પડકાર / ગેનીબેન ઠાકોરે કોને આપી ચેલેન્જ? કહ્યું, થરાદની સિંહણ પર આંગળી ઉપાડી તો આંગળી કાપી નાખીશું

• બનાસકાંઠા આંગણવાડી કાર્યકરોની હડતાળનો મામલો
• ધારાસભ્ય ગેનીબેન ઠાકોરનું ચર્ચાસ્પદ નિવેદન
• મહિલાને આંગળી અડાડી તો આંગળી કાપી નાખીશું: ગેનીબેન

ગુજરાતભરમાં આંગણવાડી કાર્યકરો અને હેલ્પર બહેનોની હડતાળ ચાલી રહી છે. તેમના સમર્થનમાં બનાસકાંઠા જિલ્લાની આંગણવાડી કાર્યકરો અને હેલ્પર બહેનો પણ મોટી સંખ્યામાં સરકારી કામગીરીથી અળગી રહીને લડત આપી રહી છે. ત્યારે આ હડતાળને વાવના કોંગ્રેસના ધારાસભ્ય ગેનીબેન ઠાકોરે પણ સમર્થન આપ્યું છે.

થરાદ વાવ તાલુકાના આંગણવાડી કેન્દ્રોની બહેનો બહોળી સંખ્યામાં થરાદ ખાતે ઉમટી પડી નાયબ કલેકટર કચેરી ખાતે ધરણાં કાર્યક્રમ યોજ્યો હતો. જ્યાં વાવના ધારાસભ્ય ગેનીબેન ઠાકોર આવી પહોંચ્યા હતા. આ તકે ધારાસભ્ય ગેનીબેન ઠાકોરે ચર્ચાસ્પદ નિવેદન આપ્યું હતું.

મહિલાને આંગળી અડાડી તો આંગળી કાપી નાખીશું: ગેનીબેન

તેમણે જણાવ્યું હતું કે, 'આ એક મહિનો આરપારની લડાઈ, હું પોલીસવાળાને ચેલેન્જ કરું છું કે વાવ-થરાદની એક પણ મહિલાને આંગળી અડાડી છે તો આંગળી કાપી નાખીશું, તમે કાયદો અને વ્યવસ્થા જાળવવા માટે બંધાયેલા છો.' 

ન્યાય માટે હક માંગતાને હેરાન નહીં કરો: ગેનીબેન

ગેનીબેને વધુમાં જણાવ્યું હતું કે, 'જે ન્યાય આંદોલન કરતા હોય, પોતાનો હક માંગતા હોય એમના પર અત્યાચાર  ગુજારવા માટેની તમારી ડ્યુટી નથી. છતાં પણ  પોલીસે કોઈ વહીવટી તંત્રના કહેવાથી કોઈને હેરાન કર્યા તો તમે બેસસો એટલા દિવસ તમારી સાથે અમારે બેસવાની તૈયારી છે.' 

ત્રીજા-ચોથા વર્ગના કર્મચારી જાહેર કરવા સહીતની માંગ

આંગણવાડી બહનોને  ત્રીજા-ચોથા વર્ગના કર્મચારી જાહેર કરવા,  રજા અને માનદ વેતનના બદલે સરકારી કર્મચારીનો દરજ્જો આપવો ઉપરાંત ખાનગીકરણ બંધ  કરવા સહિત 14 જેટલી માંગને લઇને ગુજરાતભરમાં આંગણવાડી કર્મીઓ હડતાળ પર ઉતરી ગયા છે. ત્યારે પોલીસ, તલાટીઑની માંગ સરકારે સ્વીકાર્યા બાદ હવે આંગણવાડી કર્મીઓના આંદોલન સામે સરકાર ઝૂકે અને માંગ સ્વીકારે તેવા ઉજળા સંજોગો વાર્તાઇ રહ્યા છે.