રિપોર્ટ / ગ્રાહકોની ખર્ચશક્તિને લઈને મોદી સરકાર માટે આવ્યા ખરાબ સમાચાર, રિપોર્ટ રજૂ કરતાં પણ ડરે છે

• દેશમાં ગત 4 દાયકાઓમાં પહેલીવાર ગ્રાહક ખર્ચમાં ઘટાડો જોવા મળ્યો છે
• મીટિંગમાં ચીફ સ્ટેટિસિયન પ્રવિણ શ્રીવાસ્તવે ડેટાને રિલીઝ કરવાનો વિરોધ કર્યો
• નેશનલ સ્ટેટેસ્ટિક કાર્યાલયના ચેરમેન બિમલ કુમાર રૉયે આ રિપોર્ટને પ્રકાશિત કરવા કહ્યું

બિઝનેસ સ્ટાન્ડર્ડની એક રિપોર્ટ અનુસાર બિમલ કુમાર રૉયે રિપોર્ટને જાહેર ન કરવાના એક સવાલ પર કહ્યું, 'મેં પ્રયાસ કર્યા હતા. સર્વેને જાહેર કરવાનો પ્રસ્તાવ મુક્યો હતો, પરંતુ મને સમર્થન ન મળ્યું. મેં ચેરમેન તરીકે આ પ્રસ્તાવ રાખ્યો હતો, પરંતુ આ આગળ ન વધ્યો, તેનાથી વધારે હું કઇ કહી ન શકું.' 

એક સૂત્રના હવાલાથી બિઝનેસ સ્ટાન્ડર્ડે પોતાની રિપોર્ટમાં કહ્યું કે મીટિંગમાં ચીફ સ્ટેટિસિયન પ્રવિણ શ્રીવાસ્તવે ડેટાને રિલીઝ કરવાનો વિરોધ કર્યો, જોકે એક સભ્યે તેના પર વિરોધ દર્શાવ્યો અને કહ્યું કે ડેટાને જાહેર કરવો જોઇએ. સભ્યો વચ્ચેની મીટિંગમાં સભ્યોની સલાહને સામેલ કરવામાં આવી નથી. 

નેશનલ સ્ટેટિસ્ટિક કાર્યાલયે હવે નાણાકીય વર્ષ 2021 અને 2022માં નવી ટેક્નિકની સાથે રિપોર્ટ તૈયાર કરવાનો આદેશ આપ્યો છે. સરકારે ગત મહીને જ પૂર્વ ચીફ સ્ટેટિસિયન પ્રવિણ શ્રીવાસ્તવના નેતૃત્વમાં એક કમિટીની રચના કરી હતી. જેને ગ્રાહક ખર્ચ પર એક નવો સર્વે કરવાનો આદેશ આપવામાં આવ્યો. 

એક્સપર્ટ્સનું માનીએ તો ગ્રાહક ખર્ચમાં ઘટાડાનો અર્થ દેશમાં ગરીબીના રેશિયોમાં દાયકાઓ બાદ વધારો નોંધાયો છે. નેશનલ સ્ટેટિસ્ટિક કાર્યાલયની મીટિંગમાં કહેવામાં આવ્યું છે કે 'એ અપીલ કરવામાં આવે છે કે આ સર્વેના પરિણામોને વર્તમાન સ્વરૂપમાં જાહેર ન કરવામાં આવે અને ન તેને દેશની સમગ્ર અર્થવ્યવસ્થાના સંકેત તરીકે જોવામાં આવે'.