી સ્થિતિ

બુધવારે ભારતમાં કોરોનાના નવા 2000 કેસ નોંધાયા હતા. જ્યારે સાંજે દેશની રાજધાનીમાં કોરોનાના નવા 1009 કેસ નોંધાયા હતા. આ કેસો સાથે, દિલ્હીમાં કોરોનાનું જોખમ ફરી વધી ગયું છે. આવી સ્થિતિમાં, સરકારે ફરીથી જાહેર સ્થળોએ માસ્ક પહેરવાનું ફરજિયાત કરી દીધું છે. જે લોકો આદેશનું પાલન નહીં કરે તેઓએ 500 રૂપિયાનો દંડ ભરવો પડશે.