ટેક્નોવોર / દુનિયામાં સતત ચાલતું સાયબર વોરઃ જાણો કોની પાસે સૌથી તાકાતવર સાયબર સેના

• સોવિયત સંઘના વિસર્જન બાદ બેકાર બનેલા ટેકનોક્રેટસે હેકિંગનો પાયો નાંખ્યો
• હેકિંગના ખેલમાં રશિયા એકલું નથી ઇરાન પણ હેકિંગની દુનિયામાં મોટું ખેલાડી છે
• ઈરાન પર થયેલા આ સાયબર એટેક પાછળ અમેરિકા અથવા ઇઝરાઇલનો હાથ હોવાની આશંકા હતી

રશિયન નિષ્ણાતોએ હેકિંગ સામ્રાજ્યનો પાયો નાખ્યો હતો

૧૯૯૦ના દાયકામાં સોવિયત સંઘના વિસર્જન પછી, રશિયામાં ઘણા નિષ્ણાતો અચાનક બેકાર બની ગયા. જેમાં ઇલેક્ટ્રોનિક્સ એન્જિનિયર અને ગણિતશાસ્ત્રી પણ મોટી સંખ્યામાં હતા. આજીવિકા મેળવવા માટે તેમણે  ઇન્ટરનેટની દુનિયા ખંગાળવાનું શરૂ કર્યું. આ રશિયન નિષ્ણાતોએ હેકિંગ સામ્રાજ્યનો પાયો નાખ્યો હતો. રશિયાના પત્રકાર આન્દ્રે શોશ્નિકોફ કહે છે કે રશિયામાં હેકર્સ નામનું મેગેઝિન પણ પ્રકાશિત થતું હતું. રશિયાની ગુપ્તચર એજન્સી એફએસબીને આ હેકરો વિશે જાણ હતી. પરંતુ આશ્ચર્યજનક વાત એ છે કે રશિયન સરકારને આ હેકરોની કાર્યવાહીથી કોઇ વાંધો ન હતો. સરકાર તો આ હેકરોનો લાભ લેવા ઇચ્છતી હતી.

એફએસબી વડા ઘણા રશિયન હેકરને વ્યક્તિગત રૂપે જાણતા હતા. ૨૦૦૭માં રશિયન હેકરોએ સરકારના ઇશારે પડોશી દેશ એસ્ટોનિયા પર મોટો સાયબર હુમલો કરી સેંકડો વેબસાઇટ હેક કરી હતી. પછીનાં વર્ષે, રશિયન હેકરોએ બીજા પડોશી દેશ જ્યોર્જિયાની તમામ ઓફિશિયલ વેબસાઇટ્સને સાયબર એટેક દ્વારા તબાહ કરી હતી. આજે  રશિયા પાસે સૌથી શક્તિશાળી સાયબર આર્મી છે. રશિયન હેકરો પર અમેરિકી પ્રમુખની ચૂંટણીમાં દખલ કરવાનો આરોપ છે. તેમણે વ્હાઇટ હાઉસ ઉપર સાયબર હુમલો કર્યો હતો. રશિયા તરફથી કરવામાં આવેલા સાયબર એટેકમાં ફેન્સી બિઅર નામના એક ગ્રૂપનું નામ ઘણી વખત લેવામાં આવ્યું છે. રશિયાની સેનાનું ઇન્ટેલિજન્સ યુનિટ તેને ચલાવતું હોવાનું કહેવાય છે. 

ઇરાન પણ હેકિંગની દુનિયામાં મોટું ખેલાડી છે

પરંતુ આ હેકિંગના ખેલમાં રશિયા એકલું નથી. ઇરાન પણ હેકિંગની દુનિયામાં મોટું ખેલાડી છે. ઇન્ટરનેટના આગમન સાથે, ઇરાને તેના લોકોને સાયબર એટેક માટે તૈયાર કરવાનું શરૂ કર્યું. ઇરાન જેવા દેશોમાં સોશિયલ મીડિયા સરકાર સામે અવાજ ઉઠાવવાનું એક મોટું પ્લેટફોર્મ છે. સરકાર તેમના પર નજર રાખે છે. ઈરાનમાં હેકર્સનો ઉપયોગ ત્યાંની સરકાર તેમની વિરુદ્ધ બોલનારાઓને મૌન કરવા માટે કરવા થાય છે. ૨૦૦૯માં જ્યારે ઈરાનમાં સરકાર વિરોધી દેખાવો ઉગ્ર બની રહ્યા હતા. તે પછી ઈરાનની સરકારના હેકરોએ તમામ સોશિયલ મીડિયા એકાઉન્ટ્સ હેક કરી લીધાં. કેટલાકને જેલ ભેગા કરાયા હતા. ઈરાનની સાયબર આર્મી ત્યાંનું કુખ્યાત રિવોલ્યુશનરી ગાર્ડ ચલાવે છે.

ગુપ્તચર એજન્સી આરજીબી ઉત્તર કોરિયામાં હેકર્સની સેના ચલાવે છે

અમેરિકન થિંક ટેન્ક કાર્નેગી એન્ડોમેન્ટ માટે કામ કરનાર એક નિષ્ણાતના જણાવ્યા મુજબ અમેરિકા, રશિયા, ચીન અને ઇઝરાઇલ સાયબર દુનિયાના બેતાજ બાદશાહ છે. યુરોપિયન દેશોની સાયબર ફોર્સ બીજા ક્રમે આવે છે. ૨૦૧૨માં, ઈરાનના ઓઇલ ઉદ્યોગ પર સાયબર હુમલામાં તેની સિસ્ટમની હાર્ડ ડ્રાઇવનો ડેટા ઉડાડવામાં આવ્યો હતો. ઈરાન પર થયેલા આ સાયબર એટેક પાછળ અમેરિકા અથવા ઇઝરાઇલનો હાથ હોવાની આશંકા હતી. ઈરાને ત્રણ મહિના પછી તેના દુશ્મન સાઉદી અરેબિયા પર મોટો સાયબર હુમલો કરી ત્રીસ હજાર કમ્પ્યૂટરનો ડેટા ડિલિટ કરી નાખ્યો હતો. એક એવો દેશ છે જ્યાં હેકિંગ ફોર્સ સંપૂર્ણ સરકારી છે. આ દેશનું નામ ઉત્તર કોરિયા છે. ગુપ્તચર એજન્સી આરજીબી ઉત્તર કોરિયામાં હેકર્સની સેના ચલાવે છે. 

એક અંદાજ મુજબ ૨થી ૩ હજાર ઉત્તર કોરિયાના હેકર્સ  ક્રેડિટ કાર્ડ, બેન્કોને નિશાન બનાવીને પૈસા કમાય છે. તેમણે વિશ્વની ઘણી બેન્કોમાંથી કરોડો રૂપિયા ઉડાવ્યા છે. આવા જ એક સાયબર સિક્યોરિટી એક્સપર્ટ છે માયા હોરોવિત્ઝ. માયા સાયબર સિક્યુરિટી કંપની ચેક પોઇન્ટ માટે કામ કરે છે. ઇઝરાઇલની રહેવાસી માયા કહે છે કે સામાન્ય રીતે આઇટી પ્રોફેશનલ્સનો સાયબર એટેકમાં હાથ હોય છે. તેઓ ત્રણ કે ચાર લોકોની ટીમ તરીકે કામ કરે છે. એક ટાર્ગેટ શોધે છે, બીજો સિસ્ટમમાં ઘૂસે છે. ત્રીજો એકાઉન્ટ્સમાંથી ડેટા અથવા પૈસા ચોરે છે. માયાનું કહેવું છે કે ઘણી વાર હેકર્સ ૫થી ૭ લોકોનાં જૂથમાં કામ કરે છે. જે એકબીજાને કોડનેમથી ઓળખે છે. કોઈ તેમના જ ગ્રૂપના અન્ય સભ્યનું અસલી નામ જાણતો હોતો નથી. આ લોકો ઘણીવાર ટેલિગ્રામ નામની સોશિયલ મેસેજિંગ એપ દ્વારા વાત કરે છે. આ એક એન્ક્રિપ્ટેડ મેસેજ સર્વિસ છે.  જેનો આતંકવાદી સંગઠનો પણ ઉપયોગ કરે છે.