બંગાળ ચૂંટણી માટે કોંગ્રેસ દ્વારા શુક્રવારે પોતાના 30 સ્ટાર પ્રચારકોની યાદી જાહેર કરવામાં આવી હતી.
કોંગ્રેસની સ્ટાર પ્રચારકોની યાદી જાહેર
બંગાળ ચૂંટણી માટે ઉમેદવારોના નામ ગયા અઠવાડિયે જાહેર કરી ચૂકી છે કોંગ્રેસ
બંગાળમાં 1 એપ્રિલે યોજાશે પ્રથમ ચરણનું મતદાન
મહત્વનું છે કે બંગાળમાં હવે ટૂંક જ સમયમાં ચૂંટણી યોજાવા જઈ રહી છે અને આ ચૂંટણીમાં જો કે મુખ્ય લડાઈ તો ભાજપ અને ટીએમસી વચ્ચે જણાઈ રહી છે પરંતુ આ વખતે કોંગ્રેસ પણ જાણે કે આ મામલે પાછળ નથી રહેવા માંગતી તેમ તેણે સ્ટાર પ્રચારકોની યાદી જાહેર કરી છે, પણ આમાં મહત્વનું એ છે કે આ વખતે આ લિસ્ટમાં G23ના બળવાખોર નેતાઓમાંથી એકના પણ નામ સામેલ નથી.
આ લોકોના નામ સામેલ છે
આ સ્ટાર પ્રચારકોની યાદીમાં સોનિયા ગાંધી, રાહુલ ગાંધી, પ્રિયંકા ગાંધી અને અન્ય ઘણા મોટા નેતાઓના નામ સામેલ છે. પરંતુ બળવાખોર ગણાયેલા કોઈ પણ જી23 ગ્રુપના નેતાઓના નામ આ લિસ્ટમાં સામેલ નથી કરવામાં આવ્યા.
મહત્વનું છે કે ગાંધી પરિવારના સભ્યોની સિવાય સચિન પાયલોટ, નવજોતસિંહ સિદ્ધુ, અભિજીત મુખર્જી, મોહમ્મદ અઝહરૂદ્દીન જેવા નેતાઓના નામ આ લિસ્ટમાં સામેલ છે. જો કે આમની સાથે જ પંજાબના સીએમ કેપ્ટન અમરિન્દર સિંહ, રાજસ્થાનના મુખ્યમંત્રી અશોક ગેહલોત, છત્તીસગઢના સીએમ ભૂપેશ બઘેલ અને મલ્લિકાર્જુન ખડગે, રણદીપ સૂરજેવાલા, રેણુકા ચૌધરી, અધીર રંજન ચૌધરી, અખિલેશ પ્રસાદ સિંહ, પવન ખેરા, સલમાન ખુર્શીદ, અબ્દુલ મન્નાન જેવા નેતાઓના નામો સામેલ છે.
ઉમેદવારોના નામ પણ જાહેર કરી ચૂકી છે પાર્ટીઓ
મહત્વનું છે કે આની પહેલા કોંગ્રેસે ગયા અઠવાડિયે જ ઉમેદવારોના નામોની સૂચિ જાહેર કરી હતી જેમાં 13 ઉમેદવારોના નામો સામેલ છે અને ભાજપ પહેલા બંને ચરણો માટે 57 ઉમેદવારોના નામ જાહેર કરી ચૂકી છે સાથે જ ટીએમસી પણ પોતાના ઉમેદવારોના નામ જાહેર કરી ચૂકી છે. નોંધનીય છે કે આ વખતે 294 સીટો વાળી બંગાળ વિધાનસભાની ચૂંટણીમાં 8 ચરણોમાં મતદાન થવાનું છે અને1,6,10,17,22,26,29 એપ્રિલના રોજ વોટિંગ કરવામાં આવશે, જો કે 2 મેના રોજ પરિણામ આવશે.