કોંગ્રેસ નેતા રાહુલ ગાંધીએ કઠુઆમાં વરસાદથી બચવા માટે રેઈનકોટ પહેર્યો હતો. તેમનો નવો લુક ઝડપથી વાયરલ થઈ ગયો. જોકે, વરસાદ બંધ થતાં જ તેમણે રેઈનકોટને ઉતારી દીધો હતો.
રાહુલ ગાંધીએ કઠુઆમાં વરસાદથી બચવા માટે રેઈનકોટ પહેર્યો
રાહુલ ગાંધીનો નવો લુક ઝડપથી થઈ ગયો વાયરલ
લોકોએ વીડિયો વાયરલ કરતાં કોંગ્રેસે કહ્યું- જેકેટ નહીં રેઈનકોટ હતો
રાહુલ ગાંધીની ભારત જોડો યાત્રા જોરશોરથી ચાલુ છે. આ યાત્રા કઠુઆના રસ્તેથી કેન્દ્રશાસિત પ્રદેશ જમ્મુ-કાશ્મીરમાં પ્રવેશી. આ દરમિયાન હવામાનમાં પણ બદલાયું અને વરસાદ શરૂ થઈ ગયો. જેથી ટી-શર્ટમાં ફરતા રાહુલ ગાંધી રેઈનકોટમાં જોવા મળ્યા. જોકે, વરસાદ બંધ થતાંની સાથે જ તેમણે રેઈનકોટ ઉતારી દીધો અને ફરીથી તેમના જૂના અંદાજમાં પાછા ફર્યા.
રાહુલ ગાંધીના જેકેટની ચર્ચા થવા લાગી
શરૂઆતમાં લોકોને લાગતું હતું કે જમ્મુની ઠંડી જોઈને રાહુલ ગાંધીએ જેકેટ પહેરી લીધું છે. આ પછી સોશિયલ મીડિયા પર રાહુલ ગાંધીના જેકેટની ચર્ચા થવા લાગી. જોકે બાદમાં કોંગ્રેસે જ સોશિયલ મીડિયા પર સ્પષ્ટતા કરી હતી કે રાહુલ ગાંધીએ રેઈનકોટ પહેર્યો હતો, જેકેટ નહીં. આ પછી પાર્ટી દ્વારા એક વીડિયો શેર કરવામાં આવ્યો, જેમાં તેઓ વરસાદ બંધ થતાં જ પોતાનો રેઈનકોટ ઉતારતા જોવા મળે છે. આ સાથે કોંગ્રેસે લખ્યું, "Rain over, Raincoat gone..."
કન્યાકુમારીથી યાત્રાની કરી હતી શરૂઆત
આપને જણાવી દઈએ કે, રાહુલ ગાંધીએ કન્યાકુમારીથી ભારત જોડો યાત્રાની શરૂઆત કરી હતી. આ યાત્રા તેના અંતિમ તબક્કામાં છે, જેનું શ્રીનગરમાં સમાપન થશે. જમ્મુ-કાશ્મીરની સરહદમાં દાખલ થતાં પહેલા રાહુલ ગાંધીએ કહ્યું કે, હું જાણું છું કે અહીંના લોકો પીડામાં છે. હું તેમનું દર્દ સમજું છું, તેથી જ હું તેને વહેંચવા આવ્યો છું. અહીં દરેક વ્યક્તિ પરેશાન છે, હું તેમની સાથે ઉભો રહેવા આવ્યો છું.
30 જાન્યુઆરીએ ભારતો જોડો યાત્રાનું થશે સમાપન
કોંગ્રેસના નેતાઓના જણાવ્યા અનુસાર, 7 સપ્ટેમ્બર 2022ના રોજ રાહુલ ગાંધીએ કન્યાકુમારીથી યાત્રાની શરૂઆત કરી હતી. જે 13 રાજ્યોમાંથી પસાર થઈ. આ યાત્રા હવે જમ્મુ-કાશ્મીરમાં છે, જ્યાં તે કુલ 9 દિવસ સુધી રહેશે. આ પછી 30 જાન્યુઆરીએ ભારત જોડો યાત્રાનું સમાપન થશે.
ટી-શર્ટ રહ્યું ચર્ચામાં
જ્યારે રાહુલ ગાંધીએ યાત્રા શરૂ કરી, ત્યારે દક્ષિણ ભારતમાં ગરમી હતી, પરંતુ જ્યારે ભારત જોડો યાત્રાની એન્ટ્રી ઉત્તર ભારતમાં થઈ ત્યારે ત્યાં કડકડતી ઠંડી પડી રહી હતી. તેમ છતાં રાહુલ ગાંધી તેમની સફેદ ટી-શર્ટમાં જોવા મળ્યા હતા. તેમના આ અંદાજે સોશિયલ મીડિયા પર ઘણી હેડલાઈન્સ બનાવી હતી.