મોરબીમાં કરોડના કૌભાંડમાં ઝડપાયેલા ધારાસભ્ય પરસોતમ સાબરીયાના મામલે હવે કોંગ્રેસ પણ વિરોધમાં આવી છે. ધારાસભ્યની ધરપકડના વિરોધમાં કોંગ્રેસ હવે ધરણાં કરશે. ઉલ્લેખનીય છે કે ગઈ કાલે પરસોતમ સાબરીયાની ધરપકડ કરાઈ છે.
સિંચાઈ યોજનાના કામોમાં ગેરરીતી આચરી હોવાના આરોપમાં તેઓની અને સાથો સાથ તેમના વકીલની પણ ધરપકડ કરવામાં આવી છે. ધારાસભ્ય પરસોતમ સાબરીયાએ 46 જેટલા કામો માટે એન્જીનયર્સને લાંચ આપી હોવાનો ખુલાસો થયો છે.
એટલું જ નહીં આ રીતે લાંચ આપીને પાંચ ગામોમાં ભ્રષ્ટાચાર આચર્યુ હોવાનો ખુલાસો થયો છે. મહત્વની વાત છે કે પરસોતમ સાબરીયાએ આ કામકાજમાં રૂ. 1 કરોડ 12 લાખનું કૌભાંડ આચર્યું છે. ત્યારે હવે કોંગ્રેસ પણ મેદાને આવ્યું છે.
ઉલ્લેખનીય છે કે મોરબી જિલ્લાને હચમચાવી નાંખનાર 20 કરોડના નાની સિંચાઈ યોજનામાં તપાસનીશ એ-ડિવિઝન પોલીસ દ્વારા હળવદના ધારાસભ્ય પરસોતમ સાબરીયા અને તેમના નજીકના સાથીદારને એ-ડિવિઝન પોલીસ મથકે લાવી પૂછપરછ શરૂ કરતાં સનસનાટી મચી ગઇ છે. પોલીસ વડાના જણાવ્યા અનુસાર ધારાસભ્ય પરસોત્તમ સાબરીયા અને તેમના વકીલની ધરપકડ કરાઇ છે.