રાજકોટના જૂના માર્કેટ યાર્ડમાં ટેકાના ભાવે મગફળીની ખરીદીમાં સેમ્પલ કૌભાંડ આચરાતું હોવાનું સ્ટિંગ ઓપરેશન મીડિયા દ્વારા કરવામાં આવ્યું હતું. જે અહેવાલ મીડિયામાં પ્રસારિત થતા ગણતરીની કલાકોમાં પોલીસે વચેટિયા અમિત પટેલની ધરપકડ કરી હતી.
ટેકાના ભાવે મગફળીની ખરીદીનું કૌભાંડ આવ્યું સામે
મગફળી વહેંચવા માટે ખેડૂતોએ આપવા પડે છે પૈસા
અધિકારીઓને આપવી પડે છે મગફળી વેચવા માટે લાંચ
રાજકોટના જુના માર્કેટિંગ યાર્ડ ખાતે ત્રણ જેટલા તાલુકાના ખેડૂતોની મગફળી ટેકાના ભાવે ખરીદી કરવામાં આવે છે. ત્યારે જે પણ ખેડૂતોની મગફળી રિજેક્ટ થાય છે તેમની પાસેથી વધારાના પૈસા લઈ તેમની મગફળી પાસ કરાવવાનું કોભાંડ મીડિયાએ લોકો સમક્ષ ઉજાગર કર્યું હતું. જે બાદ રાજકોટ પોલીસે વચેટિયા અમિત પટેલની ગણતરીની કલાકોમાં જ ધરપકડ કરી હતી. પછીથી અમિત પટેલ લાંચ પેટે લીધેલા 2500 રૂપિયાની રકમ પોલીસમાં જમા પણ કરાવી હતી.
ત્યારે આ સમગ્ર મામલે કોંગ્રેસના ધારાસભ્ય લલિત વસોયા અને લલિત કગથરા દ્વારા એક પ્રેસ કોન્ફરન્સ કરવામાં આવી હતી. જે પ્રેસ કોન્ફરન્સમાં વચેટિયો અમિત પટેલ માત્ર એક નાનું મોહરું હોવાનું જણાવ્યું હતું. અમિત પટેલ મગફળીની ખરીદી કરનારા અધિકારીઓ વતી લાંચ ખેડૂતો પાસેથી લેતો હોવાની ઓડિયો ક્લિપ પણ અને ધારાસભ્યો દ્વારા જાહેર કરવામાં આવી હતી.
અમિત: 2 હજાર, માટીવાળી મગફળી છે તેમાં તમે કહો એટલા લઉં
અધિકારી: પહેલા 22 નંબરના ટોકનવાળાને કહી દો
અમિત: કેટલા બોલું, એક હજાર બોલી દઉં છું
અધિકારી: બે હજાર બોલજે, ઠીક છે 1500 કહી દે
કોંગ્રેસે આક્ષેપ કરતા વધુમાં જણાવ્યું હતું કે, અમિત પટેલ માત્ર યાર્ડમાં પોતાનું વાહન લઇને આવતો હતો. અમિત કોઇ એજન્સીનો માણસ નહોતો કે નાફેડનો માણસ પણ નથી. અમિત પાસે મગફળી રિજેક્ટ કરવાનો કોઇ અધિકાર નથી. મગફળી ખરીદનાર અધિકારી સોનુ મારફત અમિત વચેટીયો બની ખેડૂતોની મગફળી ખરીદી માટે પૈસા લેતો હતો. અમિત પટેલ કોના માટે પૈસા લેતો હતો? અધિકારીઓને અત્યાર સુધી કેમ પકડવામાં આવ્યા નથી? તેવા સવાલ ઉઠ્યા છે. અમિતને બલિનો બકરો બનાવવામાં આવ્યો છે. મીડિયામાં સમગ્ર મામલો દબાય જાય તે માટે અમિતની ધરપકડ કરવામાં આવી છે. સૌથી વધુ મગફળી રિજેક્ટ પડધરી તાલુકામાં થઇ હતી. પડધરીમાં સૌથી વધુ વરસાદ પડ્યો હતો. અમિત મેટાડોર ચલાવે છે અને અધિકારીનો મધ્યસ્થી બની ગયો હતો.
ત્યારે આગામી સમયમાં કોંગ્રેસના આ બંને જ ધારાસભ્યોએ દાવો કર્યો છે કે તેઓ બે થી ત્રણ એજન્ટોના આ જ પ્રકારના કૌભાંડોનો પર્દાફાશ કરશે. પરંતુ એ જોવું વધુ મહત્વનું રહેશે કે રાજકોટ પોલીસ વચેટિયા અમિત પટેલ બાદ ટેકાના ભાવે મગફળીની ખરીદી કરનાર અધિકારીઓની ધરપકડ કરશે કે કેમ.