ગાંધીનગર ખાતે પરેશ ધાનાણીએ બિન સચિવાલય પરીક્ષાનો વિરોધ કરતા આંદોલનકારીઓ માટે ભોજન તૈયાર કરાવ્યું હતું. ત્યારે હવે આજે અમદાવાદના રોડ પર ટ્રાફિક પોલીસ ન હોવાથી પરેશ ધાનાણીએ પોતે ટ્રાફિક નિયમન કર્યું હતું.
સિંધુભવન રોડ પર ટ્રાફિકને ધાનાણીએ કર્યો હળવો
રોડ પર ટ્રાફિકને હળવો કરતા ધાનણીનો વીડિયો વાયરલ
કારમાંથી નીચે ઉતરીને ધાનાણીએ ટ્રાફિકને કર્યો હળવો
અમદાવાદના સિંધુભવન રોડ પર ટ્રાફિકને હળવો કરતા પરેશ ધાનાણીનો વીડિયો વાયરલ થયો છે. શનિવારે રાત્રે પરેશ ધાનાણી સિંધુભવન રોડ પરથી નિકળી રહ્યા હતા. આ દરમિયાન ટ્રાફિક જામના દ્રશ્યો સર્જાયા હતા. ટ્રાફિક જામને જોતા પરેશ ધાનાણી પોતાની કારમાંથી નીચે ઉતરીને ટ્રાફિકને હળવો કરવા માટે પહોંચ્યા હતા. પરેશ ધાનાણીનો ટ્રાફિકને હળવો કરતાનો વીડિયો સોશિયલ મીડિયામાં વાયરલ થયો છે.
બિન સચિવાલયની પરીક્ષામાં ગેરરીતિ મામલે ઉમેદવારોનું આંદોલન હજુ પણ યથાવત છે. વિપક્ષ નેતા પરેશ ધાનાણી ઉમેદવારોને મળ્યા હતા. જ્યાં તેઓએ કહ્યું હતું કે કોંગ્રેસ 9 તારીખે વિધાનસભા કૂચ કરશે. રાજ્યના તમામ ઉમેદવારોને સાથે રાખાશે. પરેશ ધાનાણીએ કહ્યું કે કોંગ્રેસ વિધાનસભામાં પણ પરીક્ષાનો મુદ્દો ઉઠાવશે. વધુમાં તેમણે કહ્યું હતું કે, બિન સચિવાલયની પરીક્ષા રદ્દ કરીને વિદ્યાર્થીઓને ન્યાય નહીં મળી ત્યાં સુધી અમારી સરકાર વિદ્યાર્થીઓને ટેકો આપશે.