હૈદરાબાદ રેપ કાંડ / આજે કોંગ્રેસનું સડકથી સંસદ સુધી કેન્ડલ માર્ચ સાથે વિરોધ પ્રદર્શન

• હૈદરાબાદ ગેંગરેપની ચર્ચા સંસદમાં પણ
• કોંગ્રેસ સડકથી સંસદ સુધી કર્યું વિરોધ પ્રદર્શન
• કેન્ડલ માર્ચ કરીને દેખાડ્યો વિરોધ

ગેંગરેપની ઘટના સામે આવી ત્યારથી જ કોંગ્રેસના કાર્યકરો દિલ્હી અને અન્ય સ્થળો પર કેન્ડલ માર્ચ કરતા જોવા મળ્યા હતા. હવે આજે કોંગ્રેસ સંસદની બહાર આ ઘટના અને મહિલાઓની અસલામતીનો મુદ્દો ઉઠાવીને ઉગ્ર વિરોધ પ્રદર્શન કરશે. અહેવાલો અનુસાર, કોંગ્રેસ આજે આ મુદ્દો સંસદમાં પણ ઉઠાવશે.

પોલીસ આરોપીઓની વધારે કસ્ટડી માંગે તેવી શક્યતા

સૂત્રોના જણાવ્યા અનુસાર, સંસદ સભ્ય અને રાજ્ય પ્રધાન સંજીવ બાલિયાન આજે વડા પ્રધાન નરેન્દ્ર મોદીને મળશે. તેઓ હૈદરાબાદ ગેંગરેપ-મર્ડર કેસની સમગ્ર વિગતો વડા પ્રધાન મોદી સમક્ષ રજૂ કરશે. ઉલ્લેખનીય છે કે, આ કેસ અંગે વડા પ્રધાન દ્વારા હજુ સુધી સુધી કોઈ પ્રતિક્રિયા આપવામાં આવી નથી. હૈદરાબાદ ગેંગરેપ કેસની તપાસ કરી રહેલી પોલીસ આજે ચાર આરોપીઓની વધુ પૂછપરછ માટે અરજી કરીને તેમની કસ્ટડી માગે તેવી શક્યતા છે. ગત શુક્રવારે ચારેય આરોપી મોહમ્મદ આરિફ, નવીન, ચિંતાકુંતા કેશાવુલુ અને શિવાની ધરપકડ કરવામાં આવી હતી. હાલ આરોપીઓ ૧૪ દિવસની ન્યાયિક કસ્ટડીમાં છે.

આ રીતે બની હતી ઘટના

દરમિયાન, હૈદરાબાદની સરકારી હોસ્પિટલમાં વેટનરી મહિલા ડોક્ટર પર ગેંગરેપ બાદ તેની હત્યા કેસમાં નવો ચોંકાવનારો ખુલાસો થયો છે. પોલીસ ફરિયાદમાં લખવામાં આવ્યું છે કે, ગેંગરેપ અને મર્ડર પહેલાં આરોપીઓએ મહિલા ડોક્ટરને બળજબરીથી દારૂ પીવડાવ્યો હતો. ત્યારબાદ પીડિતાને ઘટનાસ્થળેથી ૨૭ કિલોમીટર દૂર લઈ જઈને પેટ્રોલ-ડીઝલ છાંટીને સળગાવી દીધી હતી. પોલીસના રિમાન્ડ રિપોર્ટમાં એમ પણ કહેવામાં આવ્યું છે કે, ટ્રક ચાલક અને ક્લિનરનું કામ કરતા ચારેય આરોપી મોહમ્મદ આરિફ, નવીન, ચિંતાકુંતા કેશાવુલુ અને શિવાએ મહિલાના સ્કૂટીમાં જાણી જોઈને પંચર પાડ્યું હતું. મહિલા ડોક્ટર ટોલ પ્લાઝા પર પોતાનું સ્કૂટી પાર્ક કરીને ટેક્સી ભાડે કરીને બહાર ગઈ હતી.

પોલીસ રિપોર્ટમાં કહેવાઈ છે આ વાત

પોલીસ રિપોર્ટ પ્રમાણે ત્રણ કલાક પછી મહિલા ડોક્ટર પાછી આવી ત્યારે તેણે જોયું કે તેના સ્કૂટીમાં પંચર પડી ગયું હતું. આ દરમિયાન ચારેય આરોપીઓએ મહિલા ડોક્ટરને મદદ કરવાની વાત કરી હતી. આ દરમિયાન આરોપીઓએ જોયું કે મહિલા ડોક્ટર કોઈ સાથે ફોન પર વાત કરી રહી હતી. ત્યારબાદ ચારમાંથી ત્રણ આરોપીઓએ મહિલા ડોક્ટરને ખેંચીને ઝાડીઓમાં લઈ ગયા હતા. અહીં તેમણે પીડિતાનો મોબાઈલ ફોન સ્વિચ ઓફ કરી દીધો હતો. પોલીસ રિપોર્ટમાં જણાવાયું છે કે, ગેંગરેપ દરમિયાન મહિલા મદદ માટે સતત બૂમો પાડી રહી હતી. આથી મહિલાના અવાજને બંધ કરવા આરોપીઓએ તેને બળજબરીથી દારૂ પીવડાવ્યો હતો. ગેંગરેપના કારણે મહિલા બેભાન થઈ ગઈ હતી. આરોપીઓને જ્યારે જાણ થઈ કે મહિલા ભાનમાં આવી રહી છે ત્યારે તેમણે તેનું ગળું દબાવીને મારી નાખી હતી.