ખુરશીનો મોહ  / હું રિટાયર થઉં છું, મારા પુત્રને ટિકિટ આપો: ચૂંટણી પહેલા કોંગ્રેસમાં ખેંચતાણ શરૂ, જાણો કયા નેતા આવ્યા મેદાનમાં 

• છોટા ઉદેપુર કોંગ્રેસમાં ટિકિટ માટે વિવાદ
• ત્રણ મોટા નેતાઓએ દીકરા માટે માગી ટિકિટ
• બે બેઠક પર ત્રણ નેતાઓએ માગી ટિકિટ

ગુજરાત વિધાનસભાની ચૂંટણી નજીક આવતાની સાથે જ ટિકિટ માટેની પેરવી માટે નેતાઓ અત્યારથી જ લાગી ગયા છે. ખાસ કરીને કોંગ્રેસમાં પહેલાથી જ કકળાટ શરૂ થઈ ગયો છે. પરિવારવાદના આમ પણ કોંગ્રેસ પર આરોપ લાગી રહ્યા છે. જેનું જીવતું જાગતું ઉદાહરણ છોટાઉદેપુર જિલ્લામાં જોવા મળ્યું છે.રાજ્યસભાના સાંસદ નારણ રાઠવાએ પોતાના પુત્ર માટે ટિકિટની માંગ કરી કોંગ્રેસ પર પ્રેશર બનાવવાના પ્રયાસ કર્યા છે.

હું નિવૃતિ જાહેર કરું છું, પુત્રને ટિકિટ આપો - નારણ રાઠવા
છોટા ઉદેપુર જિલ્લા કોંગ્રેસમાં ત્રણ મોટા નેતાઓએ પોતાના દિકરા માટે ટિકિટ માંગી છે. નારણ રાઠવાએ પુત્ર સંગ્રામ રાઠવા માટે વિધાનસભા ટિકિટની માંગણી કરી ફરી પરિવારવાદ આલાપતા કહ્યું કે હું નિવૃતિ જાહેર કરું છું, માટે મારા પુત્રને ટિકિટ આપવામાં આવે, મોહનસિંહ રાઠવા માટે અમે બે વખત બેઠક ખાલી કરી છે. છોટા ઉદેપુરમાં ટિકિટ મારા પુત્રને મળવી જોઇએ. છોટા ઉદેપુર બેઠક પર હાલ મોહન રાઠવા ધારાસભ્ય તરીકે છે. મોહન રાઠવાની ઉંમર થતા નારણ રાઠવા મેદાનમાં આવ્યા છે. નારણ રાઠવાએ ધારાસભ્ય સુખરામ રાઠવાને પણ સલાહ આપી છે અને કહ્યું કે સુખરામ પોતાના જમાઇ અથવા બીજા માટે જગ્યા કરે. 

જુથવાદ, પરિવારવાદથી ધરાયેલી કોંગ્રેસ ક્યારે બહાર આવશે
આ નિવેદન પરથી અંદાજો લગાવી શકાય છે કે કોંગ્રેસના પરિવારવાદના મૂળ એટલા ઊંડા છે તેણે કાઢી શકાય તેમ નથી. છોટા ઉદેપુર બેઠક પર ઘણા વર્ષોથી કોંગ્રેસના અન્ય કાર્યકર્તા પણ દિવસ રાત એક કરી મહેનત કરી રહ્યા છે. પણ આ બેઠક પર કબજો જમાવી બેઠેલા કોંગ્રેસના જૂના જોગીઓ તેમના બાદ હવે પુત્ર અને સંબંધીઓના સોગઠાં ગોઠવી રહ્યા છે. એક તરફ કોંગ્રેસ AAPના આવવાથી પહેલાથી હાસિયામાં ધકેલાઈ ગઈ છે. બીજી બાજુ જુથવાદ અને પરિવારવાદ કોંગ્રેસને ઉધઈની જેમ કોતરી રહ્યો છે. ત્યારે આવનાર સમય કોંગ્રેસમાં એક સાંધે ત્યાં તેર તૂટે તેવો ઘાટ સર્જાય તેનો રાજકિય પંડિતો  સંકેત આપી રહ્યા છે.

છોટા ઉદેપુર જિલ્લામાં વિવાદ શું 

• છોટા ઉદેપુર જિલ્લામાં કોંગ્રેસનો દબદબો છે 
• કોંગ્રેસના ત્રણ મોટા આદિવાસી નેતા આ જિલ્લામાંથી આવે છે
• નારણ રાઠવા, સુખરામ રાઠવા, મોહન રાઠવા છોટા ઉદેપુરમાંથી આવે છે
• ત્રણ મોટા નેતા વચ્ચે વિધાનસભાની બે બેઠક વહેચાયેલી છે 
• પાવી જેતપુર-છોટા ઉદેપુર બન્ને બેઠક પર મોટા નેતાનો દબદબો
• આ બે બેઠક પર ત્રણ મોટા નેતા પોતાના દિકરા માટે ટિકિટ માંગે છે 
• નારણ રાઠવા હાલ રાજ્યસભાના સાંસદ છે 
• નારણ રાઠવા તેના પુત્ર સંગ્રામ રાઠવા માટે છોટા ઉદેપુર માંગે છે 
• છોટા ઉદેપુરની બેઠક પર હાલ મોહન રાઠવા ધારાસભ્ય છે 
• બીજી બેઠક પાવી જેતપુર બેઠક પર સુખરામ રાઠવા ધારાસભ્ય છે 
• હાલમાં ત્રણેય આદિવાસી નેતાની ઉંમર થઇ ગઇ છે 
• હવે વારસદારો માટે છોટા ઉદેપુર જિલ્લામાં જંગ જામ્યો છે