સેટિંગબાજી / વડોદરામાં કોન્ટ્રાક્ટરોનું કારસ્તાન: અધિકારીને ખિસ્સાંમાં લઈ કરોડોનો ભાવ-વધારો મંજૂર કરાવ્યો

• વડોદરા મનપા દ્વારા રોડ બનાવવા મામલે કોન્ટ્રાક્ટરોએ રચી માયાજાળ
• તમામ ઝોનના કોન્ટ્રાક્ટરે ભાવ વધાર્યા હોવાનું જાણવા મળ્યું
• કોન્ટ્રાક્ટરોના તાબે થઇ એક અધિકારીએ ભાવ વધારો મંજૂર કર્યો

વડોદરા મહાપાલિકા દ્વારા રોડ બનાવવા મામલે કોન્ટ્રાક્ટરોએ માયાજાળ રચી હોવાનું જાણવા મળી રહ્યું છે. શહેર નગરપાલિકાના રોડના વાર્ષિક કોન્ટ્રાક્ટમાં રીંગ બનાવી તમામ ઝોનના કોન્ટ્રાક્ટરોએ ભાવ વધારો કર્યો હોવાનું સામે આવ્યું છે. જો કે, કોન્ટ્રાક્ટરોએ ભાવવધારો કર્યો હોવા છતાં મનપાએ કોન્ટ્રાક્ટરોને તાબે થઇ ભાવવધારાને મંજૂર પણ કરી દીધો છે.

કોન્ટ્રાક્ટરોએ રીંગ બનાવીને ગોઠવણ કરી અધિકારી શાસકોને સંકજામાં લીધા

વડોદરા મહાપાલિકા દ્વારા રોડ બનાવવાના વાર્ષિક કોન્ટ્રાકટમાં કોન્ટ્રાક્ટરોએ રીંગ બનાવી. કોન્ટ્રાક્ટરોએ રીંગ બનાવીને ગોઠવણ કરી અધિકારી શાસકોને સંકજામાં લીધા છે. રોડ બને કે ન બને પરંતુ અધિકારીઓ, નેતાઓ અને કોન્ટ્રાકટરો માલામાલ જરૂર બનશે. કોન્ટ્રાકટરોએ પસંદગીના ઝોન નક્કી કરી લીધા અને પછી તે મુજબ કોન્ટ્રાકટરોએ ભાવો ભર્યા છે.

નોંધનીય છે કે, ચાર કોન્ટ્રાક્ટરોએ કોર્પોરેશનના અંદાજ કરતાં 27.21 ટકાનો વધુ ભાવ ભર્યો હોવાનું જાણવા મળી રહ્યું છે. કોર્પોરેશનને 40 કરોડના કામોમાં 10.88 કરોડ વધારે ચૂકવવાનો વારો આવ્યો છે. આ મામલે વર્ષોથી કોર્પોરેશનમાં રોડના કોન્ટ્રાક્ટમાં ગેરરીતી થતો હોવાનો આક્ષેપ લાગી રહ્યો છે. વર્ષોથી આ 4 કોન્ટ્રાકટરોને જ કોન્ટ્રાકટ મળતો હોવાનો આક્ષેપ લાગી રહ્યો છે.

કોન્ટ્રાક્ટરોના તાબે થઈ એક અધિકારીએ તમામનો ભાવ વધારો મંજૂર કર્યો છે. આ અધિકારીએ બેઠક કરી ચારેય કોન્ટ્રાક્ટરોને 27.21 ટકાનો વધુ ભાવ મંજૂર કરી આપ્યો છે. મહત્વનું છે કે, આવતી કાલે પાલિકામાં સ્ટેન્ડિંગ કમિટીની બેઠક પણ મળશે. આ બેઠકમાં રોડની દરખાસ્ત મામલે ચર્ચા થશે.

જુઓ કયા કોન્ટ્રાક્ટરે ભર્યો વધુ ભાવ?

• દક્ષિણ ઝોન માટે શિવમ કન્સ્ટ્રક્શને 32.77 ટકા વધુ ભાવ ભર્યો
• દક્ષિણ ઝોન માટે સૌરભ બિલ્ડર્સે 35.80 ટકા વધુ ભાવ ભર્યો
• ઉત્તર ઝોન માટે સૌરભ બિલ્ડર્સે 32.80 ટકા વધુ ભાવ ભર્યો
• ઉત્તર ઝોન શિવાલય ઇન્ફ્રા દ્વારા 35 ટકા વધુ ભાવ ભરાયો
• પશ્ચિમ ઝોન માટે શિવાલય ઇન્ફ્રાએ દ્વારા 32 ટકા વધુ ભાવ ભર્યો
• પશ્ચિમ ઝોન માટે ગાયત્રી કન્સ્ટ્રક્શને 35.20 ટકા વધુ ભાવ ભર્યો
• પૂર્વ ઝોન માટે ગાયત્રી કન્સ્ટ્રક્શને 32.50 ટકા ભાવ ભર્યો
• પૂર્વ ઝોન માટે શિવમ કન્સ્ટ્રક્શને 35.77 ટકા વધુ ભાવ ભર્યો
• તમામ ઝોન માટે ચારેય કોન્ટ્રાક્ટરે અંદાજીત 35.77 ટકા વધુ ભાવ ભર્યો
• અધિકારીઓ રોડના કોન્ટ્રાક્ટની શરતો ભારે રાખે છે
• જેમાં માત્ર 4 કોન્ટ્રાક્ટરો જ ફીટ બેસી શકે

સળગતા સવાલ

• આખરે મનપા કેમ થઇ કોન્ટ્રાક્ટરોને તાબે?
• વર્ષોથી ચોક્કસ કોન્ટ્રાક્ટરોને કેમ કામ સોંપાય છે?
• ટેન્ડર પ્રક્રિયામાં રીંગ બનાવાયા બાદ કેમ કામ મંજૂર કરાયા?
• કયા અધિકારીએ બારોબાર ભાવ વધારો આપ્યો?
• જનતાના રૂપિયાનો અધિકારીઓ કેમ કરે છે વ્યય?
• રીંગ બનાવનારા કોન્ટ્રાક્ટરો સામે પગલાં લેવાશે?
• રીંગ બનાવતા કોન્ટ્રાક્ટરોને બ્લેક લિસ્ટ કેમ નથી કરાતા?