વિરોધ / VIDEO: હજુ તો ઉપરના કપડાં ઉતાર્યા છે, સરકાર નહીં માને તો નગ્ન થઈશું: વિધાનસભા બહાર કોંગ્રેસ ધારાસભ્યોના ધરણાં

• ખેડૂતોને સિંચાઈ, વીજળીના મુદ્દે કોંગ્રેસનો વિરોધ
• 6 કલાક જ વીજળી મળતી હોવાનો આરોપ
• વિધાનસભા ગેટ આગળ કોંગ્રેસનો વિરોધ

વિધાનસભા ગૃહમાં આ વખતે ખેડૂતોના મુદ્દા ચર્ચામાં રહ્યા. તેમાં પણ ખાસ કરીને  વીજળી અને પાણી મુદ્દે કોંગ્રેસે રાજ્ય સરકારને ઘેરવાનો પ્રયત્ન કર્યો. કોંગ્રેસ દ્વારા આક્ષેપો કરવામાં આવ્યા કે સરકાર નિયમિત રૂપે વીજળી અને પાણી ન આપતી હોવાથી ખેડૂતોની મુશ્કેલીમાં વધારો થયો છે. આ અંગે કોંગ્રેસના વિવિધ ધારાસભ્યો દ્વારા સરકારને બાનમાં લઇને  આક્ષેપ કરવામાં આવ્યા હતા. ત્યારે હવે ફરી એકવાર કોંગ્રેસ ખેડૂતોના પ્રશ્નોને લઇને રસ્તા પર ઉતરી આવ્યું છે. ગાંધીનગરમાં ખેડૂતોના પ્રશ્નોને લઇને ધારાસભ્યોએ વિધાનસભા ગેટ આગળ બેસી જઇને વિરોધ નોંધાવ્યો.

કપડા કાઢી નોંધાવ્યો વિરોધ

રાજ્યના ખેડૂતોને આઠ કલાક વીજળી આપવામાં આવે, સિંચાઇ માટે પાણી આપવામાં આવે તેવી માંગ સાથે કોંગ્રેસના ધારાસભ્યો વિરોધ નોંધાવી રહ્યા છે. ખેડૂતોના પ્રશ્નોને લઇને કોંગ્રેસ એટલુ આકરા પાણીએ છે કે ધારાસભ્યોએ શર્ટ કાઢીને વિરોધ નોંધાવ્યો અને જો સરકાર આ અંગે કોઇ નિરાકરણ નહી લાવે તો આગામી સમયમાં વિધાનસભામાં નગ્ન થઇને વિરોધ કરવાની પણ લલિત વસોયાએ ચીમકી ઉચ્ચારી હતી. તો ધારાસભ્ય વિમલ ચૂડાસમાએ પણ કહ્યું કે માત્ર કપડા ઉતારીને નહી પરંતુ ખેડૂતો માટે જીવ આપવા પણ તૈયાર છીએ.

સૌરાષ્ટ્રમાં આંદોલનની ચીમકી

રાજ્ય સરકાર દ્વારા બાંહેધરી આપવામાં આવી હતી કે ખેડૂતોને આઠ કલાક વીજળી આપીશું પરંતુ ધારાસભ્ય હર્ષદ રિબડીયાએ વીટીવી ન્યૂઝ સાથે વાત કરતા આક્ષેપ લગાવ્યો કે સરકાર 6 કલાક જ વીજળી આપે છે  ખેડૂતોએ બિયારણ વાવી દીધા છે પરંતુ પાણી વિના બિયારણ ફેલ જાય તેવી સ્થિતિ છે. જો સરકાર બે દિવસમાં કન્ટીન્યુ આઠ કલાક વીજળી નહી આપે તો સૌરાષ્ટ્રમાં જઇને જલદમાં જલદ આંદોલન કરીશું

'ખેડૂતો લૂંટાઇ રહ્યા છે '

કોંગ્રેસના ધારાસભ્ય વીરજી ઠુમ્મરે ખેડૂતોની સમસ્યા અંગે જણાવ્યુ કે સરકાર 6કલાક પણ વીજળી આપવામાં નિષ્ફળ નીવડી છે. સરકાર ઉદ્યોગપતિને છાવરે છે અને ખેડૂતોને લૂંટતી હોવાનો આરોપ લગાવ્યો હતો. તો કિરીટ પટેલે આક્ષેપ કર્યો હતો કે સરકારે વિધાનસભામાં જે આંકડા આપ્યા છે તેના કરતા વધારે વીજ ઉત્પાદન થયુ છે તેમ છતાં સરકાર પુરતી વીજળી આપતી નથી.  મહત્વનુ છે કે વિધાનસભાના ગેટ પાસે કોંગ્રેસના ધારાસભ્યોએ પ્લેકાર્ડ લઇને વિરોધ નોંધાવ્યો હતો. પુંજા વંશ, ભીખા જોશી, શિવાભાઇ ભુરિયા, લલિત વસોયા, રઘુ દેસાઇ, કિરીટ પટેલ સહિતના ધારાસભ્યો વિરોધ પ્રદર્શનમાં જોડાયા હતા. 

 દંડક પંકજ દેસાઈએ પોઈન્ટ ઓફ ઓર્ડર ઉઠાવ્યો

ખેડૂતો મુદ્દે કોંગ્રેસના ધારાસભ્યોના વિરોધનો મામલો વિધાનસભામાં પણ ગૂંજ્યો.  ભાજપ દંડક પંકજ દેસાઈએ પોઈન્ટ ઓફ ઓર્ડર ઉઠાવ્યો અને અધ્યક્ષને રજૂઆત કરતા જણાવ્યુ કે કોંગ્રેસ ધારાસભ્યોના આવા વર્તન બદલ ઠપકો આપો, તેઓએ વિધાનસભા સંકુલમાં શર્ટ કાઢીને વિરોધ કર્યો છે જે ચલાવી ન લેવાય. વિધાનસભામાં પણ મહિલાઓની અવર જવર હોય છે.