ચૂંટણીનો ખેલ / બનાસ ડેરીના ચેરમેન શંકર ચૌધરીએ ગૃહરાજ્ય મંત્રી પ્રદીપસિંહને એવો પત્ર લખ્યો કે થવા લાગ્યા અનેક તર્ક-વિતર્ક

• બનાસકાંઠાના ચેરમેન શંકર ચૌધરીના પત્રથી રાજકીય ગરમાવો
• પૂર્વ મંત્રી શંકર ચૌધરીએ ગૃહમંત્રી પ્રદીપસિંહ જાડેજાને લખ્યો પત્ર
• પોલીસ કર્મીઓની ભલામણનો પત્ર બન્યો રાજકીય ચર્ચાનો વિષય

બનાસ ડેરીના ચેરમેન શંકર ચૌધરીએ પ્રદિપ સિંહ જાડેજાને એક ભલામણ કરતો પત્ર લખ્યો હતો જેમાં કેટલાંક પોલીસકર્મીઓની બદલીની ભલામણ કરવામાં આવી છે. આ ભલામણ પત્રને લઈને હાલમાં અનેક તર્ક-વિતર્ક થઈ રહ્યાં છે. જો કે એની પાછળનું કારણ પણ વ્યાજબી છે.

કેમ થવા લાગ્યા તર્ક-વિતર્ક?

ગુજરાતમાં વિધાનસભાની ચૂંટણીની તૈયારીઓ શરૂ થઈ ચૂકી છે. આ વચ્ચે શંકર ચૌધરીએ કરેલી ભલામણના પત્રએ ચર્ચા જગાવી છે. જેમાં 10 જેટલા પોલીસ કર્મચારીઓની બદલીની ભલામણ કરવામાં આવી છે. ભાજપના નેતા અને ખાસ કરીને વિધાનસભાની ચૂંટણી અગાઉ આ પ્રકારની ભલામણથી રાજકીય જગત તેમ જ લોકોમાં ચર્ચા થાય તે સ્વાભાવિક છે. 

બદલીની ભલામણ કરવામાં મોટા ભાગના ચૌધરી સમુદાયના પોલીસકર્મીઓ

વાત આટલેથી અટકતી નથી, ચર્ચા વધારે એની થઈ રહી છે કે જે 10 પોલીસકર્મીઓની ભલામણ શંકર ચૌધરી દ્વારા કરવામાં આવી છે તેમાથી મોટા ભાગના ચૌધરી સમુદાયના છે. સૌથી મોટા ચર્ચાનો વિષય આ મુદ્દો બન્યો છે. તમામ પોલીસકર્મીઓમાંથી મોટાભાગના પોલીસકર્મીઓની બદલી બનાસકાંઠા જિલ્લામાં કરવા માટે ભલામણ કરવામાં આવી છે. આ કારણે પણ બનાસકાંઠાના રાજકીય ક્ષેત્રે ચર્ચાઓ શરૂ થઈ ચૂકી છે.

શું કારણ હોઈ શકે?

આવામાં ચર્ચા એ થઈ રહી છે કે બનાસ ડેરીના ચેરમેનને ગૃહરાજ્યમંત્રીને કેમ ભલામણ કરવી પડી. શંકર ચૌધરી ન તો ધારાસભ્ય છે કે ન તો મંત્રી ત્યારે એક ભાજપના નેતા તરીકે આવી ભલામણ કરવાની જરૂર કેમ પડી? એવું તો શું કારણ હોઈ શકે કે અન્ય કોઈ નહીં પરંતુ શંકર ચૌધરીએ પોલીસકર્મીઓની બદલી કરાવવાનું કામ હાથમાં લેવું પડ્યું. 

આગામી વિધાનસભા ચૂંટણી લડવાની તૈયારી કરી રહ્યાં છે શંકર ચૌધરી

શંકર ચૌધરીને અગાઉ વાવ બેઠક પરથી કોંગ્રેસના ઉમેદવાર અને હાલના MLA ગેનીબેન ઠાકોર સામે હાર મળી હતી. જે બાદ થરાદ બેઠક પરથી ભાજપના ધારાસભ્ય પરબત પટેલ સાંસદ બનતા શંકર ચૌધરી માટે નવી આશા જાગી છે. વિધાનસભા ચૂંટણી 2022માં થરાદ, વાવ અને રાધપુર સહિતની બેઠક પરથી ચૂંટણી લડવા માટે શું શંકર ચૌધરી અત્યારથી પ્રયત્ન કરી રહ્યા છે. મહત્વનું છે કે, આ બેઠકો પર ઠાકોર સમુદાય અને ચૌધરી સમુદાયનું વર્ચસ્વ છે. જો કે વિધાનસભાની ચૂંટણી અગાઉ શંકર ચૌધરીએ ગઈકાલે પ્રધાનમંત્રી નરેન્દ્ર મોદીને પણ મુલાકાત કરી હતી. આ સાથે તેમણે કેન્દ્રીય ગૃહમંત્રી અમિત શાહ સાથે પણ મુલાકાત કરી હતી.