ગાંધીનગરઃ જિલ્લા પંચાયતો બચાવવા કોંગ્રેસ હવે મેદાને પડી છે. રાજ્યની ચાર જિલ્લા પંચાયત બચાવવા કોંગ્રેસે કવાયત હાથ ધરી છે. અમદાવાદ દાહોદ દેવભૂમિ દ્વારકા અને ભાવનગર જિલ્લા માટે કોંગ્રેસે કવાયત હાથ ધરી છે. કોંગ્રેસ ચાર જિલ્લામાં પાતળી બહુમતીથી સત્તા પર આવી છે.
તો નવા હોદ્દેદારોની નિમણૂક વખતે ચાર જિલ્લામાં ભડકાનાં એંધાણ લાગી રહ્યાં છે. કોંગ્રેસની સ્થિતિ જોઈ ભાજપે સત્તા મેળવવા માટે કારસો રચ્યો છે. ભાજપની રણનીતિમાં કોંગ્રેસના સભ્યો ના ફસાય તે માટે પણ કોંગ્રેસ સક્રિય થઈ છે. મોવડી મંડળે જિલ્લા નિરિક્ષકો અને હોદ્દેદારોને દોડતા કર્યા છે.
અમદાવાદમાં કોંગ્રેસ પાસે 18 અને ભાજપ પાસે 15 બેઠક છે. ભાજપ દ્વારા કોંગ્રેસના સભ્યોને પોતાના તરફ ખેંચવાના પ્રયાસો હાથ ધર્યા છે. દેવભૂમિ દ્વારકામાં કોંગ્રેસ અને ભાજપ પાસે 10-10 સભ્યો છે. અપક્ષની મદદથી ભાજપ સત્તા મેળવવા પ્રયત્નશીલ છે.
દેવભૂમિ દ્વારકા કોંગ્રેસના હાથમાંથી સરકી જાય એવું પણ લાગી રહ્યું છે. દાહોદમાં કોંગ્રેસ પાસે 25 અને ભાજપ પાસે 22 સભ્યો છે. દાહોદમાં કોંગ્રેસના ખટરાગનો ભાજપ ફાયદો ઉઠાવવાના મૂડમાં દેખાઈ રહી છે. ભાવનગરમાં કોંગ્રેસ પાસે 23 અને ભાજપ પાસે 17 સભ્યો છે.
ભાવનગરમાં કોંગ્રેસને બહુમતી છતા પણ જિલ્લા પંચાયત ભયમાં લાગે છે. તો ભાજપ પ્રદેશ અધ્યક્ષ જીતુ વાઘાણીના જિલ્લામાં પણ ભાજપ આક્રમક મૂડમાં દેખાય છે. તો નવા નિમાયેલા અમિત ચાવડા અને પરેશ ધાનાણી વચ્ચે અગ્નિ પરીક્ષા હોય એમ લાગે છે.