દિલ્લી / કોંગ્રેસે ઉમેદવારના નામની યાદી કરી જાહેર, શીલા દિક્ષિત-અજય માકનને ટિકિટ

દિલ્લી કોંગ્રેસે લોકસભા ચૂંટણી માટે 6 ઉમેદવારોની યાદી જાહેર કરી છે. કોંગ્રેસે જાહેર કરેલી યાદી મુજબ પૂર્વ મુખ્યમંત્રી શીલા દિક્ષિત ઉત્તર-પૂર્વ દિલ્લીથી ચૂંટણી લડશે. જ્યારે અજય માકનને નવી દિલ્લીથી ટિકિટ ફાળવવામાં આવી છે. જ્યારે પૂર્વ દિલ્લીથી અરવિંદરસિંહ લવલી, ચાંદની ચોકથી જે.પી.અગ્રવાલ, પશ્ચિમ દિલ્લીથી મહાબલ મિશ્રા અને ઉત્તર-પશ્ચિમ દિલ્લીથી રાજેશ લીલોથિયાને ટિકિટ ફાળવવામાં આવી છે.
 
ઉલ્લેખનીય છે કે, પૂર્વ સીએમ શીલા દિક્ષિત સામે ભાજપના નેતા મનોજ તિવારીની ટક્કર થશે. જ્યારે ચાંદની ચોકથી જે.પી.અગ્રવાલ અને ભાજપના નેતા હર્ષવર્ધન વચ્ચે જંગ જામશે. ઉલ્લેખનીય છે કે લોકસભાની ચૂંટણીને લઇને ત્રીજા ચરણ માટે ચૂંટણી પ્રચારના પડઘમ શાંત થઇ ગયા છે, જ્યારે ચોથા ચણ માટે પક્ષો એડીચોટીનું જોર લગાવી રહ્યાં છે.
 
છેલ્લા કેટલાક સમયથી દિલ્લીમાં કોંગ્રેસ અને આપ વચ્ચે ગઠબંધનને લઇને અટકળો તેજ જોવા મળી રહી હતી. આમ આજરોજ આપ સાથેના ગઠબંધન પર પૂર્ણવિરામ મૂકતાં કોંગ્રેસે આગામી લોકસભાની ચૂંટણીને લઇને પોતાના 6 ઉમેદવારોના નામ જાહેર કરી દીધા છે.
 
આમ દિલ્લીમાં કોંગ્રેસ હવે લોકસભાની ચૂંટણી એકલા હાથે લડી લેવાના મૂડમાં જોવા મળી રહી છે. મંગળવારે દિલ્લીમાં નામાંકન ભરવાનો અંતિમ દિવસ પહેલા કોંગ્રેસની આ યાદી બહાર પાડવામાં આવી છે. જો કે બીજી તરફ ભાજપ હજી સુધી પોતાના ત્રણ ઉમેદવાર જાહેર કરી શકી નથી.  જો કે ઉત્તર-પૂર્વી દિલ્લી બેઠક પર મુકાબલો રોમાંચક જોવા મળશે જેમાં ભાજપના પ્રદેશ અધ્યક્ષની સામે કોંગ્રેસ પ્રદેશ અધ્યક્ષ વચ્ચે ચૂંટણી જંગ જામશે. આમ આ બેઠક પર ભાજપના મનોજ તિવારી જ્યારે કોંગ્રેસમાંથી શીલા દીક્ષિત વચ્ચે ટક્કર જામશે.