કોંગ્રેસ સાંસદ પરનીત કૌર શનિવારે ભાજપની એક બેઠકમાં શામેલ થયા અને પંજાબ વિધાનસભા ચૂંટણીમાં પોતાના પતિ કેપ્ટન અમરિંદર સિંહ માટે વોટ માગ્યા હતા.
પંજાબ ચૂંટણી પહેલા કોંગ્રેસમાં બળવો
કોંગ્રેસ સાંસદ ભાજપની બેઠકમાં પહોંચ્યા
પતિ માટે થઈને પાર્ટી સામે બળવો કર્યો
કોંગ્રેસ સાંસદ પરનીત કૌર શનિવારે ભાજપની એક બેઠકમાં શામેલ થયા અને પંજાબ વિધાનસભા ચૂંટણીમાં પોતાના પતિ કેપ્ટન અમરિંદર સિંહ માટે વોટ માગ્યા હતા. ગત વર્ષે કોંગ્રેસ હાઈકમાન્ડ દ્વારા પંજાબ કોંગ્રેસ પ્રમુખ નવજોત સિંહ સિદ્ધુ સાથે કડવા અનુભવ બાદ મુખ્યમંત્રી પદેથી હટાવ્યા બાદ અમરિંદર સિંહે પોતાની પાર્ટી પંજાબ લોક કોંગ્રેસ બનાવી હતી.
કોંગ્રેસ સાંસદ ભાજપની બેઠકમાં જઈને બેઠા
પટિયાલાથી સાંસદ કૌરે ભાજપની બેઠકમાં ભાગ લીધો, જે ભગવા પાર્ટીને સહયોગી અમરિંદર સિંહ માટે આયોજીત કરવામાં આવી હતી. અમરિંદર સિંહના નેતૃત્વવાળી પીએલસી ભાજપ અને શિઅદ ગઠબંધનમાં રાજ્ય ચૂંટણી લડી રહ્યા છે. પૂર્વ મુખ્યમંત્રી પોતાની પરંપરાગત સીટ પટિયાલથી પંજાબ લોક કોંગ્રેસના ઉમેદવાર તરીકે ચૂંટણી લડી રહ્યા છે.
પાર્ટી નહીં પરિવાર સૌથી મોખરે
શનિવારની બેઠક સરહિંદી ગેટ પર આયોજીત કરવામાં આવી હતી. કૌરે પોતાના પતિ માટે વોટ માગતા કહ્યું કે, હું આપના પરિવારના સભ્ય તરીકે અમરિંદર સિંહ માટે અપીલ કરવા આવી છું.
કોંગ્રેસના પ્રચારથી દૂર રહેનારી પરનીત કૌરના આ પગલાથી તેમની આગામી રાજનીતિ માટે ખતરો ઉભો થઈ શકે છે. થોડા દિવસ પહેલા જ પટિયાલા શહેરથી કોંગ્રેસ ઉમેદવાર વિષ્ણુ શર્મા માટે પ્રચાર કરવા અથવા તો રાજીનામું આપવાનું કહેવામાં આવ્યું હતું. જ્યારે પત્રકારોએ તેમને પુછ્યુ કે, તે ચૂંટણી દરમિયાન ચૂપ શા માટે છે. તો કૌરે કહ્યું કે, હું મારા પરિવાર સાથે છું. પરિવાર સૌથી ઉપર છે.
ગત વર્ષે જ કોંગ્રેસ પાર્ટીએ નોટિસ ફટકારી હતી
કોંગ્રેસે ગત વર્ષે નવેમ્બરમાં જ તેમને કારણ બતાવો નોટિસ ફટકારી કથિત પાર્ટી વિરોધી ગતિવિધિઓ માટે તેમની પાસેથી સ્પષ્ટીકરણ માગ્યું હતું. આ વખતે તેના વિશે પૂછતાં ગુરૂવારે પત્રકારોને કહ્યું હતું કે, તેમને આવી કોઈ નોટિસ મળી નથી. તેના વિશે ખાલી અખબાર અને સોશિયલ મીડિયા પર વાંચ્યું છે. તેમણે કહ્યું કે, નોટિસ પાર્ટી મહાસચિવ તરફથી આવવી જોઈતી હતી.