અલ્પેશ ઠાકોરે કોંગ્રેસમાંથી તમામ પદ પરથી રાજીનામુ આપ્યા બાદ કોંગ્રેસ અલ્પેશની સામે લડી લેવા માટે તૈયાર છે. ધારાસભ્યપદ છીનવા માટે ગુજરાત કોંગ્રેસ હવે હાઈકોર્ટમાં અલ્પેશ ઠાકોર વિરુદ્ધ પિટીશન દાખલ કરવાનું વિચારી રહ્યું છે.
કોંગ્રેસના કડક પગલાના કારણે અલ્પેશ ઠાકોરની મુશ્કેલીમાં વધારો થઈ શકે છે. કોંગ્રેસ અલ્પેશ ઠાકોરનું ધારાસભ્ય પદ રદ કરવા માટે હાઈકોર્ટમાં પિટીશન કરી શકે છે. પિટીશન માટે કોંગ્રેસે લિગલ ટીમ પાસે ડ્રાફ્ટ પણ તૈયાર કરાવ્યો છે. મહત્વનું છે કે દોઢ મહિના પહેલા વિધાનસભા અધ્યક્ષને અરજી કરી હતી. જે મામલે હજુ સુધી કોઈ જ નિર્ણય ન લેવામાં આવતાં કોંગ્રેસ હવે હાઈકોર્ટમાં જઈ શકે છે.
આ પહેલા કોંગ્રેસ અલ્પેશ ઠાકોરને પક્ષમાંથી દૂર કરવાની કાર્યવાહી પણ શરૂ કરી હતી, પક્ષ છોડ્યાના ચાર દિવસ બાદ અલ્પેશ ઠાકોરે કોંગ્રેસમાંથી રાજીનામું આપી દીધું હતું. અલ્પેશે કોંગ્રેસ પક્ષ છોડ્યા બાદ અપક્ષ ઉમેદવારને સમર્થન જાહેર કરતા કોંગ્રેસે તેની સામે પક્ષ-વિરોધી કામ કરવાનો આરોપ લગાવીને કડક પગલા લેવાનો નિર્ણય કર્યો હતો. આ દરમિયાન કોંગ્રેસે અલ્પેશ ઠાકોરને બિહારના સહપ્રભારી પદેથી પણ હટાવી દીધો હતો.