મહારાષ્ટ્ર / શિંદેજૂથના ધારાસભ્યની ધમકી: જે વચ્ચે આવે તેના હાથ-પગ તોડી નાખો, બીજા દિવસે હું જામીન અપાવી દઈશ

• મહારાષ્ટ્રમાં શિંદે જૂથના સમર્થક ધારાસભ્યની જીભ લપસી
• ઉદ્ધવ ઠાકરે જૂથને ખુલ્લા મંચ પરથી આપી ધમકી
• હાથ-પગ તોડી નાખવાની આપી ધમકી, પોલીસમાં નોંધાઈ ફરિયાદ

મહારાષ્ટ્રના મુખ્યમંત્રી એકનાથ શિંદેના સમર્થક અને માગઠાણેથી ધારાસભ્ય પ્રકાશ સુર્વેએ દહિસર કોકણી પાડા બુદ્ધ વિહારમાં એક સાર્વજનિક કાર્યક્રમ દરમિયાન કાર્યકર્તાઓને સંબોધન કરતા ભડકાઉ ભાષણ આપતા ઉદ્ધવ ઠાકરે જૂથ તરફ ઈશારો કરતા કહ્યું કે, ઈલેક્શનમાં તેમને તેમની ઔકાત દેખાડી દઈશું. જે કોઈ પણ વચ્ચે આવશે, તેમના હાથ તોડી નાખવાના, હાથ ન તૂટે તો ટાંગા તોડી નાખીશું. બીજા દિવસે હું જામીન અપાવી દઈશ.

તેમણે કહ્યું હતું કે, કોઈની પણ દાદાગીરી સહન કરવાની નહીં, તેમને ઠોકી દો...પ્રકાશ સુર્વે બેઠા છે. હાથ ન તોડી શકો તો, પગ તોડી નાખો. બીજા દિવસે હું જામીન અપાવીશ. ચિંતા ન કરો. આપણે કોઈ સાથે લડીશું નહીં, પણ કોઈ આપણી સામે લડશે તો તેને છોડવાના પણ નથી. 

ઠાકરે જૂથે પોલીસને ફરી ફરિયાદ

આ ભડકાઉ નિવેદનના વિરોધમાં ઠાકરે જૂથ તરફથી દહિસર પોલીસ સ્ટેશનમાં ફરિયાદ નોંધવામાં આવી છે. પોલીસના જણાવ્યા અનુસાર શિવસેનાના કોર્પોરેટર ઉદેશ પાટેકરે સુર્વે વિરુદ્ધ દહિસર પોલીસ સ્ટેશનમાં ભડકાઉ ભાષણ  આપવા મામલે ફરિયાદ નોંધાવી છે. પાટેકરે પોલીસેને પ્રકાશ સુર્વેના ભડકાઉ ભાષણનો વીડિયો ક્લિપ પણ આપ્યો છે. સાથે જ માગ કરી છે કે, પ્રકાશ સુર્વે વિરુદ્ધ ફરિયાદ દાખલ કરીને કડક કાર્યવાહી કરવામાં આવે.