રાષ્ટ્રપતિની ચૂંટણી / કોંગ્રેસના દિગ્ગજ નેતાના દાવાથી ગુજરાતના રાજકારણમાં હડકંપ, ક્રોસ વોટિંગને લઇને આપ્યું મોટું નિવેદન

• ભાજપના ધારાસભ્યો ક્રોસ વોટિંગ કરશે : શૈલેષ પરમાર
• લાયક ઉમેદવારને ચૂંટી કાઢવા ભાજપના સૌ ધારાસભ્યો ખૂબ ઉત્સુક છે: રાઘવજી પટેલ
• કોંગ્રેસના તમામ ધારાસભ્યો પાર્ટીના આદેશ પ્રમાણે વોટિંગ કરશે: ગેનીબેન

આજે દેશમાં રાષ્ટ્રપતિ પદ માટેની ચૂંટણી યોજાઈ રહી છે, ત્યારે ગુજરાત વિધાનસભામાં પણ ધારાસભ્યો મતદાન કરી રહ્યાં છે. એ દરમ્યાન સામસામે અલગ-અલગ નેતાઓના નિવેદન સામે આવી રહ્યાં છે. દરમ્યાન કોંગ્રેસના ધારાસભ્ય શૈલેષ પરમારે નિવેદન આપતા જણાવ્યું કે, 'રાષ્ટ્રપતિની ચૂંટણી દેશનું બંધારણ અને લોકશાહીને બચાવવાની ચૂંટણી છે. આ ચૂંટણીમાં વ્હિપ આપવાનો હોતો નથી. જેથી તમામ ધારાસભ્યો દિલની વાત મતદાનના માધ્યમથી કરશે. ભાજપમાં 5-6 ટર્મથી ચૂંટાયેલા ધારાસભ્યોને મંત્રી બનાવાયા નથી અને કોંગ્રેસમાંથી પક્ષ પલટો કરીને ગયેલા ધારાસભ્યોને મંત્રી બનાવાયા છે. જેથી ભાજપના ધારાસભ્યો ક્રોસ વોટિંગ કરશે.'

અમને વધારાના મત પણ મળશે એવો અમને સંપૂર્ણ વિશ્વાસ છે: રાઘવજી પટેલ

બીજી બાજુ કૃષિમંત્રી રાઘવજી પટેલે નિવેદન આપતા જણાવ્યું કે, 'આજે દેશના રાષ્ટ્રપતિ પદની ચૂંટણી માટેનું મતદાન થઇ રહ્યું છે. અમારા ભારતીય જનતા પાર્ટીના અહીં વિધાનસભા દંડકના ખંડમાં અમારા તમામ ધારાસભ્યો એકત્રિત થયા છે. ધારાસભ્યોને ખૂબ ઉત્સાહ છે અને આનંદથી તેઓ ભારતના રાષ્ટ્રપતિને ભારતીય જનતા પાર્ટીએ જે ઉમેદવાર પસંદ કર્યા છે, સુશ્રી દ્રૌપદીજી મુર્મૂને મત આપી જંગી બહુમતીથી ચૂંટી કાઢવા ઉત્સુક છે. સાથે ગૌરવની લાગણી અનુભવીએ છીએ કે નરેન્દ્રભાઇ મોદીએ અને ભારતીય જનતા પાર્ટીએ જે ઉમેદવાર પસંદ કર્યા છે તે આદિવાસી છે, ખૂબ શિક્ષિત છે અને બહોળો અનુભવ છે તેમજ જાહેર જીવનમાં એક વખત શ્રેષ્ઠ ધારાસભ્ય તરીકેનો જેને એવોર્ડ મેળવ્યો છે એવા લાયક ઉમેદવારને ચૂંટી કાઢવા માટે ભાજપના ગુજરાતના સૌ ધારાસભ્યો ખૂબ ઉત્સુક છે અને પૂરેપૂરું મતદાન એમની તરફેણમાં થશે. ઉપરાંત અમને વધારાના મત પણ મળશે એવો અમને સંપૂર્ણ વિશ્વાસ છે.'

....તો ભાજપના ધારાસભ્યો ક્રોસ વોટિંગ કરવાના હશે તે કદાચ માનવાજોગ છે: ગેનીબેન ઠાકોર

કોંગ્રેસના ધારાસભ્ય ગેનીબેન ઠાકોરે પણ મહત્વનું નિવેદન આપતા જણાવ્યું કે, 'ભાજપની વિચારધારાવાળા યશવંત સિન્હા કે જે અમારા ઉમેદવાર છે એટલે કદાચ તેમની પર લાગણી રાખીને ભાજપના ધારાસભ્યો ક્રોસ વોટિંગ કરવાના હશે તો કદાચ માનવાજોગ છે. બાકી કોંગ્રેસના તમામ ધારાસભ્યો પાર્ટીના આદેશ પ્રમાણે યશવંત સિન્હાને વોટિંગ આપવાના છે, એ પણ એવાં ઉમેદવારને વોટ આપશે કે જે દેશના હિતમાં સ્વતંત્ર નિર્ણય લઇને દેશનું ભલું ઇચ્છી શકે, નહીં કે રબ્બર સ્ટેમ્પને.'