કરાર આધારિત હેલ્થ કર્મચારીઓની સરકાર સામે નારાજગી, વર્ષ 2019થી પગાર વધારો નથી મળ્યો
કરાર આધારિત હેલ્થ કર્મચારીઓ વિરોધના રસ્તે
પગાર વધારા બાબતે અનેક રજૂઆત છતાં પરિણામ શુન્ય
વર્ષ 2019માં રૂ.500નો પગાર વધારાયો હતો
રેસિડેન્ટ ડોકટરો માડ શાંત થાય તો એક તરફ પોલીસ ગ્રેડ પે વધારાની માંગ કરી રહી છે, તો બીજી તરફ હવે કરાર આધારિત હેલ્થ કર્મચારીઓએ રણશિંગુ ફુંકયું છે. કોરોના કાળમાં જીવની બાજી લગાવી ખડેપગે રહેલા કરાર આધારીત હેલ્થ કર્મચારી કોરોના ટેસ્ટિંગ, વેકસીનેશન તેમજ આરોગ્ય વિભાગમાં અન્ય કામોમાં હરહમેશ આગળ રહ્યા છે ત્યારે તેમને સમાન કામ સમાન વેતન નહીં મળતા મોટો વસવસો છે.
પગાર વધારા માટે 19 વખત રજૂઆત કરી
હેલ્થ કર્મચારીએ સોશિયલ મીડિયામાં એક પોસ્ટ મૂકી હેલ્થ કર્મચારીઑની માગણી સંતોષવા અને પગાર વધારવા સરકારને અપીલ કરી છે. જેનો તમામ કરાર આધારિત હેલ્થ કર્મચારીઓ મોટા પાયે સપોર્ટ કરી રહ્યા છે અને માગણી કરી રહ્યા છે તેમનો પગાર વધારવામાં આવે. પણ સરકાર અને અધિકારીઑને અત્યાર સુધી 19 વખત રજૂઆત કરવામાં આવતા પણ કોઈ પ્રતિક્રિયા ન આપતા હવે આ હેલ્થ કર્મચારીઑ અકળાયા છે. લેખિત રજૂઆત છતાં પગાર વધારો ના થતાં વિરોધ કરી રહ્યા છે અને સરકાર સમક્ષ નારાજગી ઠાલવી રહ્યા છે.
સમાન કામ તો સમાન વેતન કેમ નહીં?
કરાર આધારિત હેલ્થ કર્મચારીનો પગાર હાલ મહિને 9000 રૂપિયા છે એટલે કે દિવસના 300 રૂપિયા માંડ થયા. વર્ષ 2019માં રૂ.500નો પગાર વધારાયો હતો જે પહેલા તેમનો પગાર 8500 રૂપિયા હતો. જ્યારે સામે NHM કર્મચારીઓને સરકાર પ્રતિ વર્ષ પગાર વધારો આપે છે તેથી સરખી કામગીરી છતાં રાજ્ય સરકાર પગાર વધારો ન આપતી હોવાનો આરોપ લાગી રહ્યા છે. અને સવાલ પણ થઈ રહ્યા છે કે એક સરખા કામ માટે એક સરખું વેતન કેમ નથી મળતું.આથી પગાર વધારા બાબતે અનેક રજૂઆત છતાં પરિણામ શુન્ય દેખાતા કરાર આધારિત હેલ્થ કર્મચારીઓએ વિરોધનો રસ્તો પકડ્યો છે.