કોરોના વિસ્ફોટ / રિયાલ મેડ્રિડમાં ફૂટ્યો કોરોના બોમ્બઃ છ ખેલાડી અને સપોર્ટ સ્ટાફ કોરોના પોઝિટિવ

• ફૂટબોલની દુનિયામાં પણ કોરોનાએ ફરી એક વાર મુશ્કેલી ઉભી કરી
• ફૂટબોલ ક્લબ રિયલ મેડ્રિડમાં કોરોના બોમ્બ ફૂટ્યો, છ ખેલાડીઓ પોઝીટીવ
• ઈંગ્લિશ પ્રીમિયર લીગ પર પણ કોરોનાનો ઓછાયો મંડરાયો

ફૂટબોલ ક્લબ રિયલ મેડ્રિડના છ ખેલાડી કોરોના પોઝીટિવ

સ્પેનની ટોચની ફૂટબોલ ક્લબ રિયલ મેડ્રિડમાં કોરોના બોમ્બ ફૂટ્યો છે. ક્લબના છ ખેલાડી અને સપોર્ટ સ્ટાફ કોરોના પોઝિટિવ આવ્યા છે. સ્ટાર ખેલાડી ગેરેથ બેલ, માર્કો એસેન્સિયો, રોડ્રિગોઅને બેકઅપ ગોલકીપર આન્દ્રે લુનિનનો કોરોના રિપોર્ટ પોઝિટિવ આવ્યો છે. આ સાથે જ સહાયક કોચ ડેવિડ એન્ચેલોટી પણ કોરોના સંક્રમિત થયા છે. ડેવિડ મેડ્રિડના કોચ કાર્લો એન્ચેલોટીના પુત્ર છે. ગઈ કાલે ચાર ખેલાડીઓ સંક્રમિત થવાની સાથે જ ટીમના કુલ છ ખેલાડી આ વાઇરસથી સંક્રમિત થઈ ચૂક્યા છે. એક દિવસ પહેલાં મિડફિલ્ડર લૂકા મોડ્રિચ અને ડિફેન્ડર માર્સેલોનો પણ કોરોના રિપોર્ટ પોઝિટિવ આવ્યો હતો. ક્લબે જોકે સંક્રમિત લોકોના આરોગ્ય અંગે કોઈ માહિતી આપી નથી. ઉલ્લેખનીય છે કે ગેરેથ બેલ, માર્કો એસેન્સિયો અને રોડ્રિગો- ત્રણેય ટીમ માટે રાઇટ વિંગમાં રમે છે. આ બધા મહત્ત્વપૂર્ણ ખેલાડીઓના કોરોના પોઝિટિવ આવવાથી ટીમ માટે રાઇટ વિંગ પર ખેલાડીઓની પસંદગીનું કામ મુશ્કેલ બની શકે છે.

ઈપીએલની બે મેચ સ્થગિત

ઈંગ્લિશ પ્રીમિયર લીગ (ઈપીએલ) પર કોરોનાનો ઓછાયો મંડરાયો છે. કોરોનાને કારણે ગઈ કાલે બે મેચ સ્થગિત કરવાનો નિર્ણય કરવો પડ્યો. લિસેસ્ટર સિટીની ટીમમાં સંક્રમિતોની સંખ્યા વધવાને કારણે ટાટનહોમ સામેની મેચ ગઈ કાલે શરૂ થવાના થોડા કલાક પહેલાં જ સ્થગિત કરવી પડી. માન્ચેસ્ટર યુનાઇટેડમાં ઘણા કોરોનાના કેસ સામે આવતા બ્રાઇટન સામે આવતીકાલે શનિવારે રમાનારી મેચ પણ સ્થગિત કરવી પડી છે.

ક્રિકેટ પર પણ કોરોનાની થપાટ

ક્રિકેટની વાત કરવામાં આવે તો પાકિસ્તાનના પ્રવાસે આવેલી વિન્ડીઝની ટીમના છ ખેલાડીઓના કોરોના રિપોર્ટ પોઝિટિવ આવ્યા બાદ બંને દેશ વચ્ચેની વન ડે શ્રેણી રદ કરી નાખવાનો નિર્ણય લેવામાં આવ્યો છે. ત્રણ મેચની વન ડે શ્રેણી હવે આગામી વર્ષે જુલાઈમાં રમાશે. ત્રણ મેચની ટી-20 શ્રેણી પાકિસ્તાને જીતી લીધી છે.