ગુજરાત વિધાનસભાની ચૂંટણી પહેલાં કોંગ્રેસે રાજ્યની જનતાને સરકાર બનવા પર રાજ્યમાં જૂની પેન્શન યોજના લાગુ કરવાનું વચન આપ્યું છે.
ચૂંટણી પહેલાં કોંગ્રેસનું ગુજરાતની જનતાને વચન
જૂની પેન્શન યોજના શરૂ કરવાનું કોંગ્રેસનું વચન
ચિરંજીવી સ્વાસ્થ્ય યોજના લાગુ કરવાનું પણ વચન
ગુજરાત વિધાનસભાની ચૂંટણીને લઈને કોંગ્રેસ એક્શન મોડમાં આવી છે. કોંગ્રેસે ચૂંટણી પહેલા ગુજરાતની જનતાને વધુ એક વચન આપ્યું છે. રાજ્યમાં કોંગ્રેસની સરકાર બનવા પર જૂની પેન્શન યોજના લાગુ કરવાનું કોંગ્રેસે વચન આપ્યું છે. ગુજરાતમાં કોંગ્રેસ સ્વાસ્થ્ય અને સરકારી કર્મીઓ માટે તેમજ કૃષિક્ષેત્રે રાજસ્થાન મોડલ અપનાવશે.
કોંગ્રેસની સરકાર બનશે તો જૂની પેન્શન યોજના લાગુ કરીશું
રાજસ્થાનના મુખ્યમંત્રી અશોક ગેહલોતે રાજસ્થાન જેવું જ આરોગ્યનું મોડલ ગુજરાતમાં લાગુ કરવાનું વચન આપ્યું છે તેમજ જૂની પેન્શન યોજના લાગુ કરવાનું કોંગ્રેસે વચન આપ્યું છે. કોંગ્રેસે જો ગુજરાતમાં અમારી સરકાર બનશે તો ચિરંજીવી સ્વાસ્થ્ય યોજના લાગુ કરીશું તેવું વચન આપ્યું છે.
જાણો શું હતી જૂની પેન્શન યોજના?
નિવૃત્તિ બાદ દર મહિને પેન્શન તરીકે મળતી હતી નિશ્ચિત રકમ
સરકાર આપતી હતી પેન્શનની સંપૂર્ણ રકમ
આ રકમ કર્મચારીના છેલ્લા પગારના 50 % હતી
કોઈ કર્મચારી 10 વર્ષની સેવા પછી નિવૃત થવા પર પણ આ ફોર્મ્યુલા હેઠળ મળતું હતું પેન્શન
પહેલા પેન્શન માટે પગાર કાપવામાં આવતો નહોતો
નિવૃત્તિ બાદ 16.5 મહિનાનો પગાર ગ્રેજ્યુઈટી તરીકે આપવામાં આવતો હતો
નોકરી દરમિયાન મૃત્યુના કેસમાં 20 લાખ ગ્રેજ્યુઈટી મળતી હતી
આશ્રિતને પણ મળતી હતી સરકારી નોકરી
પેન્શન દરમિયાન મોંઘવારી ભથ્થું પણ મળતું હતું
આરોગ્ય માટે વીમા કંપનીનું પ્રિમિયમ સરકાર ભરશે
કોંગ્રેસે જણાવ્યું કે, એ સિવાય અલગ-અલગ અંગોના ટ્રાન્સપ્લાન્ટ વિનામૂલ્યે થઈ શકે તેવી પણ વ્યવસ્થા કરીશું. તદુપરાંત જણાવ્યું કે, આરોગ્ય માટે વીમા કંપનીનું પ્રિમિયમ સરકાર ભરશે. ખેડૂતોને દિવસે વીજળી અપાશે. ગ્રામીણ વિસ્તારમાં સરકારી અંગ્રેજી શાળાઓ શરૂ કરાશે. આ મામલે અશોક ગેહલોતે જણાવ્યું કે, 'ગુજરાતની જનતા જે ઈચ્છે તે કોંગ્રેસનો મેનિફેસ્ટો છે.'
રાજસ્થાન જેવું આરોગ્ય મોડલ ગુજરાતમાં લાગુ કરીશું
વિધાનસભા 2022ની ચૂંટણીને લઇને ગુજરાત ઓબ્ઝર્વર અશોક ગેહલોત અને કોંગ્રેસના સંગઠન મહામંત્રી કે.સી વેણુગોપાલ દ્વારા પત્રકાર પરિષદ યોજવામાં આવી. દરમ્યાન અશોક ગેહલોતે જણાવ્યું કે, 'અમે ચૂંટણી જીતવા માટે મેદાનમાં ઉતર્યા છીએ. ગુજરાત કરતા રાજસ્થાનના રસ્તાઓ સારા છે. અમારા મેનુફેસ્ટો મુજબ રાજસ્થાનમાં કામ થઇ રહ્યું છે. રાજસ્થાનમાં સ્વાસ્થ્યની શાનદાર યોજના છે. જે દેશભરમાં લાગુ કરી શકાય તેવી યોજના છે. રાજસ્થાનમાં અમીર ગરીબ તમામ માટેની આ યોજના છે. તમામને વીમો, સીટીસ્કેન, દવાઓ ફ્રી આપીએ છીએ. રાજસ્થાન જેવું આરોગ્ય મોડલ ગુજરાતમાં લાગુ કરીશું. કોંગ્રેસ માટે ગુજરાત મહત્વનું રહ્યું છે. 2004 બાદ નિયક્ત કર્મચારીઓને જૂની પેન્શન યોજનાનો લાભ અપાશે. કોંગ્રેસ આવશે તો અલગ કૃષિ બજેટ હશે. કૃષિ વીજ કનેક્શન પર પ્રતિ મહિને 1000ની સબસિડી અપાશે. ડેર પર પશુપાલકોને દૂધ પ્રતિ લિટર રૂ. 5ની સબસિડી અપાશે. ઈન્દિરા ગાંધી શહેરી રોજગાર ગેરંટી યોજના લાગુ કરીશું. રાજસ્થાનમાં વિધવા મહિલાઓને 1 લાખની સહાય આપીએ છીએ. રાજસ્થાનમાં અનાથ બાળકોને રૂ.1 લાખની મદદ મળી રહી છે.'