બોલિવૂડના ફિલ્મકારો દ્વારા ગુજરાતના કલાકારને અન્યાય થયો હોય તેવા ઘણા કિસ્સાઓ છે. પણ આ વખતે અરવિંદ વેગડા લડી લેવાના મૂડમાં છે.
ફિલ્મ ભુજ- પ્રાઇડ ઓફ ઇન્ડિયા રિલીઝ થાય તે પહેલા વિવાદ
ફિલ્મમાં ગુજરાતી ગીત ભાઇ-ભાઇનો ઉપયોગ
ટી-સિરીઝ સામે અરવિંદ વેગડાએ વ્યક્ત કરી નારાજગી
કચ્છના ભુજની એક સત્ય ઘટના પર આધારિત આવનાર ફિલ્મ ભુજ રીલીઝ થાય તે પહેલા વિવાદે ચડી છે. ફિલ્મ ભુજ- પ્રાઈડ ઓફ ઈન્ડિયામાં ગુજરાતી ગીતકારને જાણ કર્યા વિના જ ફિલ્મમાં ભાઈ ભાઈ ગીતનો ઉપયોગ થયા હોવાના આરોપ લાગી રહ્યો છે. સમગ્ર મામલે ભાઈ ભાઈ ગીતના ફેમ અરવિંદ વેગડાએ ટી-સિરીઝ સામે નારાજગી વ્યકત કરી છે.
શું છે સમગ્ર વિવાદ ?
ફિલ્મ ભુજ- પ્રાઈડ ઓફ ઈન્ડિયામાં ગુજરાતી ગીત ભાઈ ભાઈ, ભલા મોરી રામા ગીતની કડી વપરાઇ છે. ભાઈ ભાઈ ગીતના ઓરિજનલ કમ્પોઝર અરવિંદ વેગડાએ આ મામલે ફિલ્મ નિર્માતા અને ટી સીરિઝ સામે વાંધો ઉઠાવ્યો છે. ફિલ્મ ભુજમાં આ ગીતના રિમેક વર્ઝનની કડી અરવિંદ વેગડાના જાણ બહાર લેવાઈ છે. ફિલ્મમાં સંજય દત્તે આ ગીતની કડી ફિલ્માવી છે. અરવિંદ વેગડાનો દાવો છે કે ગીતમાં તેમણે ક્રેડીટ આપવામાં આવી નથી અને આથી જ તેઓ ટી સીરિઝ સામે બાયો ચડાવી રહ્યા છે.
કોણ છે 'ભાઇ ભાઈ'નો અસલી હકદાર?
મુળ ગીતના શબ્દો ભલા મોરી રામા છે તેમાં અરવિંદ વેગડાએ ભવાઈના ગીત પરથી લહેકા તરીકે ભાઈ ભાઈ ગીત કમ્પોઝ કર્યું હતું. વર્ષ 2011માં કમ્પોઝ કરાયેલા આ ગીતથી અરવિંદ વેગડા ભારે પ્રખ્યાત થયા હતા અને ગુજરાત સહિત દેશ ભરમાં ફેમસ કલાકાર તરીકે ઊભરી આવ્યા હતા. આ ગીતના કારણે જ અરવિંદ વેગડાને જાણીતા ટેલિવિઝન શો બિગ બોસમાં જવાનો મોકો મળ્યો છે.
'ભાઈ ભાઈ'નો બીજો વિવાદ
આ પહેલા પણ સંજયલીલા ભણસાણીની ફિલ્મ રામલીલામાં પણ ભાઈ ભાઈ ગીતના શબ્દોનો ઉપયોગ થતાં અરવિંદ વેગડાએ વિરોધ કર્યો હતો. સતત બીજી વખત બૉલીવુડ દ્વારા ગુજરાતી કલાકારને અન્યાય કરાતા આ ફિલ્મ રીલીઝ થાય તે પહેલા જ અરવિંદ વેગડાએ મ્યુઝીક થીમને લઈને નારાજગી દર્શાવી છે.