મેડિક્લેઇમ તો મળી જાય છે પરંતુ જ્યારે ખરેખર ક્લેઇમ કરીએ ત્યારે કંપની દ્વારા 17 નિયમો સામે ધરી દેવામાં આવે છે. આ હોસ્પિટલ ન ચાલે, આના માટે હોસ્પિટલમાં દાખલ થવાની જરુર ન હતી અને બીજુ ઘણુ બધુ. ત્યારે ગ્રાહક સુરક્ષા કોર્ટે કલેઇમ નકારવા ખોટા બહાના કરતી વીમા કંપનીઓની આકરી ઝાટકણી કાઢી છે.
વીમા કંપનીઓને ગ્રાહક સુરક્ષા કોર્ટની ટકોર
વાત જાણે એમ છે કે સુરતના દર્દીને પગમાં સમસ્યા થતા હોસ્પિટલમાં દાખલ કરાયા હતા. જ્યારે તેમણે વીમા કંપનીમાં વીમો ક્લેઇમ કર્યો તો કંપનીએ ક્લેઇન નકારી દીધો. કંપનીએ કહ્યું કે આ સારવાર માટે દાખલ થવાની જરુર ન હતી. દર્દીનો વીમો પાસ ન થતા તેણે ગ્રાહક સુરક્ષા કોર્ટમાં અપીલ કરી હતી. કોર્ટે જણાવ્યું કે દર્દીએ હોસ્પિટલમાં દાખલ થવુ કે નહી તે વીમા કંપની નક્કી ન કરી શકે.
'તબીબના સૂચનના આધારે દર્દી હોસ્પિટલમાં દાખલ થાય છે'
ગ્રાહક સુરક્ષા કોર્ટે વીમા કંપનીઓને ટકોર કરતા જણાવ્યું કે તબીબના સૂચનના આઘારે દર્દી હોસ્પિટલમાં દાખલ થાય છે. ચોક્કસ સારવાર માટે દાખલ થવાની જરૂર ન હતી તેવું કારણ આપવું અયોગ્ય છે. દર્દીએ હોસ્પિટલમાં દાખલ થવુ કે નહી તે વીમાકંપની નક્કી કરી શકે નહી. આવા કારણો દર્શાવી વીમા ક્લેઇમ નકારી શકાય નહી તેમ કોર્ટે જણાવ્યું હતું. મહત્વનું છે કે ઘણી વખત એવું પણ સામે આવે છે કે વીમો પકવવા માટે હોસ્પિટલોના ખોટા દસ્તાવેજો કઢાવીને ક્લેઇમ કરાવવામાં આવે છે. આ તદ્દન અયોગ્ય છે. પરંતુ વીમા કંપની નક્કી ન કરી શકે કે જે તે રોગની સારવાર માટે તમારે હોસ્પિટલમાં જવુ કે નહી તેમ કોર્ટે સ્પષ્ટતા કરી હતી.