ELECTION-2022 / નરેશ પટેલને મોટી જવાબદારી આપવાના ચક્કરમાં કોંગ્રેસમાં નિમણૂકો અટકી પડી, મોઢવાડીયા-બાબરિયાને મળી શકે છે મોટું પદ

• મિશન 2022માં નરેશ પટેલની રાહમાં કોંગ્રેસ અટવાઈ
• નરેશ પટેલે નિર્ણય ન કરતા કમિટીની નિમણૂક અટકી પડી
• નરેશ પટેલે હજી રાજકારણમાં પ્રવેશને લઇને નથી લીધો નિર્ણય 

ગુજરાતના રાજકારણમાં છેલ્લાં કેટલાંય સમયથી ખોડલધામના ચેરમેન નરેશ પટેલના રાજકીય પ્રવેશને લઇને ચાલતી અટકળોનો કોણ જાણે ક્યારે અંત આવશે. ટૂંક સમયમાં જ તેઓ રાજકારણમાં પ્રવેશને લઇને જાહેરાત કરશે આવુ અનેકવાર સાંભળ્યુ, એવુ પણ કહેવામાં આવી રહ્યું છે કે નરેશપટેલ કોંગ્રેસમાં જોડાશે પરંતુ હજી સુધી કોઇ સ્પષ્ટતા નરેશ પટેલે કરી નથી.  પરિણામે મિશન 2022ની તૈયારીઓમાં ક્યાંક કોંગ્રેસ પણ નરેશ પટેલની રાહમાં અટવાઇ હોય તેમ લાગી રહ્યું છે. 

કોંગ્રેસની કમિટીની નિમણૂંક અટકી પડી 

જી, હા મિશન 2022માં નરેશ પટેલની રાહમાં કોંગ્રેસ અટવાઇ પડી છે. નરેશ પટેલે નિર્ણય ન કરતા કમિટીની નિમણૂંક અટકી પડી છે.  કેમ્પેઇન, મેનિફેસ્ટો,પબ્લિસિટી ઇલેક્શન મેનેજમેન્ટ કમિટી સહિતની નિમણૂક અટકી પડી છે. નરેશ પટેલ કોંગ્રેસમાં જોડાય તો કેમ્પેઇન કમિટીના ચેરમેન બનાવવાનો કોંગ્રેસે નિર્ણય લીધો છે. ત્યારે શક્યતાઓ એ પણ છે કે મેનિફેસ્ટો કમિટીના ચેરમેનની જવાબદારી દીપક બાબરિયાને સોંપાઇ શકે છે. પબ્લિસિટી કમિટીના ચેરમેનની જવાબદારી સિદ્ધાર્થ પટેલને સોંપાઇ શકે છે. ઇલેક્શન મેનેજમેન્ટ કમિટીની જવાબદારી અર્જુન મોઢવાડિયાને સોંપાઈ શકે છે. પરંતુ જો નરેશ પટેલ કોંગ્રેસમાં ન જોડાય તો આ જવાબદારીઓ બદલાઇ શકે છે.  નરેશ પટેલના રાજકીય પ્રવેશ બાદ કોંગ્રેસની નિમણૂંકમાં ફેરફાર થઇ શકે છે.

નરેશ પટેલ જોવા મળ્યા ભાજપના નેતાઓ સાથે 

છેલ્લાં કેટલાંય સમયથી નરેશ પટેલ અને હાર્દિક પટેલને લઇને ગુજરાતનું રાજકારણ ગરમાયેલું જોવા મળી રહ્યું છે. ત્યારે નરેશ પટેલ કયા પક્ષમાં સક્રિય થશે તેની પર સૌ કોઇની નજર મંડરાયેલી છે. એવામાં આજે નરેશ પટેલ રાજકોટના રિબડા ખાતેના કાર્યક્રમમાં ભાજપ અગ્રણીઓ સાથે જોવા મળતા ફરીવાર રાજકીય વાતાવરણમાં ગરમાવો જોવા મળ્યો હતો. રાજકોટના રિબડામાં ભાગવત કથાનો કાર્યક્રમ હતો. જેમાં મોટા-મોટા અગ્રણીઓ સામેલ થયા હતાં. આ કાર્યક્રમમાં મોહન કુંડારિયા, પ્રદિપસિંહ અને કુંવરજી બાવળિયા એક સાથે દેખાયા હતાં. ત્યારે ખોડલધામના ચેરમેન નરેશ પટેલ કાર્યક્રમમાં ભાજપના અગ્રણીઓ સાથે જોવા મળ્યા હતા.