બનાસકાંઠાના વાવમાં કોંગ્રેસ દ્વારા આયોજિત સભા દરમિયાન ધારાસભ્ય ગેનીબેન ભાન ભૂલ્યા હતા.
બનાસકાંઠાના વાવમાં કોંગ્રેસના ગેનીબેન ભૂલ્યા ભાન
જનવેદના સભામાં કરી આપત્તિજનક ટિપ્પણી
અસભ્ય ભાષાનો પ્રયોગ કરી ભાજપ પર કર્યા પ્રહાર
ગુજરાત વિધાનસભાની ચુંટણીની તૈયારીના ભાગરૂપે બનાસકાંઠા જિલ્લાના વાવ ખાતે કોંગ્રેસ દ્વારા જનવેદના સભા યોજાઈ હતી. આ દરમિયાન કોંગ્રેસના ધારાસભ્ય ગેનીબેન ઠાકોરે સરકારને આડે હાથ લીધી હતી અને સરકાર પર આકરા પ્રહારો કર્યા હતા. જેમાં તેઓ ભાન ભૂલ્યા હતા. ગેનીબેન ઠાકોરે જાહેર સભામાં બેફામ વાણી વિલાસ આચરતા સભામાં ક્ષણિક સોંપો પડી ગયો હતો. બીજી તરફ ગેનીબેન ઠાકોરની આપત્તિજનક ટિપ્પણીને પગલે ઉપસ્થિત લોકોમાં આક્રોશ ફેલાયો હતો.
ગેનીબેને આકરા પ્રહારો કરતાં કર્યો અસભ્ય ભાષાનો પ્રયોગ
વાવ, થરાદ અને વડગામ ધારાસભ્યની આગેવાનીમાં બનાસકાંઠાના વાવમાં કોંગ્રેસ દ્વારા જનવેદના સભામાં યોજાઇ હતી. આ દરમિયાન ધારાસભ્ય ગેનીબેન ઠાકોરે સરકાર વિરુદ્ધ ચાબખા મારતા જણાવ્યુ હતું કે તમારા રાજમાં બેન-દીકરીઓ સુરક્ષિત નથી. ત્યારબાદ આગળ બોલતા તેમની જીભ લપસી હતી અને ગેનીબેન જાહેરમાં જ આપત્તિજનક ટિપ્પણી કરી બેઠા હતા. પ્રજા પ્રતિનિધિ તરીકે ગેનીબેને અસભ્ય ભાષાનો પ્રયોગ કરી ભાજપ પ્રહાર કરતાં સભામાં ઉહાપોહ મચી જવા પામ્યો હતો.
તાકાત હોય તો ગુલાબસિહ, ગેબીબેન કે જીગ્નેશ પર કેસ કરોઃ ગેનીબેન
વધુમાં વાવ બેઠકના કોંગ્રેસના ધારાસભ્ય ગેનીબેન ઠાકોરે જણાવ્યુ હતું કે, જીગ્નેશ, ગેનીબેન કે ગુલાબસિહને પૈસાથી ખરીદી શકવાની ભાજપની તાકાત નથી. એટલે સરકાર ખોટી ફરિયાદો કરી રહી છે અને કારણ વગર લગાડેલ કેસ પરત ખેંચવાની જ આ લડત છે. વધુમાં તેમણે ઉમેર્યું હતું કે તાકાત હોય તો ગુલાબસિંહ, ગેનીબેન કે જીગ્નેશ પર કેસ કરીને બતાવો. આ ઉપરાંત ઢીમામાં ચૂંટણી જીતવા કન્ટેનર ભરીને દારૂ ઠાલવવામાં આવતો હોવાનો પણ તેઓએ ધગધગતો આરોપ લગાવ્યો હતો.
બીજી તરફ પ્રજામાંથી સવાલોએ પણ ઉઠી રહ્યા છે કે, પ્રજાના પ્રતિનિધિઓ અવારનવાર ભાન ભૂલી શા માટે બેફામ નિવેદનો આપે છે. જાહેરમાં અપશબ્દો અને અશોભનીય ટિપ્પણી પર લગામ ક્યારે આવશે અને રાજકીય રોટલા શેકવામાં એક બીજા પર પ્રહારો કરવામાં અસભ્ય ભાષાનો પ્રયોગ કેમ? આ સિલસિલો અટકાવવા માંગ ઉઠી છે.